Krishna Mukunda Murari ఫిబ్రవరి 16 ఎపిసోడ్: తెగించిన ముకుందా! అందరి ముందు మురారీకి గులాబీ ఇచ్చి..

Krishna Mukunda Murari Today: సీరియల్‌ 82 ఎపిసోడ్‌లోకి అడుగుపెట్టింది. కృష్ణ ఎమోషనల్ అయితే మురారీ దగ్గరకు తీసుకుని ఓదార్చడం ముకుంద చూసి రగిలిపోయిన సంగతి తెలిసిందే. ఇక నిన్నటి కథనం చివరిలో అదే విషయం గురించి.. ముకుంద.. మురారీని నిలదీసే సీన్ నడుస్తోంది. ‘నారీ నారీ నడుమ మురారీ.. భార్యతో బాగానే ఉంటున్నావ్ కదా.. హాల్లో నీ భార్యని పట్టుకుని కౌగిలించుకుని.. అంటూ తప్పుగా మాట్లాడుతుంది. ‘ఆపు ముకుందా.. ఇంత తప్పుగా అర్థం చేసుకుంటావా? ఓదార్పుకి.. కోరికకి తేడా లేదా? అందులో భార్యభర్తల సంబంధమే కనిపించిందా నీకు? అంటూ కోప్పడతాడు.

‘అవును. నాకు అదే కనిపించింది. దొరికిపోయేసరికి.. ఇప్పుడు మాట మార్చి నన్ను మభ్యపెట్టాలని చూస్తున్నావా? నీ క్యారెక్టర్ ఏంటో నాకు బాగా అర్థమైందిలే.. మురారీ.. అంటూ మురారీ గురించి తప్పుగా మాట్లాడుతుంది. దాంతో మురారీ ఆవేశంలో.. ‘చూడు ముకుందా.. మాది నిజమైన పెళ్లి కాదు.. మాది అగ్రిమెంట్ మ్యారేజ్.. ఏడాదిలో కృష్ణ డాక్టర్ కాగానే వెళ్లిపోతుంది.. మా బంధాన్ని ఎందుకు అంత తప్పుగా అర్థం చేసుకుంటావ్’ అంటూ గట్టిగా అరిచేస్తాడు. నిజానికి ఇది కలేమో అనుకున్నాం కానీ.. నిజమే. ముకుందకు మురారీ నిజం చెప్పస్తాడు. సరిగ్గా అప్పుడే బయట హ్యాపీ వేలెటైన్స్ డే అని అరుపులు.. పటాసులు పేలుస్తూ సంబరాలు జరుగుతూ ఉంటాయి.

ఆ క్షణం ముకుంద పట్టరాని ఆనందంతో మురారీ హగ్ చేసుకుంటుంది. ‘ఐ లవ్యూ మురారీ.. ప్రేమికుల రోజు నాడే నాకు ఈ నిజం తెలియడం చూస్తుంటే.. ప్రేమకున్న శక్తి ఏంటో అర్థమవుతుంది. ఈ విషయం నాకు ముందే చెప్పాల్సింది. పవిత్రమైన మీ స్నేహాన్ని నేను తప్పుగా అర్థం చేసుకునేదాన్ని కాదు కదా.. థాంక్యూ మురారీ థాంక్యూ.. అపార్థం చేసుకున్నందుకు సారీ’ అంటూ నవ్వుకుంటూ అక్కడి నుంచి వెళ్లిపోతుంది. తలపట్టుకుంటాడు మురారీ. ‘ఆవేశంలో నోరు జారాను.. ఇప్పుడు ముకుంద ఎలా రియాక్ట్ అవుతుందో.. ఎలాంటి సమస్యలు వస్తాయో’ అని భయపడిపోతాడు మనసులో. ఇక ఉదయాన్నే లేచి కూడా అదే ఆలోచిస్తూ ఉంటాడు.

ఇంతలో కృష్ణ.. నేల మీద పాక్కుంటూ వచ్చి.. ఏదో వెతుకుతూ.. మురారీ కాళ్లు అడ్డంగా ఉన్నాయని లాగేస్తుంది. డబాల్ మని కింద పడిపోతాడు మురారీ. జుట్టు విరబోసుకుని ఉన్న కృష్ణని చూసి.. కెవ్వుమంటాడు. ‘భయపడి చచ్చాను కృష్ణ.. ఎందుకు అలా లాగేశావ్’ అంటాడు. నా ఐబ్రోపెన్సిల్ కింద పడి దొళ్లుకుంటూ దొళ్లుకుంటూ ఇలా వచ్చేసింది ఏసీపీ సార్.. అంటుంది. అక్కడ కాసేపు కామెడీ సీన్ నడుస్తుంది.

ఆ తర్వాత కృష్ణ.. ‘అవును మీరు రాత్రి 12 గంటలకు ఎక్కడికి వెళ్లారు. నాకో భయం కరమైన కలొచ్చింది.. అదేంటో తెలుసా.. జుట్టు విరబోసుకున్న దెయ్యం(ముకుంద) ఒకటి.. మీ వెంటే పడింది. నన్ను పో పో అంటోంది.. నేను మిమ్మల్ని కాపాడాలని శ్రీ ఆంజనేయం ప్రసన్నాంజనేయం అని మొక్కుకుంటూ.. దాన్ని పో పో అంటున్నా పోలేదు.. మీ గుండెల మీదకు వచ్చేసింది తెలుసా.. మిమ్మల్ని రా రా అని పిలుస్తుంటే.. కోపం వచ్చి పో అన్నాను.. అది కోపంగా నావైపు చూసింది. నేను కెవ్వుమని లేచాను.. కానీ మీరు పక్కనే లేరు.. ఎక్కడికి వెళ్లారు’ అంటూ కృష్ణ. చాలా సేపు తప్పించుకోలేక తింగరచూపులు చూసిన మురారీ.. దెయ్యం ఎత్తుకెళ్లింది అని చెప్పి మారు మాట్లాడనీయకుండా వెళ్లిపోతాడు. తీరా మురారీ వెళ్లాక.. కృష్ణ.. ‘కలలు నిజమవుతాయా?’ అనుకుంటుంది బిత్తరచూపులు చూస్తూ. నిజానికి ముకుందే కృష్ణ కలలోనే దెయ్యం.

ఇక వంట గదిలో ముకుంద చాలా సంబరంగా అందరికీ దోసెలు వేసి.. కాఫీలు ఇచ్చి హడావుడి చేస్తుంది. ముకుంద హంగామా చూసి రేవతి షాక్ అవుతుంది. ‘దీనికి కచ్చితంగా కారణం మురారీనే’ అని ఫిక్స్ అవుతుంది. ఇక అంతా తినడానికి వస్తారు. తింటూ ఉంటారు. ‘రాత్రికి రాత్రి.. మార్పు ఏంటి ముకుందా?’ అని భవానీతో సహా అంతా అడగడంతో.. ‘మురారీనే అడగండి అత్తయ్యా..’ అంటూ అడ్డంగా ఇరికించేస్తుంది. బిత్తరపోతాడు మురారీ. ‘అది.. అది.. ఆదర్శ్ గురించి తీవ్రంగా వెతుకుతున్నారని సమాచారం వచ్చింది పెద్దమ్మా.. ఆ విషయం.. ఆ విషయం ముకుందకు చెప్పాను’ అంటూ అబద్దం చెప్పి తప్పించుకుంటాడు మురారీ.

కమింగ్ అప్‌లో.. కృష్ణ.. మురారీని.. ‘మీరు ఎవరినైనా ప్రేమించారా? తను ఇంకా టచ్‌లోనే ఉందా ? అని ప్రశ్నలు వేస్తుంది. ఆ ప్రశ్నలకు మురారీ ఏం చెబుతాడో చూడాలి. ఇక సీన్ కట్ చేస్తే.. ముకుంద.. మురారీని ఒంటరిగా కలిపి.. ఓ షాకిస్తుంది. ‘మురారీ నేను చాలా సంతోషంగా ఉన్నాను.. నువ్వు సాయంత్రం ఇంటికి వచ్చాక.. నేను నీకు అందరి ముందు గులాబీ ఇచ్చి.. హ్యాపీ వేలెటైన్స్ డే అని చెబుతాను.. నా ప్రేమ బతికే ఉందని రుజువు చేసుకుంటాను’ అంటుంది. షాక్ అయిపోతాడు మురారి. మరి ఈ ప్రమాదం నుంచి మురారీ ఎలా తప్పించుకుంటాడో చూడాలి. బహుశా ఇంటికి రాకుండా ఆగిపోతాడేమో? మరిన్ని వివరాలు తరువాయి భాగంలో చూద్దాం! ‘కృష్ణ ముకుంద మురారి’ Krishna Mukunda Murari కొనసాగుతోంది. (photo courtesy by star maa and disney+ hotstar)