Guppedantha Manasu Today: చావు బతుకల్లో రిషి.. ఒంటిపై కత్తిపోట్లు.. ప్రాణాపాయ స్థితిలో చూసిన వసుధార

గుండెల్ని పిండేసే కథనంలో ‘గుప్పెడంత మనసు’ సీరియల్ భావోద్వేగంగా సాగుతుంది. తనపై పడ్డ నిందను భరించలేక రిషి.. ప్రేమించిన వసుధారకి.. కన్న తల్లి జగతికి దూరం అయ్యాడు. ఇక ప్రాణానికి ప్రాణంగా ప్రేమించిన వసుని కూడా దూరం చేసుకున్నాడు రిషి. తనకి జరిగిన అవమానానికి వసు కూడా కారణం కావడంతో.. వసుతో ప్రేమ బంధాన్ని తెంచేసుకుంటూ.. ఎంగేజ్‌మెంట్ రింగ్‌ని తీసి వసు చేతిలో పెట్టేస్తాడు. ఇక నుంచి నాకు ఎలాంటి సంబంధం లేదని బ్రేకప్ చెప్పేస్తాడు. ఇక రిషి ఎక్కడున్నాడనే విషయం శైలేంద్రకి మాత్రమే తెలియడంతో.. రిషి అడ్డు తొలగించుకోవడానికి అతన్ని చంపేయడానికి రౌడీలను పంపిస్తాడు శైలేంద్ర.

అయితే తాజా ప్రోమోలో రిషిని.. రౌడీలు చుట్టుముట్టారు. రిషి తిరగబడగా.. వెనుకనుంచి కత్తితో పొడిచేశారు. రక్తపు మడుగులో రిషి ఒక్కసారిగా కుప్పకూలిపోయాడు. సరిగ్గా అదే టైంకి.. జగతి తన కొడుకు గురించి ఆలోచిస్తూ కన్నీళ్లు పెట్టుకుంటూ ఉంటుంది. అప్పుడు గోడకి ఉన్న రిషి ఫొటో కింద పడిపోతుంది. విరిగిన అద్దాలను తీస్తుండగా.. జగతి చేయి తెగి రక్తం రిషి ఫొటోపై పడుతుంది. దీంతో ఇలా జరిగింది ఏంటి? రిషికి ఏమైంది అంటూ కన్నీటి పర్యంతం అవుతుంది జగతి.

అయితే ప్రాణాపాయంలో ఉన్న రిషిని హాస్పటల్‌లో వసుధార చూస్తుంది. వసుధార తల్లి ఉన్న హాస్పటల్‌కే రిషిని తీసుకుని రావడంతో.. రిషిని చూసి ఒక్కసారిగా కుప్పకూలిపోయింది రిషిధార. మరి రిషి ప్రాణాలను వసుధార కాపాడిందా? జగతి వచ్చి తన కొడుకు ప్రాణాలను కాపాడుకుందా? అన్నది రేపటి ఎపిసోడ్‌లోని ట్విస్ట్.

ఇక ఈ ప్రోమో కింద కామెంట్లు అయితే మామూలుగా లేవు.. ‘జగతి మేడమ్ ఇప్పటికైనా నిజం చెప్పాలి’ అని కొందరంటే.. ‘రిషి సార్‌ని అలా పొడుస్తుంటే గుండె తురుక్కుపోతుంది.. ఏడుపొచ్చేస్తుంది’.. ‘ప్రోమో చూస్తుంటే కళ్లల్లో నీళ్లు తిరుగుతున్నాయి’.. ‘మా రిషి నిండు నూరేళ్లు సుఖ సంతోషాలతో ఆనందంగా జీవించాలి’.. ‘రిషి సార్ మీకు ఏమీ కాదు.. మీరు ప్రాణాలతో తిరిగి రావాలి’ అంటూ తెగ ఇన్వాల్వ్ అయిపోతున్నారు ‘గుప్పెడంత మనసు’ సీరియల్ ఫ్యాన్స్. ఈ కామెంట్లను బట్టి ఆడియన్స్ ఈ సీరియల్‌కి ఎంత కనెక్ట్ అయ్యారని అర్ధం చేసుకోవచ్చు. తల్లీ కొడుకుల మధ్య సెంటిమెంట్ సీన్లతో గత వారం రోజులుగా గుప్పెడంత మనసు సీరియల్ గుండెల్ని పిండేస్తుంది. ముఖ్యంగా రిషి, జగతిల నటన అయితే అద్భుతం అనే చెప్పారు. ఇద్దరూ పోటీ పడి నటిస్తున్నారు. ఇక వసుధార-రిషిల బ్రేకప్ సీన్ అయితే గుండెల్ని పిండేసింది.