Premi Viswanath: కార్తీకదీపం వంటలక్క అరుదైన ఘనత.. దేశ వ్యాప్తంగా ఖ్యాతి

అబ్బబ్బ.. ఏముందయ్యా ఆ సీరియల్‌లో ఎప్పుడూ ఒకటే ఏడుపు, గోల. ఆ డాక్టర్ బాబు వంటలక్కను ఏలుకోనంటాడు.. వంటలక్క వ్యక్తిత్వాన్ని కోల్పోనంటుంది.. మధ్యలో వాళ్లిద్దరి పిల్లలు హిమ, సౌర్య డాడీ కావాలి.. మమ్మీ కావాలంటారు.. ఇద్దరూ కలవాలంటారు. సర్లే వీళ్ల కోరిక తీరి డాక్టర్ బాబు-వంటలక్క కలిసే చిన్న అవకాశం వచ్చినా.. మోనిత రూపంలో అడ్డుకట్ట పడుతోంది. ఇక సౌందర్య అత్త అయితే అటు కొడుకుని ఇటు కోడల్ని కాదనలేక కుమిలిపోతూ ఉంటుంది. గత 943 ఎపిసోడ్‌లుగా.. అంతే దాదాపు మూడేళ్లుగా ఇదే తంతు.

కానీ ఒక్కరోజు ‘కార్తీకదీపం’ సీరియల్ చూడకపోతే ఆరోజు గడిచినట్టే ఉండదు తెలుగు రాష్ట్రాల్లోని కోట్లాదిమంది ప్రేక్షకులకు. ఇంట్లో వంట చేయడం అయినా మానేస్తున్నారు కానీ.. ఒక్కరోజు వంటలక్క చూడకుండా మాత్రం ఉండలేకపోతున్నారు మహిళా ప్రేక్షకులు. రాత్రి ఏడున్నర అయ్యిందంటే.. కార్తీకదీపం సీరియల్ కోసం టీవీలకు అతుక్కుపోతుంటారు. అందుకే ఈ సీరియల్ బుల్లితెర బాహుబలిగా అవతరించి స్టార్ మా ఛానల్‌ని టీఆర్పీ రేటింగ్‌లో అగ్రస్థానంలో కూర్చోబెట్టింది. అప్పుడు ఇప్పుడు ఎప్పుడూ.. 13 నుంచి 18 వరకూ టీఆర్పీ రేటింగ్ సాధిస్తూ టాప్ సీరియల్ లిస్ట్‌లో ఫస్ట్ ఉంటూ వస్తోంది కార్తీకదీపం సీరియల్.

వంటలక్కా సాహో.. అంటుంటారు ఈ సీరియల్ చూసేవాళ్లు. వ్యక్తిత్వాన్ని చంపుకోలేని ఆత్మాభిమానం.. ఎంత పెద్ద కష్టాన్నైనా ఎదుర్కోగల ఆత్మస్థైర్యం.. ఈ రెండింటినే ఆభరణాలుగా ధరించి దీప పాత్రతో ఆకట్టుకుంటోంది ఈ సీరియల్ హీరోయిన్ ప్రేమి విశ్వనాథ్. తన అద్భుత నటనతో తెలుగువారి ఆడపడుచుగా మారిన ఈ మలయాళ కుట్టీ అరుదైన ఘనత సాధించింది.

దేశ వ్యాప్తంగా టెలివిజన్ (తెలుగు) బెస్ట్ యాక్టర్‌గా అరుదైన రికార్డ్ తన ఖాతాలో వేసుకుంది ప్రేమీ విశ్వనాథ్. ఆర్మాక్స్ మీడియా దేశ వ్యాప్తంగా ఉన్న బుల్లితెర నటీనటులతో ఉత్తమ ప్రతిభ కనబరిచిన వారి లిస్ట్ ప్రకటిస్తూ వస్తోంది. 2020 ఏడాదికి గానూ కార్తీకదీపం సీరియల్‌ నుంచి ఉత్తమ కల్పిత పాత్రల విభాగంలో వంటలక్క ఈ ఘనత సాధించింది.

ఇక సినిమా విభాగానికి వచ్చేసరికి.. మోస్ట్ పాపులర్ ఫిమేల్ స్టార్స్‌ లిస్ట్‌లో సమంత తొలి స్థానంలో నిలిచింది. మేల్ విభాగంలో మోస్ట్ పాపులర్ టాప్ 10 లిస్ట్‌లో మహేష్ బాబుకి తొలిస్థానం దక్కింది. రెండో స్థానంలో అల్లు అర్జున్, మూడో స్థానంలో ప్రభాస్.. నాలుగో స్థానంలో పవన్ కళ్యాణ్.. ఐదో స్థానంలో ఎన్టీఆర్.. ఆరో స్థానంలో చిరంజీవి.. ఏడో స్థానంలో రామ్ చరణ్.. ఎమినిదో స్థానంలో విజయ్ దేవరకొండ.. తొమ్మిది నాని.. పదో స్థానంలో వెంకటేష్ ఉన్నారు.