Janaki Kalaganaledu జనవరి 26 ఎపిసోడ్: ముగ్గులపోటీలో విజేత జానకి.. కాని జ్ఞానాంబదే గెలుపు..

సంక్రాంతి సంబరాల్లో భాగంగా తన ఫ్యామిలీని తీసుకుని గుడికి వెళ్తుంది జ్ఞానాంబ. అక్కడ జరిగే ముగ్గుల పోటీలో జానకి, మల్లికలతో సహా పాల్గొంటుంది. ప్రైజ్ మనీ ఇవ్వడానికి ఎమ్మెల్యే మధులత (ఉమాదేవి) ఎంట్రీ ఇచ్చింది. అదే గుడిలో రామాని లేపేయడానికి స్పాట్ పెట్టింది కార్పొరేటర్ సునందా దేవి. మరి రామా ఆ ప్రమాదం నుంచి తప్పించుకున్నాడా? ఆ ముగ్గుల పోటీలో ఎవరు గెలిచారు.. ఆ వివరాలు నేటి రాత్రి ప్రసారం కాబోయే 226వ ఎపిసోడ్‌లో చూద్దాం.


ముగ్గుల పోటీలో జానకి, మల్లిక, జ్ఞానాంబలతో పాటు సునందా దేవి కూడా పోటీ పడుతుంది. జానకి వేస్తున్న ముగ్గు అందరికంటే బాగా వస్తుండటంతో.. మన కోడలు అందరికంటే బాగా వేస్తుందని గోవిందరాజులు అనడంతో.. మరేంటి అనుకున్నారు నాన్నా.. మనమే కదా నేర్పించింది అని నోరు జారేస్తాడు రామా. ఆ దెబ్బతో జానకి షాక్ అవుతుంది. ఆ తరువాత రామా బాగానే కవర్ చేసేస్తారు. ఇక మల్లిక తింగరి వేషాలు వెగటు కామెడీ ఎప్పుడూ ఉండే రొటీన్ సీనే. జానకి-జ్ఞానాంబలు పోటీ పడి ముగ్గులు వేయడంతో.. జానకి వేస్తున్న సూపరో సూపరు అని పొగిడిన రామా.. మా అమ్మ వేసిన ముగ్గు అంతకంటే సూపర్.. కాబట్టి ఫస్ట్ ప్రైజ్ మా అమ్మకే అందులో ఎలాంటి అనుమానం లేదంటూ తెగ పొగిడేస్తాడు.

ఆ మాటతో జ్ఞానాంబ.. ఎవరు గెలిస్తే ఏముందిరా.. నా కోడలు గెలిస్తే నేను గెలిచినట్టు కాదా? అని అంటుంది.. ఇది కదా మా అమ్మ అంటే తెగ చప్పట్లు కొట్టేస్తాడు రామా. వీళ్లని చూసి మల్లిక తెగ కుళ్లుకుంటుంది. నన్ను కూడా పొగడొచ్చు కదా.. అని విష్ణుతో బలవంతంగా పొగిడించుకుంటుంది. విష్ణుని యాక్టింగ్ చేయమంటే ఓవరాక్షన్ చేసి సీన్‌ని పండించే ప్రయత్నం చేస్తాడు. మీ ఓవరాక్షన్ చాల్లే కానీ మల్లిక తనని పొగడమని నీపైకి ముగ్గు గిన్నె విసరడం మేం చూశాంలే అని గోవిందరాజులు గాలి తీసేసి ఆటపట్టిస్తాడు.

ఇక ఈ ముగ్గుల పోటీకి న్యాయనిర్ణేతగా వచ్చిన ఎమ్మెల్యే మధులత ఒక్కో ముగ్గుని గమనిస్తూ మార్కులు వేస్తుంటుంది. అయితే అత్తని గెలిపించాలనే ఉద్దేశ్యంతో జానకి తాను వేసిన ముగ్గుని కాలితో కావాలనే చెడగొట్టుకుంటుంది. ఆ విషయాన్ని గోవిందరాజులు గమనిస్తాడు.

జానకి దగ్గరకు వచ్చిన మధులత.. ఈ ముగ్గులపోటీలో విజేత మీరే కానీ.. ముగ్గు చివర్లో ఫినిషింగ్ సరిగా వేయలేదు అందుకే.. జ్ఞానాంబ గారికే మొదటి బహుమతిని ప్రకటిస్తుంది ఎమ్మెల్యే మధులత.

మరోవైపు రామాని లేపేయడంలో భాగంగా.. సునంద దేవి సుపారీ గ్యాంగ్‌లోని సభ్యుడు రామా బైక్‌లో బాంబ్ పెడతాడు. రామా అదే బైక్‌తో సంక్రాంతి సంబరాల్లో భాగంగా బైక్ రైడ్‌కి వెళ్తాడు. మరి ఆ బాంబ్ పేలిందా? లేదంటే ఆ ప్రమాదం నుంచి రామా తప్పించుకున్నాడా? అన్నది రేపటి ఎపిసోడ్‌లో తేలనుంది.