Krishna Mukunda Murari ఏప్రిల్ 28: భవానీకి జలక్ ఇచ్చిన అత్తాకోడళ్లు.. సూపర్ కామెడీ

Krishna Mukunda Murari April 28 Episode: నేటి కథనంలో మురారీ వాళ్లు చాలా ఆవేదనగా.. ఉన్న సమయంలో.. పండ్ల ముక్కలు కట్ చేసి ప్లేట్‌లో పెట్టి.. వాళ్ల గది బయటపెట్టి తలుపు కొట్టి వెళ్లిపోతుంది రేవతి. అవితీసుకుని తింటూ మా అమ్మ దేవత అని మెచ్చుకుంటాడు మురారీ. కృష్ణ కూడా సంబరపడిపోతుంది.

ఇక మరునాడు పల్లీలు బాగు చేస్తూ ఉంటుంది రేవతి. అప్పుడే కిందకు దిగిన కృష్ణ.. రేవతి వెనుక నుంచి పిలవాలనే ఆగిపోతుంది. అప్పుడే అక్కడున్న ఉల్లిపాయలు తీసుకుని.. కట్ చేయడానికి రేవతి పక్కకే వచ్చి కూర్చుంటుంది. అప్పుడే రేవతి చుట్టూ గమనించి.. ఎవరూ లేనప్పుడు.. ‘పెళ్లి బాగా జరిగిందా?’ అంటుంది. కృష్ణ చాలా సంబరపడిపోతుంది అత్త మాట్లాడుతున్నందుకు.

‘బాగా అంటే గొడవ మధ్య జరిగింది. నాకు ఏసీపీ సార్‌కి మాత్రం ఎలా సంతోషం లేదు.. ఇంటికి వస్తే ఎలాంటి గొడవ జరుగుతుందోననే టెన్షన్‌తోనే గడిచిపోయింది’ అంటుంది కృష్ణ. అప్పుడే ఈశ్వర్ మెట్లు ఎక్కుతూ వీళ్లు మాట్లాడుకుంటారా అనే అనుమానం చూసి వెళ్తాడు. ఇక ప్రసాద్ కిందకు దిగుతూ అలానే చూసుకుంటూ వెళ్తాడు. అప్పుడే రేవతి, కృష్ణలు వాళ్లని ముందే గమనించుకుని కూల్‌గా ఎవరి పని వాళ్లు చేసుకుంటూ ఉంటారు. ‘మురారీ బాగా ఫీల్ అవుతున్నాడా?’ అంటుంది రేవతి. ‘అవును అత్తయ్యా చాలా బాధపడుతున్నాడు’ అంటుంది కృష్ణ. ‘మీ మావయ్యలిద్దరూ గూఢాచారి116లా తయారయ్యారు కృష్ణ మనం జాగ్రత్తగా ఉండాలి’ అంటుంది రేవతి.

అప్పుడే భవానీ దేవి రేవతీ అని అరుస్తుంది. ఉలిక్కి పడిన ఇద్దరూ రేవతి దగ్గరకు నడుస్తారు. అప్పటికే అంతా మూగిపోతారు. కృష్ణ వెళ్తూ వెళ్తూనే రెండు పల్లీలు అందుకుంటుంది. ‘ఏంటిది రేవతి.. నేనేం చెప్పాను నువ్వేం చేస్తున్నావ్?’ అంటుంది భవానీ దేవి కోపంగా. ‘మీరు చెప్పిందే చేస్తున్న అయ్యా.. ఇడ్లీలు పల్లీల చట్నీనే చేస్తున్నా’ అంటుంది రేవతి మాట మార్చే ప్రయత్నంగా. ‘అది కాదు నేను అనేది.. మనం వెలివేసిన వాళ్లతో నువ్వెందుకు మాట్లాడుతున్నావ్?’ అంటుంది భవానీ. ‘అయ్యో లేదు అక్కా’ అంటుంది రేవతి. ‘నిజం చెప్పు రేవతీ’ అంటాడు ఈశ్వర్.

‘ఏం కృష్ణా నేను నీతో ఏమైనా మాట్లాడానా?’ అంటుంది రేవతి. ‘లేదు అత్తయ్యా మీ పని మీరు చేసుకుంటున్నారు.. నా పని నేను చేసుకుంటున్నాను’ అంటుంది కృష్ణ. ‘ఇప్పుడే చేసింది ఏంటీ?’ అంటుంది కోపంగా భవానీ. ‘క..క్లారిటీ ఇప్పిస్తున్నా అక్కా’ అంటుంది రేవతి. ‘ఎవరికి చెబుతున్నావ్? నా మాట లెక్కచేయకుండా ముచ్చట్లు పెట్టుకుంటారా? నిన్ను కూడా వెలివేయాలా’ అంటుంది భవానీ కోపంగా. ‘వద్దు అత్తయ్యా.. ఇంట్లో వంట చేసేది రేవతి అత్తయ్యే.. మీరంతా హోటల్ నుంచి ఫుడ్ తెప్పించుకోవాల్సింది’ అంటుంది కృష్ణ చాలా అమాయకంగా ముఖం పెట్టి.

నిజంగానే ఆ సీన్ భలే కామెడీగా మారిపోతుంది. ‘అయ్యో వాళ్లకు హోటల్ ఫుడ్ పడదు కృష్ణా.. జ్వరం వచ్చినా నీరసంగా ఉన్నా నేను వంట చేస్తేనే వాళ్లు తృప్తిగా తింటారు’ అంటుంది రేవతి. వాళ్లిద్దరూ వాళ్లముందే అలా మాట్లాడుకోవడం చూసి.. మురారీ బిత్తరముఖం వేస్తాడు. ‘అలాగా అత్తయ్యా.. హా నిజమే.. మీ వంట చాలా రుచిగా ఉంటుంది కదా అందుకే వదల్లేరు’ అంటుంది కృష్ణ. ‘హలో.. హలో.. ఏం జరగుతుంది ఇక్కడా? మాట్లాడుకోవడం లేదంటూనే పేరంటానికి వచ్చినట్లు తెగ మాట్లాడేసుకుంటున్నారు ఇద్దరూ’ అంటాడు ప్రసాద్.

‘నా మాటలు ఎక్కడ వినిపిస్తాయోనని.. చెవిలో పల్లీలు కూడా పెట్టుకున్నారు.. రేవతి అత్తయ్యా.. మీకు నా మాటలు వినిపిస్తున్నాయా?’ అంటుంది కావాలనే. ‘ఆ..హా.. లేదు’ అని సైగ చేస్తుంది రేవతి. వెంటనే కృష్ణ.. రేవతి చెవిలోంచి తీసినట్లుగా తను తెచ్చిన పల్లీలని చూపిస్తుంది. బిత్తరపోతారు అంతా. ఇదిగోండి మీరే చూడండి అంటుంది కృష్ణ. ‘రాగానే నేను ఏమైనా మాట్లాడేస్తాను అనుకుని.. చెవిలో పల్లీలు పెట్టుకున్నారు’ అంటుంది కృష్ణ.

‘ఆవిడ చెవిలో పల్లీలు పెట్టుకుందో.. లేక నువ్వు మా చెవిలో పూలు పెడుతున్నారో మాకు అర్థం కావట్లేదు’ అంటాడు ప్రసాద్. ఆ మాటకు ముకుందకు కూడా నవ్వొస్తుంది. ‘నిజం చెప్పు కృష్ణా.. మీ అత్తయ్య నీతో మాట్లాడలేదు’ అంటాడు ఈశ్వర్. ‘లేదు మావయ్యా’ అంటుంది కృష్ణ. ‘నేను నమ్మను కృష్ణ’ అంటాడు ప్రసాద్. ‘కృష్ణ అసాధ్యురాలు.. అందరినీ బుట్టలో వేసి మాట్లాడిస్తుంది’ అంటుంది ముకుంద. మొత్తం ఆ సీన్ చాలా కామెడీగా ఉంటుంది. Krishna Mukunda Murari ‘కృష్ణ ముకుంద మురారి’ కొనసాగుతోంది. మరిన్ని వివరాలు తరువాయి భాగంలో చూద్దాం! (photo courtesy by star maa and disney+ hotstar)

Also Read: 'రాధకు నీవేరా ప్రాణం' ఏప్రిల్ 28 ఎపిసోడ్: ధర్మావతి చేతిలో రాధిక ఫొటో.. కార్తిక్ గుండెల్లో పల్లవికే చోటు.. మరి పెళ్లి జరిగేది ఎలా?