Guppedantha Manasu Serial అప్ డేట్స్: వసుకి రొమాంటిక్ గిఫ్ట్.. మాట మార్చేసిన రిషీంద్ర భూషణ్..

ఓ వైపు రిషి, వసులకు ఏకాంతాన్ని కలిపిస్తారు మహేంద్ర అండ్ కో బ్యాచ్. ఆ సమయంలోనే రిషి.. వసు మెడలో వరమాల వేసి చెల్లుకి చెల్లు అంటూ గతాన్ని గుర్తు చేస్తాడు. గతంలో అభినందన సభలో వసు రిషి మెడలో పూల మాల వేసిన సంగతి తెలిసిందే కదా.. దాన్నే గుర్తు చేస్తాడు రిషి. మరోవైపు క్యారెమ్స్‌ ఆటకు సిద్ధమైన రిషి, మహేంద్ర, జగతీ, వసులు.. ఆట ప్రారంభంలోనే జగతీ, రిషీ ఒక్కటిగా ఆడేందుకు ప్లాన్ చేస్తాడు మహేంద్ర. ఆ సమయంలోనే రిషి, జగతీల బంధం బలపడే సీన్ నిన్నటి కథను హైలైట్‌గా నిలిచింది.

మహేంద్ర, జగతీల పెళ్లి రోజు ఘనంగా చెయ్యాలని రిషి నిర్ణయించిన తరుణంలో.. వసు కూడా అదే ఇంటికి రావడంతో రిషి ఆనందానికి అవథులు లేకుండా పోయాయి. అయితే లేటెస్ట్ ప్రోమో.. గుప్పెడంత మనసు అభిమానులకు ఎపిసోడ్ లేకున్నా ప్రోమోతోనైనా కొంత స్టోరీ తెలుసుకునే అవకాశాన్ని అందిస్తుంది. ఇప్పుడు ప్రోమో హైలైట్స్ చూద్దాం.

ప్రోమో హైలైట్స్..
వసు మంచంపైన చాలా డ్రెస్‌లు పరచుకుని.. ఒక్కోదాన్ని చూస్తూ.. ‘ఫంక్షన్‌కి ఏ డ్రెస్ సెలెక్ట్ చేసుకోవాలి..?’ అని ఆలోచిస్తూ ఉంటుంది. ఇంతలో రిషి వస్తాడు. ఏదో బ్యాగ్ తీసుకొచ్చి వసు చేతిలో పెడతాడు. దాన్ని ఓపెన్ చేసిన వసు.. చీర బయటికి తీసి.. ‘చీరనా..’ అంటుంది. ‘అవును.. రేపు ఫంక్షన్‌లో ఇదే కట్టుకో’ అంటాడు రిషి. వసు షాక్ అవుతుంది. గతంలో జరిగిన సీన్ గుర్తు చేసుకుంటుంది. ఒకసారి చీర కట్టుకుని.. అనుకోకుండా తూలి రిషీ చేతుల్లో పడినప్పుడు.. ‘ఈ చీరలవీ ఇవీ అవసరమా?’ అంటూ తిడతాడు. ఆ సీన్ గుర్తు చేసుకున్న వసు.. ‘మీరు అప్పుడు..’ అంటూ గుర్తు చేసే ప్రయత్నం చేస్తుంది.

‘ఇవన్నీ ఏం చెప్పకు.. ఈ చీర బాగుంది.. నీకు ఇంకా బాగుంటుంది..’ అనేసి చీర ఇచ్చి వెళ్లబోతుంటాడు రిషి. ‘థాంక్యూ సార్.. నాకోసం మీరు ఆలోచిస్తున్నందుకు..’ అంటుంది వసు. రిషి చాలా ప్రేమగా తిరిగి చూస్తాడు. వసు మురిసిపోతుంది.
అయితే గతంలో వసుని చీర కట్టుకోవద్దని చెప్పిన రిషి.. ఇప్పుడు చీర కట్టుకోమంటూ రొమాంటిక్‌గా స్పందించడం ఆసక్తికరమైన విషయమే.

మొత్తానికీ ఈ ప్రోమోతో.. జగతీ, మహేంద్రల పెళ్లిరోజు ఫంక్షన్‌లో వసు చీర కట్టుకోబోతుందని అర్థమవుతుంది. పైగా ఫంక్షన్‌లోనే వసు, రిషీల బంధం గురించి చెప్పాలని రిషి.. దేవయానికి చెప్పిన సంగతి కూడా తెలిసిందే. దేవయాని ఏం ప్లాన్ చేసిందో ఏమో తెలియదు కానీ.. వసు చీర కట్టుకుని రిషి ముందు కనువిందు చేయనుందని తేలిపోయింది. చూడాలి మరి ఏం జరుగుతుందో? ఫంక్షన్‌లో దేవయాని, సాక్షీ కలిసి ఏం ప్రళయాన్ని సృష్టిస్తారో? ఎపిసోడ్ వచ్చేంత వరకూ వేచి చూడాల్సిందే.