Guppedantha Manasu updates: దేవయాని పరువు తీసేసిన రిషి! కక్కలేక మింగలేక రగిలిపోయిన పెద్దమ్మ..

Guppedantha Manasu highlights: నాన్నా రిషీ ఏదో మాట్లాడాలి అన్నావ్..? అంటుంది దేవయాని. ‘అవును పెద్దమ్మా.. ఇప్పుడు మన కాలేజ్ లెక్చరర్స్ ఇంటికి వస్తారు.. వాళ్లతో మీరు మాట్లాడాలి..’ అంటాడు రిషి. ‘ఎందుకు మాట్లాడాలి? ఏం మాట్లాడాలి? వాళ్లు మనింటికి ఎందుకొస్తున్నారు రిషీ?’ అంటుంది దేవయాని అయోమయంగా చూస్తూ. ‘వచ్చాక మీకే తెలుస్తుందిలే పెద్దమ్మా’ అంటాడు రిషి.

ఇక సీన్ కట్ చేస్తే.. రిషి ఇంట్లో హాల్లో.. ఒక సోఫా మీద రిషి, దేవయాని.. మరో సోఫా మీద.. కాలేజ్‌లో వసు గురించి, రిషి గురించి తప్పుగా మాట్లాడిన లెక్చరర్స్ ఉంటారు. ‘వసుధార లేదు కదా.. అందుకే రిషి సార్‌కి మూడ్ లేదు. అసలు భూషణ్ ఫ్యామిలీనే ఇంత.. వాళ్ల గురించి ఎంత చెప్పినా తక్కువే’ అంటూ మాట్లాడుకుంటారు ఆ లెక్చరర్స్. ఆ పక్కనే జగతి పక్కనే నిలబడి ఉంటుంది. (గత ఎపిసోడ్‌లో వీళ్లు మాట్లాడిన మాటలు.. వీళ్లకి జగతీ ఇచ్చిన వార్నింగ్ మొత్తం రిషి వింటాడు). ‘ఏం అయ్యింది సార్ రమ్మన్నారట’ అంటుంది అందులో ఒకామె. రిషి వాళ్ల వైపు కోపంగా చూస్తాడు.

మీరు స్టూడెంట్స్‌కి చదువు చెప్పేవాళ్లు.. మీరు ఎలా ఉండాలి.. బాధ్యతగా మాట్లాడాలి. సంస్కారంగా వ్యవహరించాలి కదా? రిషి, వసుధారల గురించి నోటికి వచ్చినట్లు మాట్లాడారట..? ఒక అమ్మాయి అబ్బాయి కలిసి చనువుగా ఉంటే మీకు తోచినవన్నీ అంటడతారా? వాళ్లు ఇద్దరూ ఒకటి అవుదామనే అనుకున్నారు.. అది ఇప్పుడు కుదర్లేదు.. అంత మాత్రాన్న మీకు ఇష్టమొచ్చినట్లు మాట్లాడతారా? మాట్లాడరేంటండీ? మీరు ఇలా చేయడం కరెక్టా? అదే మా రిషి ప్లేసులో వేరే వాళ్లు ఉండి ఉంటే ఈ పాటికి మిమ్మల్ని ఉద్యోగం లోంచి తీసేసేవారు’ అంటూ అరుస్తుంది దేవయాని.

ఆ మాటలకు ఆ లెక్చరర్స్ ఒకరి మొఖం ఒకరు చూసుకుంటూ... దేవయాని తిడుతుంటే పడుతూ ఉంటారు. ‘రిషీ ఏంటో వీళ్లని నాతోనే తిట్టిస్తున్నాడు..’ అని మనసులో రగిలిపోతుంది దేవయాని. ‘వసుధారని తిట్టమని చెప్పింది ఈవిడే కదా.. మళ్లీ మనల్ని ఈవిడే తిడుతుంది ఏంటీ?’ అంటుంది ఒక లెక్చరర్ మరో ఆమెతో. ‘ఈ గొప్పోలంతా ఇంతేలా.. మన టైమ్ బ్యాడ్.. ఇప్పుడు మనమేం మాట్లాడలేం’ అంటుంది మరో లెక్చరర్. ‘ఏంటండీ నేను ఇన్ని మాటలు మాట్లాడుతున్నా మీరేం మాట్లాడటం లేదు? గుసగుసలు పెడుతున్నారేంటీ?’ అంటుంది దేవయాని కోపంగా.

‘ఏం లేదు మేడమ్.. జరిగింది ఏదో జరిగిపోయింది. మాది పొరపాటు అయ్యింది. ఈ సారికి క్షమించండి..’ అంటారు వాళ్లు. ‘రిషి వీళ్లని పిలిపించి అడగటం వల్ల ప్రయోజనం ఏముంది? మాటలు పడ్డ వసుధార ఇక్కడ లేదు కదా?’ అంటుంది జగతీ. ‘మేడమ్ వసుధార ఇక్కడ లేకపోవచ్చు.. తను పడిన బాధ నాకు గుర్తుంది. ఆ బాధను నేను కూడా భరించాను.. ఇలాంటివి ఇంకో స్టూడెంట్‌కి జరగొద్దు అనే వీళ్లని పిలిపించాను. డీబీఎస్‌డీ కాలేజ్‌కి ఒక గౌరవం ఉంది. ఏ ఆడపిల్లా వసుధారలా మాటలు పడకూడదు.. బాధపడకూడదు’ అంటాడు రిషి.

అంతా వింటున్న దేవయాని.. మనసులో.. ‘నేనే వీళ్లని పురమాయించాను.. నేనే మళ్లీ వీళ్లని మందలిస్తుంటే.. వీళ్లకి నా మీదున్న నమ్మకం పోతుంది.. రిషి తనకు తెలియకుండానే నా పరువు తీస్తున్నాడు’ అని తెగ రగిలిపోతుంది. ఇక పైకి మాత్రం.. ‘చూశారా.. మా రిషి గొప్పతనం.. తనంత గొప్పగా ఆలోచించేటప్పుడు మీరు కూడా దానికి తగ్గట్టుగా ఉండాలి కదా?’ అంటూ సైగ చేస్తుంది కాస్త సైలెంట్‌గా ఉండండి అంటూ. ‘ఇంకోసారి ఇలా చేయకండి’ అనేసి.. దేవయాని అరిచేస్తుంది. వెంటనే వాళ్లు.. ‘సారీ సార్.. ఈ సార్‌కి క్షమించండి’ అంటారు. ‘సరిసరే వెళ్లండి. ఇంకెప్పుడూ ఇలా చేయకండి’ అనేసి పంపిస్తుంది. అంతా చూస్తూ ఉన్న జగతి మనసులో.. ‘వసుధారని వాళ్లు అన్ని మాటలు అనలేదు.. వాళ్లకి అంత ధైర్యం లేదు.. ఆ ధైర్యం మీరే ఇచ్చారని నాకు తెలుసు అక్కయ్యా’ అనుకుంటుంది.

మొత్తానికీ నేటి కథనంలో.. రిషి దూరంగా వెళ్లిపోవాలని నిర్ణయించుకోవడం.. అదే విషయం అప్పటికే జగతీకి మెయిల్ చేయడం అనే అంశాలు ఆసక్తికరంగా మారాయి. రిషి.. అలాంటి పరిస్థితుల్లో కూడా వసు గురించి, వసు లాంటి ఆడపిల్లల గురించి ఆలోచిస్తున్నాడనే అతడి.. మంచితనాన్ని.. ఉన్నతమైన మనసుని తెలిపేందుకు పెట్టిన ఈ సీన్‌లో దేవయాని తిప్పలు భలే కామెడీగా అనిపిస్తాయి.