Guppedantha Manasu జనవరి 19 ఎపిసోడ్: మళ్లీ మొదటికే వచ్చిన మిస్టర్ ఇగో.. పాపం జగతి గుండెకు తూట్లు

గత ఎపిసోడ్‌లో.. మహేంద్రకు హార్ట్ ఎటాక్ రావడం.. హాస్పిటల్‌లో జాయిన్ చేయడం తెలిసిందే. అయితే రిషి గౌతమ్‌తో కలిసి వాలీబాల్ ఆడటంతో.. ఫోన్ రింగ్ వినిపించదు. దాంతో జగతి, వసు ఇద్దరూ కాల్ చేసినా రిషి లిఫ్ట్ చేయడు. దాంతో వసు గౌతమ్‌కి కాల్ చేస్తుంది. అప్పుడే గేమ్ ఆడి కూర్చున్న గౌతమ్‌కి రింగ్ వినిపించి.. వసు చేయడంతో లిఫ్ట్ చేసి విషయం తెలుసుకుంటాడు. రిషికి తెలిస్తే కంగారుపడతాడనే ఉద్దేశంతో చెప్పకుండానే రిషిని హాస్పిటల్‌కి తీసుకుని వెళ్తాడు.

351వ ఎపిసోడ్‌ హైలైట్స్..
తీరా రిషి హాస్పిటల్‌కి వెళ్లేసరికి.. వసు, జగతి ఏడుస్తూ ఉంటారు. ఏం అయ్యింది ఏం అయ్యింది అంటే.. మహేంద్ర సార్‌కి హార్ట్ ఎటాక్ వచ్చిందని చెబుతుంది వసు ఏడుస్తూ.. దాంతో రిషి పట్టుకోల్పోతాడు. కుమిలికుమిలి ఏడుస్తాడు. ఇక అప్పుడే మహేంద్రని డాక్టర్ మరో రూమ్‌లోకి మారుస్తూ.. ‘సరైన సమయానికి తీసుకొచ్చారు.. భయపడే పని లేదు.. కాసేపట్లో పేషెంట్‌కి మెలుకువ వస్తుంది’ అని చెబుతారు. ఇక అప్పుడే గౌతమ్ బాధగా.. ‘పాపం రిషి.. చిన్నప్పటి నుంచి వాళ్ల డాడీ అంటే వాడికి ప్రాణం.. వాళ్ల అమ్మ గురించి ఎప్పుడు అడిగినా చెప్పేవాడు కాదు.. కనీసం ఫొటో కూడా చూడలేదు నేను.. కానీ వాళ్ల డాడీనే వాడి లోకం..’ అంటూ వసు, జగతిలు వింటుండగానే తన మనసులో మాట షేర్ చేసుకుంటాడు. ఆ మాటలు వింటూ జగతి మరింత కుమిలిపోతుంది.

మహేంద్ర ఇంకా కళ్లు తెరవక ముందే.. రిషి, జగతి మహేంద్ర రూమ్‌కి వెళ్తారు. అక్కడ రిషి జగతితో కోపంగానే ‘ఏం జరిగింది?’ అని అడుగుతాడు. ‘ఎందుకో తెలీదు బాగా ఎక్కువగా నవ్వేశారు. నవ్వుతూ నవ్వుతూ ఇలా.. మహేంద్రకు ఇలా హార్ట్ ఎటాక్ వస్తుందని ఎప్పుడూ అనుకోలేదు.. అందరికీ దూరమై ఒంటరిగా మిగిలిన నాకు.. ఏకైక మిత్రుడు మహేంద్ర ఒక్కడే.. తనకు ఏమైనా జరిగితే ఈ జగతి మరుక్షణమే తుదిశ్వాస వదులుతుంది...’ అంటూ ఏడుస్తుంది జగతి. ‘డాడ్ ప్లీజ్ మీరు లేవండి.. నేను అందరిలా ఏడవలేను.. మీకు తెలుసా.. నాకు ఏడుపు రావట్లేదు డాడ్.. ప్లీజ్ లేవండి’ అనేసరికి మహేంద్రలో స్పందన వస్తుంది. కళ్లు తెరవగానే.. ‘భయపడ్డారా? మహేంద్ర పని అయిపోయింది అనుకున్నారా’ అంటూ నవ్వుతాడు మహేంద్ర. ఆ సీన్ చాలా ఎమోషనల్‌గా ఉంటుంది. అటు రిషి, ఇటు జగతి చాలా ఏడుస్తారు.

‘డాడ్ మీకు గుండెపోటు రావడం ఏంటి డాడ్.. ఎప్పుడూ నవ్వుతూ ఉండే మీకు ఏం సమస్య ఉందని ఇలా జరిగింది.. ఏం పెట్టుకున్నారు మనసులో’ అంటూ రిషి ఏడుస్తుంటే.. ‘మహేంద్రా నీకు ఏదైనా అయితే నేనేం కావాలి’ అంటూ జగతి ఏడుస్తుంది. అప్పుడే డాక్టర్ వచ్చి.. ‘మీరే అలా ఏడిస్తే పేషెంట్ పరిస్థితి ఏంటీ? నవ్వుతూ నవ్విస్తూ ఉండండి’ అంటూ వాళ్లని బయటకి పంపిస్తాడు.

కమింగ్ అప్‌లో..
మహేంద్ర బెడ్ దగ్గరకు వసు వస్తుంది. అప్పుడే ‘నువ్వు నాకు ఇచ్చిన మాట మరచిపోకు వసు.. జగతికి రిషిని గురు దక్షణగా ఇవ్వాలి’ అంటూ ఉంటాడు. వసు కన్నీళ్లతో వింటుంది. అప్పుడే బయట జగతి రిషితో.. ‘మహేంద్ర గురించి మీతో మాట్లాడాలి సార్.. భాగస్వామిలా తన జీవితంలో లేకపోయినా మహేంద్ర భాగస్వామిలా నేను మీతో మాట్లాడాలి’ అంటూ ధైర్యం చేసి రిషికి అడ్డుపడుతుంది. అయితే రిషి.. ‘మేడమ్ ప్లీజ్.. ఈ పరిస్థితిని దయచేసి మీకు అనుకూలంగా మార్చుకోకండి’ అంటూ జగతి మనసు ముక్కలు చేసేలా మాట్లాడేస్తాడు. మరిన్ని వివరాలు తరువాయి భాగంలో చూద్దాం! Guppedantha Manasu కొనసాగుతోంది.