Guppedantha Manasu డిసెంబర్ 29 ఎపిసోడ్: అందరికీ దూరంగా వెళ్లిపోతున్న వసు! గౌతమ్‌కి వార్నింగ్ ఇచ్చిన రిషి

గత ఎపిసోడ్‌లో గౌతమ్.. వసు రెస్టారెంట్‌కి వెళ్లి కాఫీ తాగుతూ వాట్సాప్ స్టేటస్ పెడతాడు. అది ఇంట్లో ఉండి చూసిన రిషి.. ‘గౌతమ్ కానీ వసుని ఇబ్బంది పెడుతున్నాడేమో’ అని భయంతో.. వెంటనే కారు వేసుకుని రెస్టారెంట్‌కి వచ్చేస్తాడు. ‘నువ్వు ఆటోలో వెళ్తే నేను నీతో ఆటోలో వస్తాను వసుధరా’ అంటూ వసుని ఇబ్బంది పడుతున్న గౌతమ్‌తో.. ‘నేను వస్తాను’ అంటూ రిషి ఎంట్రీ ఇవ్వడం ఆసక్తిగా మార్చింది.

329వ ఎపిసోడ్‌ హైలైట్స్..
రిషిని చూడగానే వసు హ్యాపీ ఫీల్ అవుతుంది. ‘అమ్మయ్యా గౌతమ్ సార్ నుంచి తప్పించుకోవడం నా వల్ల అయ్యేది కాదు.. రిషి సార్ భలే వచ్చారు టైమ్‌కి’ అనుకుంటూ సంతోషిస్తుంది. ఇక వసు కారు వెనుకే కూర్చుంటే.. గౌతమ్ రిషి పక్క సీట్‌లో కూర్చుంటాడు. అప్పుడు కూడా వసు గురించే ఆలోచిస్తాడు రిషి. ‘వసుధరని ఈ గౌతమ్ గాడు బాగానే ఇబ్బంది పెడుతున్నట్లున్నాడు.. గట్టిగా వార్నింగ్ ఇవ్వాలి’ అని నిర్ణయించుకుంటాడు. వసుని జగతి ఇంటి ముందు దింపి.. కారు స్టార్ట్ చేస్తాడు. దారిలో కారు ఆపి.. గౌతమ్‌ని కిందకు దిగమని చెప్పి.. ‘వసుధర విషయంలో నువ్వు కాస్త ఎక్కువ చేస్తున్నావ్‌రా.. తను చదువుకుంటోంది. చాలా తెలివైన అమ్మాయి.. తన జోలికి వెళ్లొద్దు.. తనని ఇబ్బంది పెట్టొద్దు..’ అంటూ గట్టిగానే వార్నింగ్ ఇస్తాడు. అయితే గౌతమ్ మాత్రం.. ‘నీ స్టూడెంట్ కాకముందే నాకు పరిచయం అయ్యింది.. విధి అనేది ఒకటుంటుంది. అదే మమ్మల్ని కలిపింది’ అంటూ చాలా చెప్పడానికి ప్రయత్నిస్తాడు కానీ.. మిస్టర్ ఇగో అవన్నీ వినడు కదా.. వినలేదు.

ఇక సీన్ కట్ చేస్తే.. వసు ఇంటికి రాగానే జగతితో.. ‘రిషి సార్ అలా.. రిషి సార్ ఇలా’ అంటూ మాట్లాడుతుంటే.. ‘వసు నీకు నచ్చినప్పుడు వస్తే దీన్ని ఇళ్లు అనరు.. నీకు ఆకలిగా ఉంటే.. వండుకుని తిను.. గుడ్ నైట్’ అని మాటలు అనేసి వెళ్లి తలుపు వేసుకుంటుంది. వసు కళ్లల్లో నీళ్లు తిరుగుతాయి జగతి ప్రవర్తనకు. జగతి కూడా తలుపు వేసుకుని బాధపడుతుంది. ఇక మరునాడు ఉదయాన్నే వసు మహేంద్రకు కాల్ చేసి.. ఏడుస్తూ జగతి ప్రవర్తన గురించి చెబుతుంది. ‘అమ్మా వసుధరా నేను చూసుకుంటాను.. నేను తెలుసుకుంటాను.. జగతికీ ఏం అయ్యిందో నేను తెలసుకుంటాను’ అంటూ నచ్చజెబుతాడు. అయితే రిషి కాస్త దూరం నుంచి మహేంద్ర మాటలు వింటాడు.

మరునాడు ఉదయాన్నే కాలేజ్‌కి బయలుదేరుతూ.. వసు జగతితో ‘ఎందుకు ఇలా ప్రవర్తిస్తున్నారు’ అని అడిగినట్లు.. ‘నువ్వు ఇల్లు వదిలి హాస్టల్‌కి వెళ్లు.. నిన్ను పంపించమని రిషినే నాతో చెప్పాడు’ అని జగతి వసుకి చెప్పినట్లు.. వసు ఆవేశంగా ‘రిషి సార్‌తోనే తేల్చుకుంటాను’ అంటూ వెళ్లినట్లుగా జగతి ఊహించుకుంటుంది. వసుకి నిజం చెబితే జరిగేది ఇదే అనుకుంటూ.. వసు నిజంగానే అడగడానికి ప్రయత్నిస్తుంటే.. ఏం మాట్లాడకుండా వెళ్లిపోతుంది.

కమింగ్ అప్‌లో వసు కాలేజ్‌లో మెట్ల మీద బాధగా కూర్చోవడం చూసి రిషి వచ్చి పక్కనే కూర్చుంటాడు. ‘ఏం అయ్యింది?’ అని అడితే.. జగతి మేడమ్ ప్రవర్తన మారిపోయిందని చెబుతూనే.. ‘మేడమ్ అలా మారడానికి ఎవరో ఏదో అన్నారు’ అంటుంది బాధగా. రిషి కాస్త కంగుతింటాడు. ‘మేడమ్‌కి ఇష్టం లేనప్పుడు నువ్వు ఏదైనా హాస్టల్‌కి వెళ్లొచ్చు కదా’ అని రిషి కూల్‌గా సలహా ఇస్తే.. వసు మాత్రం.. ‘నేను హాస్టల్‌కి వెళ్లలేను సార్.. దూరంగా వెళ్లిపోతాను. ఎక్కడికైనా దూరంగా వెళ్లిపోతాను’ అంటుంది వసు. రిషి షాక్ అవుతాడు. ఇక సీన్ కట్ చేస్తే జగతి ఇంట్లోంచి బ్యాగ్ తీసుకుని వసు బయటికి వచ్చేస్తున్నట్లు చూపించడంతో కథనం ఉత్కంఠగా మారిపోయింది. మరిన్ని వివరాలు తరువాయి భాగంలో చూద్దాం! Guppedantha Manasu కొనసాగుతోంది.