Karthika Deepam: మోనిత దెబ్బకు పరుగులు తీసిన సౌందర్య కుటుంబం.. ఫ్లాష్ బ్యాక్‌ కథకు వారధిగా వారణాసి

Karthika Deepam Today: కార్తీకదీపం సీరియల్‌ 1566 ఎపిసోడ్‌లోకి అడుగుపెట్టింది. గత ఎపిసోడ్‌లో దీప.. వారణాసి సాయంతో... మోనితని నడివీధిలో అవమానించే సీన్.. నేటి కథనంలో కూడా కంటిన్యూ అయ్యింది. ‘ఒకరిని ఒకరు తిట్టుకోవడం.. మాటలు అనుకోవడం కొనసాగుతుంటే.. మోనిత కోపంగా దీపని.. ‘ఎలాగో పోతున్నావ్.. ఇంతకాలం వెంటపడిన నాకే కార్తీక్‌ని ఇవ్వొచ్చు కదా? అంటుంది.

దాంతో దీప కోపంగా.. ‘డాక్టర్ బాబువైపు కన్నెత్తి కూడా చూడకుండా.. చక్కబెట్టుకుని మరీ పోతాను’ అంటుంది దీప. ‘అంటే కొంపదీసి ఇంకో పెళ్లి చేస్తున్నావా ఏంటీ? మూడు ముళ్లు వేసిన నిన్నే ముచ్చటగా మూడు రోజులు కూడా కాపురం చేసుకోనివ్వలేదు.. నన్ను కాకుండా మరొకరి ఇచ్చి పెళ్లి చేస్తే దాన్ని దేవుడి దగ్గరకు పంపిస్తా’ అంటుంది మోనిత. ‘చూద్దాం.. ఈ రోజు నడి వీధిలో కళ్లు తెరిచావ్ కదా.. మళ్లీ ఇలాంటి పిచ్చి ఆలోచన చేస్తే.. మళ్లీ నరకంలో కళ్లు తెరుస్తావ్.. పదా వారణాసి’ అంటూ దీప వెళ్లిపోతుంది.

ఇలాంటి ఆడదాన్నిఎక్కడా చూడలేదమ్మా.. ఇలాంటి వాళ్లని ఉరి తీసినా తప్పులేదు’ అంటూ నోటికి వచ్చినట్లు మాట్లాడతారు చుట్టు ఉన్న ఆడవాళ్లు. దాంతో మోనిత రగిలిపోతుంది. ‘దీపా నలుగురిలో నన్ను అవమానిస్తావా? నా కార్తీక్‌కి నన్ను పరాయి దాన్ని చేస్తావా? నిన్ను వదలనే.. ఆ దేవుడు తీసుకుని పోయేదాక.. ఆగుదాం అనుకున్నాను.. కానీ ఇప్పుడు నేనే నిన్ను పైకి పంపిచేస్తా.. నా చేతుల్లోనే నీ చావు..’ అని రగిలిపోతుంది మోనిత. ఇంటికి వెళ్లాకే కూడా.. అన్నీ పగలగొట్టేసి.. దీపా నిన్ను వదిలిపెట్టును అంటూ అరుస్తుంది.

ఇక సౌందర్య ఆలోచనలో పడుతుంది. ఇంతలో భాగ్యం వస్తుంది. అప్పుడే దీప, వారణాసి కూడా ఇంటికి వస్తారు. ఇంతలో సౌర్య... హిమ కోసం వెతుకుతూ హాల్లోకి వస్తుంది. అయితే భాగ్యం.. సౌర్యతో... ‘హిమ ఇందాకే బయటికి వెళ్లింది.. గేట్ దగ్గర తిరుగుతూ కనిపించింది. నా ఫోన్ తీసుకుని ఎవరికో ఫోన్ చేసి.. అడ్రెస్ తెలుసుకుని వెళ్లింది’ అంటుంది. షాక్ అవుతారు సౌందర్య వాళ్లు. వెంటనే సౌందర్య ఫోన్ అందుకున్న దీప.. పిన్నీ నీ ఫోన్ ఇవ్వు.. అంటూ.. భాగ్యం ఫోన్ నుంచి.. హిమ చేసిన నంబర్‌ని.. సౌందర్య ఫోన్‌లో కొట్టి చూస్తుంది. మోనిత అని పేరు రాగానే.. ‘హిమ మోనిత దగ్గరకు వెళ్లింది’ అని టెన్షన్ పడిపోతుంది హిమ. ఇక సౌందర్య, వారణాసి అంతా కంగారు పడుతుంటే.. సౌర్య కోపంగా.. ‘చూశారా.. ఆ మోనితని నమ్మొద్దని చాలాసార్లు.. చెప్పాను.. అసలు సమస్యలన్నీ ఆ హిమ వల్లే.. ఆ రోజు మీకు యాక్సిడెంట్ కావడానికి హిమే కారణం.. ఇప్పుడు కూడా హిమే కారణం అవుతోంది అంటూ రగిలిపోతూ ఉంటుంది.

ఇక కార్తీక్, సౌందర్య, దీపలు.. మోనిత ఇంటికి వెళ్లేసరికి.. టులెట్ బోర్డ్ పెట్టేసి.. తాళం వేసుకుని ఇంటి లోపలే ఉంటుంది మోనిత. హిమ కూడా తనతో ఉంటుంది. ‘ఆ మోనిత ఎన్ని ప్రయత్నాలు చేసినా తను అనుకున్నది జరగదు’ అంటూ కార్తీక్.. దీప వాళ్లతో అంటుంటే.. అంతా లోపల నుంచి వింటారు హిమ, మోనితలు. ‘చూశావా మీ డాడీకి మీ అమ్మ బతకడం ఇష్టం లేదు.. కావాలనే నేను అనుకున్నది జరగదు అంటున్నాడు.. సరే కానీ.. ఈ రోజంతా వాళ్లకు నువ్వు కనిపించకుండా ఉంటేనే.. నీ మాట నా మాట వాళ్లు వింటారు’ అని నచ్చజెబుతుంది. దాంతో హిమ సైలెంట్‌గా ఉంటుంది. మోనిత ఏం చెబితే అది నమ్ముతుంది.

ఇక మోనిత నుంచి దీపకు కాల్ వస్తుంది. ‘దీపా.. మర్యాదగా నీ కార్తీక్‌తో నాకు తాళి కట్టించు.. నీ బిడ్డని నీకు తిరిగి ఇస్తాను’ అంటుంది మోనిత. ఆ మాటల్ని సౌందర్య, భాగ్యం కూడా వింటారు. అందరికీ టెన్షన్ పడుతూ ఉంటారు. హిమ కారణంగానే ఈ టెన్షన్ అని.. తనంటే నాకు అహస్యం అని సౌర్య మళ్లీ అంటుంది. ఇక కాసేపటికి వారణాసి దీపకు కాల్ చేసి.. ‘నీ అనుమానం నిజమే అక్కా.. మోనిత తన ఇంటిలోనే ఉంది’ అని సమాచారం ఇస్తాడు.

మోనిత.. దీపని చంపెయ్యాలని నిర్ణయించుకోవడం.. హిమ దగ్గర డ్రామా ఆడి.. హిమని తన ఆధీనంలో ఉంచుకుని.. కార్తీక్‌తో పెళ్లి చెయ్యమని బ్లాక్ మెయిల్ చేయడం.. వారణాసి.. దీపకు సాయం చేయడం.. అంతా చూస్తుంటే.. మోనిత.. దీపని చంపడానికి ఏదొక ప్రయత్నం చేస్తుంది. దీపని కాపాడబోయే కార్తీక్ కూడా ప్రమాదంలో పడతాడు. ఆ సమయంలోనే వారణాసి వాళ్లని కాపాడి ఉంటాడు. వాళ్లు బతికి ఉన్న విషయం.. ఎవరికీ తెలియకుండా తనే చూసుకుని ఉంటాడు.

ఇక ఈ పరిస్థితి కూడా హిమ కారణంగా వచ్చింది కాబట్టి.. సౌర్య ఇంట్లోంచి వెళ్లిపోయినట్లు.. కొన్నేళ్ల తర్వాత జ్వాలగా వచ్చినట్లు కనెక్ట్ చేసే అవకాశం ఉంది. ఇక ఫ్లాష్ బ్యాక్ స్టోరీకి.. పెద్ద అయిన నాటి కథకి వారణాసినే వారధిగా ఉండబోతున్నాడని అర్థమైంది. మరిన్ని వివరాలు తరువాయి భాగంలో చూద్దాం! ‘కార్తీకదీపం’ karthika deepam కొనసాగుతోంది. (photo courtesy by star మా and disney+ hotstar)