Karthika Deepam ట్విస్ట్: పాపం అత్తాకోడళ్లు.. ఆ ఛాన్స్ మిస్ అయ్యారు! ఈసారి మోనితదే పైచేయి

బుల్లితెర ప్రేక్షకుల్ని ఎంతగానో ఆకట్టుకుంటున్న ‘కార్తీకదీపం’ సీరియల్.. నేడు(2021 జూన్ 17)న 1069 ఎపిసోడ్‌కి ఎంటర్ అయ్యింది. అయితే రేపటి ప్రోమోలో అదిరిపోయే ట్విస్ట్ ఉంది.

ప్రోమో హైలైట్స్..
దీప సౌందర్య ఓ పార్క్‌లో ఆగి మాట్లాడుకుంటూ ఉండగా.. మోనిత వాకింగ్‌కి ప్రియమణితో సహా వచ్చి.. దీపని, సౌందర్యని చూస్తూ.. పొగరుగా.. హేళనగా నవ్వుతూ.. ‘ఓ... కాలమా ఇది నీ జాలమా..’ అంటూ పాట పాడుతూ దగ్గరకి వస్తుంది. విలన్‌లా నవ్వుతూ.. ‘కాలం గాలి రెండూ ఇప్పుడు మోనితవైపే ఉన్నాయి..’ అంటుంది పొగరుగా. అయితే సౌందర్య కోపంగా.. చెయ్యి చూపిస్తూ.. ఆపు అన్నట్లు మోనితని ఆపుతుంది. మరి ఏం వార్నింగ్ ఇచ్చి పంపించారో? లేక మోనితే రివర్స్‌లో ఏ మాట్లాడిందో కానీ.. మోనిత వెళ్లగానే దీపతో సౌందర్య తన బాధను పంచుకుంటుంది.

‘ఎంతపని చేశాడే నా కొడుకు.. చేతులు కట్టిపడేశాడు..’ అని దీపతో సౌందర్య బాధపడుతుంది. ‘జాలేస్తుంది అత్తయ్యా..’ అంటుంది దీప. ‘అంటే వాడి మీద నీకు..’ అని సౌందర్య అనుమానంగా అనడంతో.. ‘నా మీద నాకు జాలేస్తుంది అత్తయ్యా..’ అని అంటుంది. వెంటనే సౌందర్య.. ‘నీకు అన్యాయం జరగనివ్వను.. నీకు ఏ కష్టం కలగనివ్వను..’ అని ధైర్యం చెబుతుంటే.. నిబ్బరంగా నిలబడిన దీప.. ‘అంటే నాకు జరిగిన నష్టానికి ఖరీదు ఎంతుంటుంది అత్తయ్యా..?’ అని అడిగేసరికి.. సౌందర్య నోట మాట రాదు. బాధగా ధీనంగా చూస్తూ ఉండిపోతుంది.

‘నాగార్జున గారు ఆ చెంపదెబ్బలకు మెచ్చుకున్నారు..’ అన్న దుకుడు డైలాగ్ మాదిరి.. మోనిత రావడం, అత్త ఓ దవడ వాయగొడితే.. కోడలు మరో దవడ వాయిగొట్టడం.. అనేది కార్తీకదీపం సీరియల్‌కి హైలైట్ సీన్స్‌గా నిలిచేవి. రెచ్చగొట్టిన ప్రతిసారి మోనిత చెంప పగిలేది. మోనితే వాళ్ల దగ్గరికి వచ్చినా.. వాళ్లే మోనిత దగ్గరికి వెళ్లినా.. మోనిత దవడపగలడం గ్యారెంటీ అన్నట్లు ఉండేవి సీన్స్. కనీసం అలా అయినా అభిమానులకు మోనితపై ఉండే ప్రెస్టేషన్‌ని తీర్చేవారు డైరెక్టర్. కానీ ఈసారి మోనితదే పై చేయిలా కనిపిస్తోంది. పైగా కడుపుతో ఉంది కాబట్టి కొట్టే సీన్స్ ఇక ఉండబోవు. మొత్తానికి ఈసారి ఆ అత్తాకోడళ్లతో మోనిత ఏం మాట్లాడింది అనేది ఆసక్తిగా మారింది.