Sudigali Sudheer: మూడు పూటలా తింటున్నామంటే దానికి కారణం ఆయనే: సుడిగాలి సుధీర్

తెలంగాణ సిరిసిల్ల జిల్లాలో బలగం ప్రీ రిలీజ్ ఈవెంట్ చాలా గ్రాండ్‌గా జరిగింది. ఈ ఫంక్షన్‌కు ఐటీ మంత్రి కేటీఆర్ ప్రత్యేక అతిథిగా హాజరయ్యారు. ఆయనతో పాటు డీజే టిల్లు హీరో సిద్ధూ, సుడిగాలి సుధీర్‌తో పాటు పలువురు నటులు సందడి చేశారు. ఇప్పటివరకు కమెడీయన్‌గా మాత్రమే తెలిసిన జబర్దస్త్ వేణు బలగం సినిమాతో డైరెక్టర్‌ అవతారమెత్తాడు. ఈ సందర్భంగా సుధీర్ మాట్లాడిన మాటలు వైరల్ అవుతున్నాయి.

"నేను అనేవాడిని ఇవాళ ఇలా ఉన్నాను.. ఈ స్టేజిలో ఉన్నాను అంటే దానికి కారణం ఫస్ట్ వేణు అన్న. ఇవాళ నేను, నా కుటుంబ సభ్యులు అందరూ హ్యాపీగా మూడు పూటలా తింటున్నాం అంటే ఫస్ట్ నాకు జబర్దస్త్‌లో ఛాన్స్ ఇచ్చి నన్ను ఆదుకుంది వేణు అన్న. జీవితాంతం రుణపడి ఉంటాను అన్నా నీకు. సో ఇప్పటిదాకా తెలుగు ప్రజలందరికీ ఒక మంచి యాక్టర్‌గా, కమెడీయన్‌గా అందరికీ తెలుసు. కానీ అలాంటి వ్యక్తి దగ్గర ఒక మంచి టాలెంట్ ఉందని గుర్తించి ఒక మంచి సినిమా తీయగలడని నమ్మి ఆయనకు అవకాశం ఇచ్చి దిల్ రాజు గారు మరోసారి దిల్ ఉన్న రాజుగారని ప్రూ చేసుకున్నారు. ఆయనకు అవకాశం ఇచ్చినందుకు చాలా ధన్యవాదాలు సర్."
- సుడిగాలి సుధీర్

జబర్దస్త్ అవకాశం

నిజానికి చిన్న చిన్న మ్యాజిక్ షోలు చేస్తూ అవకాశాల కోసం ఎదురుచూస్తున్న సుడిగాలి సుధీర్‌కు వేణు అండగా నిలిచాడు. సుధీర్‌తో పాటు గెటప్ శీనుకు జబర్దస్త్‌లో తన స్కిట్‌లో నటించే అవకాశం ఇచ్చాడు. టాలెంట్ ఉండటంతో ఇద్దరూ జబర్దస్త్‌లో బాగా నటించి మంచి పేరు తెచ్చుకున్నారు. ముఖ్యంగా సుధీర్ అయితే జబర్దస్త్‌తో పాటు పలు టీవీ షోలు, స్పెషల్ షోలతో పెద్ద స్టార్ అయిపోయాడు. కమెడియన్‌ మాత్రమే కాకుండా సుధీర్‌లో గొప్ప డ్యాన్సర్ కూడా ఉన్నాడు. ఢీ వంటి డ్యాన్స్ షోలలో కూడా సుధీర్ తన డ్యాన్స్, కామెడీతో సందడి చేశాడు.

తర్వాత పలు షోలను హోస్ట్ చేస్తూ అటు యాంకర్‌గా కూడా బిజీ అయిన సుధీర్.. ప్రస్తుతం హీరో కూడా అయిపోయాడు. ఇటీవలే గాలోడు అనే సినిమాతో ప్రేక్షకులను పలకరించాడు. ఈ సినిమా పర్వేలేదనిపించింది. ప్రస్తుతం టీవీ, ఓటీటీ షోలతో పాటు అటు సినిమాల్లో కూడా చేస్తూ బిజీబిజీగా ఉన్నాడు సుధీర్. అయితే తనకు మంచి పేరు తెచ్చిన జబర్దస్త్‌కు మాత్రం ఇటీవల సుధీర్ గుడ్‌బై చెప్పాడు. త్వరలోనే సుధీర్ మళ్లీ జబర్దస్త్‌కు రావాలని ఫ్యాన్స్ కోరుకుంటున్నారు.

• Read latest TV News and Movie Updates