Guppedantha Manasu ఆగష్టు 17: తల్లితో అనుబంధాన్ని బలపరుచుకుంటున్న రిషి.. జగతి సంబరం

గత ఎపిసోడ్‌లో సాక్షీ చేసిన రచ్చ అంతా ఇంతా కాదు. నాకు ఈ పెళ్లి వద్దు అని చెప్పడంతో పాటు.. ‘తల్లిని కాదు అన్నావంటే.. ఆంటీదే తప్పు అనుకున్నాను.. వసుధార నిన్ను ఎందుకు కాదు అనుకుందో పిచ్చిది అనుకున్నాను.. కానీ ఇప్పుడు తెలిసింది.. నిన్ను ఎందుకు కాదు అనుకుందో.. నీకు ప్రేమించడం రాదు..’ అంటూ నిశ్చితార్థం కాదు అనుకుని వెళ్లిపోతుంది. వెళ్లేటప్పుడు మాత్రం.. ‘నిన్ను ఊరికే వదిలిపెట్టను రిషి.. పగ తీర్చుకుంటాను.. నాకు దక్కని నువ్వు మరెవరికీ దక్కడానికి వీల్లేదు అని మనసులో అనుకుంటూ వెళ్తుంది. ఈ క్రమంలోనే జగతి విషయంలో రిషి ఆలోచనలో పడినట్లే కనిపిస్తుంది.

528 ఎపిసోడ్‌ హైలైట్స్..
దేవయాని రగిలిపోతూ ఉంటుంది. సాక్షీని తిట్టుకుంటూ ఉంటుంది. రిషి చేయి జారిపోతున్నాడు అని అల్లాడిపోతూ ఉంటుంది. జగతి, మహేంద్ర, గౌతమ్, ధరణీలు మాత్రం చాలా హ్యాపీగా ఉంటారు. సంబరాలు జరుపుకోవాలని ఆశపడతారు. స్వీట్స్ చేయమని గౌతమ్.. ధరణీని అడిగితే అది విన్న దేవయాని రచ్చ రచ్చ చేస్తుంది. ‘శుభకార్యం ఆగిపోతే.. స్వీట్స్ కావాలా’ అంటూ తిడుతుంది. దాంతో గౌతమ్ కూల్‌గా.. ‘పెద్దమ్మా పెళ్లి ఆగినందుకు అందరికంటే ఎక్కువగా మీరే సంతోషించాలి కదా? సాక్షీ మిమ్మల్ని ఎంతగా అవమానించింది.. మరిచిపోయారా’ అంటూ చురకలు వేయడంతో.. తేలు కుట్టిన దొంగలా సైలెంట్ అవుతుంది.

మొత్తానికీ వసు వి అనే ఉంగరాన్ని తనతోనే ఉంచుకుంటుంది. దాన్ని చూసుకుంటూనే.. ‘రిషి సార్ మనసు నాకు పూర్తిగా అర్థమైంది’ అనుకుంటూ ఉంటుంది ఆటోలో వెళ్తూ. ఇంతలో రిషి కాల్ చేసి.. ‘ఆటో దిగమంటాడు. మారు మాట్లాడకుండా ‘దిగుతావా దిగవా?’ అనేస్తాడు. దాంతో వసు ఆటో దిగుతుంది. కారు వసు ముందు ఆగుతుంది. ‘ఎక్కు అంటాడు రిషి. వసు ఎక్కుతుంది.

ఎప్పటిలానే ఏకాంతంగా వసుతో రిషి ‘ఈ విషయంలో ఏదైనా నన్ను ప్రశ్నించాలా వసుధారా.. నీ పేరు వాడుకున్నాను.. సాక్షీ విషయంలో నేను ఏది కావాలని చెయ్యలేదు.. నువ్వు ఏమైనా అనుకుంటున్నావా అంటాడు. ‘మీకు నా పేరు ఉపయోగపడిందంటే చాలా సంతోషం సార్’ అంటుంది వసు. ఇక కాసేపు కూల్‌గా మాట్లాడుకుని.. రెస్టారెంట్‌కి బయలుదేరతారు ఇద్దరు. తీరా అక్కడ మహేంద్ర, గౌతమ్, జగతీలు పెళ్లి ఆగినందుకు సెలబ్రేషన్ చేసుకోవాలని కేక్ ఆర్డర్ ఇవ్వబోతుంటే.. వసు, రిషి కలిసి రావడం చూసి షాక్ అవుతారు.

కమింగ్ అప్‌లో..
జగతి కిచెన్‌లో ఏదో పని చేసుకుంటూ ఉంటుంది. రిషి వాటర్ బాటిల్ తీసుకొచ్చి అక్కడ పెట్టి.. జగతిని ధరణీ అనుకుని.. ‘వదినా కాఫీ’ అంటాడు రిషి. అది విన్న జగతి.. వెనక్కి తిరిగి.. కాఫీ.. ఇమ్మంటారా సార్’ అంటుంది జగతి కాస్త తటపటాయిస్తూ.

వెంటనే రిషి.. ‘మేడమ్ చిన్న రిక్వస్ట్..’ అంటాడు. ‘చెప్పండి సార్’ అంటుంది జగతి కాస్త భయపడుతూనే. ‘మేడమ్ మీరు నన్ను రిషి సార్ అని పిలవకండి.. మీరు నన్ను ఇక నుంచి రిషి అనే పిలవండి..’ అంటాడు. ఇక జగతి ఆనందానికి అవథులే ఉండవు. కళ్లనిండా నీళ్లతో మురిసిపోతుంది. అప్పుడే జగతి వైపు తిరిగి ‘కాఫీ..’ అంటాడు రిషి. ‘ఇస్తాను రిషీ’ అంటుంది చాలా ఎమోషనల్‌గా కళ్లు తుచుకుంటూ. వెనుక బ్యాగ్రౌండ్‌లో కేజీఎఫ్ అమ్మ సాంగ్ ప్లే అవుతుంటే.. ఆ సీన్ చాలా ఆసక్తిగా మారింది. మరిన్ని వివరాలు తరువాయి భాగంలో చూద్దాం! Guppedantha Manasu కొనసాగుతోంది.