Guppedantha Manasu సెప్టెంబర్ 7 ఎపిసోడ్: వసుతో రిషి సరసాలు.. సార్‌లో ఈ యాంగిల్ కూడా ఉందా?

జగతి, మహేంద్రలు రాబోతున్న తమ పెళ్లి రోజు గురించి మాట్లాడుకుంటూ ఉంటే.. గౌతమ్ వింటాడు. ముందుగానే శుభాకాంక్షలు చెప్పడంతో అది కాస్తా దేవయాని వినేస్తుంది. వెంటనే వసుని కలిసి.. ‘నేను చాలా మారాను.. జగతీ, మహేంద్రల పెళ్లిరోజు ఇంట్లోనే చెయ్యాలి అనుకుంటున్నాను. ఇదే విషయం రిషికి చెప్పి నువ్వే ఒప్పించు’ అంటాడు.

549 ఎపిసోడ్‌ హైలైట్స్..
దేవయాని చెప్పేదంతా వసు కూల్‌గా వింటుంది. ‘వసుధారా సాక్షీ ఘటన జరిగిన తర్వాత నేను చాలా మారాను. రిషికి నేనే చెప్పొచ్చు. కానీ రిషీ కళ్లల్లోకి సూటిగా చూడలేకపోతున్నాను. పైగా జగతీ, మహేంద్రలకు నేను చెప్పి చేయించాను అనేది అంతగా ఆనందాన్ని ఇవ్వదు. రిషి తనంతట తాను చేస్తేనే సంతోషిస్తారు కదా.. అది కూడా నువ్వు ఆలోచించు. ఎలాగైనా రిషిని నువ్వే ఒప్పించాలి. నువ్వు తనకి చాలా ఆప్తురాలివి అని తెలిసే ఇలా వచ్చాను’ అంటూ కూల్‌గా ఉచ్చులోకి లాగేస్తుంది. మనసులో మాత్రం.. ‘ఈ విషయంతోనే మీ మధ్య నిప్పు రాజేసుకుంటే చాలు.. నేను పెద్దది చేసేస్తాను.. రిషికి జగతీ అంటే పడదు కాబట్టి.. పెళ్లి రోజు చేయడానికి ఒప్పుకోడు. దీని కారణంగా మీధ్య గొడవ మొదలవుతుంది’ అని సంబరపడుతుంది. అయితే రిషి.. వసుని కలవడానికి అప్పుడే వచ్చి.. దేవయానిని చూసి షాక్ అవుతాడు.

‘పెద్దమ్మా మీరేంటి ఇక్కడా?’ అంటాడు. ఊరికే నాన్నా పని ఉండి ఇటువైపు వచ్చాను.. వసుధారని చూసి పోదామని వచ్చాను’ అంటుంది అబద్దం చెప్పేస్తుంది. ఇక దాంతో రిషి.. ‘వసుధారా పెద్దమ్మకు నాకు కాఫీ తీసుకుని వస్తావా.?’ అంటూ కూర్చని దేవయానితో కలిసి కాఫీ తాగుతాడు రిషి. మరోవైపు చీకటిపడిన తర్వాత రిషి, వసులు ఒక చోట కలుస్తారు. ‘వసుధారా.. ఏంటి రమ్మన్నావ్’ అంటాడు రిషి. ‘సార్ నేనెక్కడ రమ్మన్నాను.? మీరే కదా లొకేషన్ పంపించి రమ్మన్నారని గౌతమ్ సార్ చెప్పారు’ అంటుంది వసు. ‘నాకు వాడే చెప్పాడు. ఈ లొకేషన్ కూడా వాడే పంపిచాడు’ అంటాడు గౌతమ్. ఇంతలో గౌతమ్ రిషికి మెసేజ్ పంపిస్తాడు. ‘రేయ్ రిషీ.. రైట్ సైడ్ చూడరా.. మీకోసమే ఈ ఏర్పాట్లు.. వెళ్లి తింటూ ఎంజాయ్ చేయండి’ అని మెసేజ్ చేస్తాడు.

అది చూసిన రిషి.. వసుని తీసుకుని ఆ లైటింగ్‌తో డెకరేట్ చేసిన.. డిన్నర్ స్పాట్‌కి వెళ్తాడు. ఆ సమయంలో వసు చాలా సంతోషిస్తుంది. ఇద్దరూ కూర్చుంటారు. ఎన్నో కబుర్లు చెప్పుకుంటారు. అప్పుడే రిషి.. ‘వసుధార చాలా సార్లు నీతో చెప్పాలి అనుకున్న మాట ఒకటుంది. అదేంటంటే.. నువ్వు రోజు రోజుకీ చాలా అందంగా కనిపిస్తావ్’ అంటాడు. వసు మురిసిపోతుంది. ఇక తినడం స్టార్ట్ చేస్తాడు. ఆ సమయంలోనే రిషీ స్పూన్ కిందపడిపోతుంది. ‘సార్ అది వదిలేయండి.. ఇది తీసుకోండి’ అంటుంది టేబుల్ మీదున్న మరో స్పూన్ అందిస్తూ. అయితే రిషి.. వసు తింటున్న స్పూన్ లాక్కుని కొంటెగా చూస్తూ వసు ఎంగిలి చేసిన స్పూన్‌తో తింటాడు. వసుకి తెలియని గుబులు మొదలవుతుంది.

వెంటనే వసు చిన్నగా.. ‘అబ్బో ఈ మిస్టర్ పర్ఫెక్ట్‌కి సరసాలు కూడా తెలుసా’ అనుకుంటుంది నవ్వుతూ. ‘ఏంటి అన్నావ్’ అంటాడు రిషి. వసు ఏం లేదు సార్ అని నవ్వుతుంది. ఇక మిస్టర్ ఇగో.. తినడం అయ్యాక తనే ప్లేట్స్ తీస్తాడు. తర్వాత గౌతమ్.. ‘రేయ్ తినడం అయ్యాక అక్కడే గ్రీన్ టీ ఉంది తాగుతూ మాట్లాడుకోండి’ అని మెసేజ్ చేస్తాడు. ‘వీడు ఎక్కడి నుంచో మనల్ని చూస్తున్నట్లు ఉన్నాడు వసుధార’ అంటూ గ్రీన్ టీ దగ్గరకు తీసుకుని వెళ్తాడు రిషి. ఆ రొమాంటిక్ సీన్ చాలా ఆకట్టుకుంది. మరిన్ని వివరాలు తరువాయి భాగంలో చూద్దాం! Guppedantha Manasu కొనసాగుతోంది.