బెన్‌స్టోక్స్ కంటే.. బెంగళూరు బౌలర్‌పైనే ఒత్తిడి

ఐపీఎల్ ద్వారా ఇంగ్లాండ్ క్రికెటర్లు బెన్‌స్టోక్స్, టైమన్ మిల్స్ కోట్లకి పడగలెత్తారు. ఈ ఏడాది ఫిబ్రవరిలో జరిగిన వేలంలో ఆల్‌రౌండర్‌ బెన్‌స్టోక్స్‌ని రైజింగ్ పుణె సూపర్ జైయింట్స్ రూ.14.5 కోట్లకి దక్కించుకోగా.. బౌలర్ మిల్స్‌ని రాయల్ ఛాలెంజర్స్ బెంగళూరు జట్టు రూ.12 కోట్లకి సొంతం చేసుకుంది. ఈ ఇద్దరు క్రికెటర్లు కెరీర్‌లో తొలిసారి ఐపీఎల్ ఆడబోతున్నారు. ఈ నేపథ్యంలో ఇంగ్లాండ్ మాజీ కెప్టెన్ పీటర్సన్ మాట్లాడుతూ బెన్‌స్టోక్స్‌తో పోలిస్తే యువ బౌలర్ మిల్స్‌పైనే తాజా ఐపీఎల్‌లో ఎక్కువ ఒత్తిడి ఉండనుందని అభిప్రాయపడ్డాడు. బుధవారం సన్‌రైజర్స్ హైదరాబాద్‌తో జరిగిన తొలి మ్యాచ్‌లోనే మిల్స్‌ పేలవ ప్రదర్శనతో నిరాశపరిచాడు. ఈ మ్యాచ్‌లో 4 ఓవర్లు బౌలింగ్ చేసిన మిల్స్ 31 పరుగులిచ్చి ఒక వికెట్ మాత్రమే పడగొట్టాడు.

‘ఇంగ్లాండ్ జట్టులో బెన్‌స్టోక్స్ ఇప్పటికే సుస్థిర స్థానం సంపాదించాడు. మరోవైపు మిల్స్ ఇంకా నేర్చుకునే దశలో ఉన్నాడు. ఈ ఇద్దరు క్రికెటర్లు ఐపీఎల్ ద్వారా పెద్ద మొత్తంలో డబ్బు అందుకోగలిగారు. స్టోక్స్ పరిస్థితి ఎలా ఉన్నా.. మిల్స్‌కి మాత్రం ఇది ఊహించని అదృష్టమనే చెప్పాలి. ఎందుకంటే ఇంగ్లాండ్ బోర్డు కాంట్రాక్ట్‌‌లో మిల్స్ చాలా తక్కువ గ్రేడ్‌లో ఉన్నాడు. కాబట్టి ఈ ఐపీఎల్‌లో అతను తప్పకుండా మెరుగైన ప్రదర్శన ఇవ్వాలి. లేకపోతే ఇంగ్లాండ్ జట్టులో స్థానం కోసం అతను చాలా కష్టపడాల్సి ఉంటుంది’ అని పీటర్సన్ వివరించాడు. బెన్‌స్టోక్స్ ఇంగ్లాండ్ తరఫున అన్ని ఫార్మాట్లలో ఆడుతుండగా.. మిల్స్ మాత్రం ఇప్పటి వరకు రెండు టీ20 మ్యాచ్‌లు మాత్రమే ఆడటం విశేషం. ఈ రోజు రాత్రి ముంబయి ఇండియన్స్‌తో జరగనున్న మ్యాచ్‌లో రైజింగ్ పుణె తరఫున బెన్‌స్టోక్స్ తన తొలి ఐపీఎల్ మ్యాచ్ ఆడనున్నాడు.