ధోనీ మళ్లీ మ్యాజిక్.. కళ్లుచెదిరే రనౌట్

ఐపీఎల్ పదో సీజన్‌లో రైజింగ్ పుణె సూపర్ జెయింట్ మాజీ కెప్టెన్ మహేంద్రసింగ్ ధోని వికెట్ కీపింగ్‌తో అభిమానుల్ని మంత్రముగ్ధుల్ని చేస్తున్నాడు. ఇప్పటికే క్షణాల వ్యవధిలో ఏబీ డివిలియర్స్‌ని స్టంపౌట్ చేసి మురిపించిన ధోనీ.. తాజాగా ఓ రనౌట్‌తో మళ్లీ తన ప్రత్యేకతను చాటుకున్నాడు. కోల్‌కతా నైట్‌రైడర్స్‌తో జరిగిన మ్యాచ్‌‌లో కెప్టెన్ గౌతమ్ గంభీర్ పైన్‌లెగ్ దిశగా బంతిని తరలించి సింగిల్ కోసం ప్రయత్నించాడు. నాన్‌స్ట్రైకర్ ఎండ్‌లో ఉన్న మరో ఓపెనర్ నరైన్ వేగంగా క్రీజులోకి వచ్చేందుకు ప్రయత్నించినా.. ధోనీ మ్యాజికల్ కీపింగ్‌తో అతను రనౌటవక తప్పలేదు.


ఫైన్‌లెగ్‌ దిశగా వెళ్లిన బంతిని ఫీల్డర్ శర్ధూల్ ఠాకూర్ వేగంగా కీపర్ ధోనీకి చేతికి అందించగా.. వూహకందని రీతిలో ధోని వికెట్లపైకి విసిరి రనౌట్ చేశాడు. బంతి చేతికి రాకముందే రనౌట్‌కు సిద్ధమైన ధోని.. దానికి తగినట్లుగా ఫుట్‌వర్క్‌ని మార్చుకున్నట్లు రిప్లైలో కనిపిస్తోంది. ఈ మ్యాచ్‌లో 183 పరుగుల లక్ష్య ఛేదనకు దిగిన కోల్‌కతా 11 బంతులు మిగిలి ఉండగానే 184/3తో విజయాన్ని అందుకుంది. ఉతప్ప, గంభీర్ అర్ధశతకాలతో కోల్‌కతాని గెలిపించారు.