పుణె విజయంలో ‘ఒకే ఒక్కడు’..!

ఐపీఎల్ పదో సీజన్‌లో ఉత్కంఠకి తెరదించుతూ రైజింగ్ పుణె సూపర్ జెయింట్ ప్లేఆఫ్ చేరింది. కింగ్స్ ఎలెవన్ పంజాబ్‌తో ఆదివారం జరిగిన మ్యాచ్‌లో ఆ జట్టు 9 వికెట్ల తేడాతో అలవోక విజయాన్ని అందుకుంది. పుణె బౌలర్ జయదేవ్ ఉనద్కత్ బౌలింగ్‌తో పాటు.. కళ్లు చెదిరే ఫీల్డింగ్‌ చేయడంతో తొలుత బ్యాటింగ్ చేసిన పంజాబ్ జట్టు 15.5 ఓవర్లలోనే 73 పరుగులకు కుప్పకూలిపోయింది. ఇన్నింగ్స్ తొలి బంతికే ప్రమాదకర ఓపెనర్‌ మార్టిన్ గప్తిల్‌ని ఔట్ చేసి పంజాబ్‌ని ఒత్తిడిలోకి నెట్టిన ఉనద్కత్.. అనంతరం మెరుపు ఫీల్డింగ్‌తో ఇయాన్ మోర్గాన్ రనౌట్ చేశాడు.


నిలకడగా ఆడేందుకు ప్రయత్నిస్తున్న తెవాటియా ఇచ్చిన క్యాచ్‌ని కళ్లు చెదిరే రీతిలో డైవ్ చేస్తూ అందుకోవడమే కాకుండా.. చివర్లో స్వప్నిల్ సింగ్ వికెట్ తీసి పంజాబ్ తక్కువ స్కోరుకే పరిమితమయ్యేలా చేశాడు. పుణె విజయంలో కీలక పాత్ర పోషించిన ఉనద్కత్ ‘మ్యాన్ ఆఫ్ ద మ్యాచ్‌గా’ ఎంపికయ్యాడు.