Coconut Shells on Amazon: కొబ్బరిచిప్పకు అంత రేటా.. కలెక్టర్ ఆశ్చర్యం!

సాధారణంగా కొబ్బరికాయ ధర ప్రాంతాన్ని బట్టి రూ.20 నుంచి రూ.30 ఉంటుంది. కొన్ని దేవస్థానాల్లో అయితే రూ.50 మేరకు వసూలు చేస్తుంటారు. అయితే టెంకాయ పగలగొట్టిన తర్వాత మిగిలే ఖాళీ చిప్పను పారవేస్తుంటాం. కానీ ఆ ఖాళీ చిప్పలకు కూడా వేల రూపాయల ధర ఉంటుందని తెలుసుకున్న ఐపీఎస్ అధికారిణి, మహబూబ్ నగర్ జిల్లా కలెక్టర్ రెమా రాజేశ్వరి ఆశ్చర్యపోయారు. నిజంగా అంత ధర ఉంటుందా అని సోషల్ మీడియాలో ట్వీట్ చేశారు. ప్రస్తుతం ఈ ట్వీట్ హాట్ టాపిక్ అయింది.

అమెజాన్ ఆన్‌లైన్ స్టోర్ వెబ్‌సైట్‌లో ఓ చిప్ప ఖరీదు రూ.3000 ఉంది. అయితే 55 శాతం డిస్కౌంట్ తర్వాత కేవలం రూ.1365 కే విక్రయిస్తున్నట్లు అమెజాన్ పోర్టల్‌లో ఉంచారు. అది ప్రత్యేకమైన కొబ్బరి చిప్ప అని మాత్రం అనుకోవద్దు. ఒకటిన్నర అంగుళాల ఎత్తు, నాలుగున్నర అంగుళాల వెడల్పు ఉన్నట్లు దాని ఫీచర్లు వెబ్‌సైట్‌లో పేర్కొన్నారు.

దాదాపు 50 నుంచి 80 మిల్లీ లీటర్లు పట్టే అవకాశం ఉంది. తనకు వేరే గ్రూపు నుంచి ఈ మెస్సేజ్ వచ్చిందని, సగం కొబ్బరిచిప్ప అంత ఖరీదా అని ఆమె ఆశ్చర్యపోయినట్లు కొందరి ప్రశ్నలకు బదులిచ్చారు. ప్రస్తుతం కొబ్బరి చిప్పలను పలు రకాల పనులకు వినియోగిస్తున్నారని కొందరు నెటిజన్లు ట్వీట్లు చేస్తున్నారు. ఆశ్చర్యపోయేదేం లేదని, కస్టమర్లు కొంటున్నందుకే అమెజాన్ అంత ధరకు విక్రయాలు చేపట్టిందని అభిప్రాయపడుతున్నారు.