Mad Honey : ఆ తేనె పిచ్చెక్కిస్తుంది .. లైంగిక సమస్యలకు చెక్ పెడుతుంది

Mad Honey : ఓ తెలుగు సినిమాలో నటుడు బ్రహ్మానందం.. భ్రాంతుల (hallucinations) గురించి పదే పదే చెబుతుంటారు. ఏ స్టేజ్ లో ఎలా అనిపిస్తూ ఉంటుందో కామెడీగా వివరిస్తారు. అలాంటి భ్రాంతులు నిజంగానే కలిగించే తేనె ఒకటి ఉంది. దాన్ని సరదాగా పిచ్చి తేనె (Mad Honey) అంటారు. దీన్నే హిమాలయన్ తేనె అని కూడా పిలుస్తున్నారు. సాధారణంగా తేనె తియ్యగా.. నోట్లో పెట్టుకోగానే కరిగిపోతూ ఉంటుంది కదా... పాపం తేనెటీగలు కష్టపడి పోగేసుకున్న తేనెను మనం తాగేస్తున్నాం. వేల ఏళ్లుగా అవి మనకు తేనెను ఇస్తూ.. మన ఆరోగ్యాన్ని కాపాడుతున్నాయి. సహజమైన తేనె ఎప్పటికీ పాడవదు అంటారు. ఐతే... పిచ్చి తేనె పూర్తి భిన్నమైనది. భ్రమలు (psychedelic) కలిగించగలదు. రెండు చెంచాలు తాగితే చాలు.. కళ్లు తిరుగుతాయి. మత్తు వచ్చేస్తుంది. తల తిరుగుతుంది. పరిస్థితి ఇస్మార్ట్ శంకర్ లా అయిపోతుంది. ఐతే... ఈ తేనె ఎంతో ఆనందం ఇస్తుంది. ఆ మత్తు స్వర్గంలో ఉన్న ఫీల్ కలిగిస్తుంది. బాగుంది కదా అని మరింత తాగితే... తేడా కొడుతుంది. వాంతులవుతాయి. మూర్ఛ (seizures) వస్తుంది. అరుదైన సందర్భాల్లో మరణమూ వస్తుంది.

చాలా ఖరీదైనది :
అరుదైనవి ఖరీదుగానే ఉంటాయి కదా. ఈ తేనె కూడా అంతే. ధర ఎప్పుడూ కొండపైనే ఉంటుంది. ఇది ప్రధానంగా నేపాల్‌ (Nepal)లో లభిస్తుంది. అక్కడి ప్రజలు దీన్ని ఔషధం (Medicine) గా వాడుకుంటున్నారు. దీని రుచి చేదుగా ఉంటుంది. మొదటిసారి తాగేవాళ్లకు గొంతులో ఇర్రిటేషన్ తప్పదు. 2018లో జరిపిన అధ్యయనం ప్రకారం.. ఈ తేనెను క్రీస్తుపూర్వం 2,100 సంవత్సరాల నుంచి వాడుతున్నారు.

ఎందుకీ భ్రమ?
"సాధారణ తేనెలో లేని గ్రాయానోటాక్సిన్స్ (grayanotoxins) అనేది ఈ తేనెలో ఉంది. అదే మత్తు లేదా విషం లా మనపై పనిచేస్తుంది" అని అధ్యయనం చేసిన వాళ్లు చెప్పారు. నేపాల్ లో తేనెటీగలు.. జస్ట్ తేనె మాత్రమే కాకుండా... పువ్వుల పుప్పొడి నుంచి గ్రాయానోటాక్సిన్స్‌ ని కూడా తేనెటీగలు సేకరిస్తున్నాయి. వాటికి తెలియకుండానే దీన్ని సేకరిస్తున్నాయి. అవి తేనె పోగేస్తున్నామని అనుకుంటూ... విషాన్ని కూడా అందులో చేర్చుతున్నాయన్నమాట.

వైద్యంలో దేనికి వాడతారు?
లైంగిక కోరికలు తక్కువగా ఉండి.. సంతాన సమస్యల్ని ఎదుర్కొనేవారికి (aphrodisiac - sexual stimulant) డాక్టర్లు ఈ తేనెను ఉపయోగిస్తున్నారు. అందువల్ల దీన్ని వాడాలనుకునేవారు.. డాక్టర్ల సూచనలతోనే వాడటం మేలు. అలాగే ఈ తేనెను... పొట్టలో అల్సర్లు, గ్యాస్ సమస్యలు, అజీర్తి సమస్యలు ఉన్న వారికి వాడుతున్నారు. హైబీపీ సమస్య ఉన్న వారికి దీన్ని దీర్ఘకాలం పాటూ వాడుతున్నారు.

తెగ కొంటున్న ప్రజలు :ఈ తేనె అంగస్తంభన సమస్యకు చెక్ పెట్టి, కామ కోరికల్ని బాగా పెంచుతుందని తెలియడంతో.. నేపాల్ తోపాటూ... చాలా దేశాల ప్రజలు దీన్ని బాగా కొంటున్నారు. ముఖ్యంగా మధ్య వయస్కులు ఎక్కువగా వాడుతున్నారు. ఈ తేనెను టర్కీలోని బ్లాక్ సీ ప్రాంతంలో కూడా ఉత్పత్తి చేస్తున్నారు. కానీ నేపాల్ తేనె బాగా ఫేమస్ అయ్యింది. దీని ధర చెప్పలేదు కదూ... 200 గ్రాముల బాటిల్ ధర రూ.4,700 దాకా ఉంది.