ఆరేళ్లుగా అది మామూలు రాయి.. ఇప్పుడు బంగారం కంటే విలువైనది!

మనకు ఎప్పుడైనా అరుదైన రాళ్లు కనిపిస్తే ఏం చేస్తాం... ఓసారి తీసి పరిశీలనగా చూస్తాం... నచ్చితే మనతో తీసుకెళ్తాం... అవసరం లేదనుకుంటే వదిలేస్తాం... ఐతే... 2015లో డేవిడ్ హోల్ (David Hole) అనే వ్యక్తికి... ఆస్ట్రేలియా (Australia)లోని గనుల దగ్గర పనిచేస్తున్నప్పుడు ఓ రాయి కనిపించింది. అది చిన్నదేమీ కాదు... 17 కేజీల బరువు ఉంది. ఆ రాయిని చూశాక... అతను పనిపై శ్రద్ధ పెట్టలేకపోయాడు... అది అతనికి నచ్చింది... ఎందుకంటే... ఆ రాయిలో అక్కడక్కడా పసుపు రంగు కనిపిస్తోంది. అందువల్ల ఆ రాయిలో బంగారం ఉండి ఉంటుంది అనుకున్నాడు. తన షిఫ్ట్ అయిపోగానే... దాన్ని ఇంటికి షిఫ్ట్ చేశాడు. ఈ విషయం ఎవరికీ చెప్పలేదు.

రోజూ ఆ రాయిని చూడటం మురిసిపోవడం... అందులో ఉన్న బంగారాన్ని ఏం చేసుకోవాలి అని కలలు కనడం... ఇదంతా అతని ఊహాలోకం అయ్యింది. ఓ రోజు రాయిని గీసి చూశాడు. ఏ బంగారమూ రాలేదు.... ఓసారి పగలగొట్టేందుకు ప్రయత్నించాడు... కానీ మనసు ఒప్పలేదు... మరోసారి మళ్లీ ప్రయత్నించాడు. ఈసారి మనసు రాయి చేసుకొని రాయిని పగలగొట్టాలని చూశాడు. కానీ అది పగలలేదు. ఎంత ప్రయత్నించినా వృథా అయ్యింది.

తాను ఎప్పుడూ ఇలాంటి రాయిని చూడలేదు... ఇది ఎందుకు పగలట్లేదో ఏమో అనుకున్నాడు. ఇలా రోజులు కాస్తా... నెలలు... సంవత్సరాలూ కరిగిపోయి... ఆరేళ్లైంది. ఇంట్లోవాళ్లు... ఆ రాయిని అలా ఎన్నాళ్లు దాయాలని డిస్కషన్ పెట్టారు. అతనికి కూడా విషయం తేలిపోవాలి అనిపించింది. అందులో బంగారం ఉందో లేదో తెలియాల్సిందే అనుకున్నాడు. అందుకోసం... తాజాగా మెల్బోర్న్‌లోని మ్యూజియంకి దాన్ని తీసుకెళ్లాడు. దాని సంగతేంటో చెప్పమన్నాడు.

మ్యూజియంలో భూగర్భ నిపుణుడైన డెర్మోట్ హెన్రీ (Dermot Henry)... ఆ రాయిని పరిశీలించి... ఆశ్చర్యపోయాడు. దాన్ని తెచ్చిన డేవిడ్ వైపు చూస్తూ... మీరు ఇందులో బంగారం ఉందా అని అడిగారు కదూ... బంగారం కాదు... ఇది అంత కంటే విలువైనది. ఇది పురాతనమైన ఉల్క (Meterorite)... ఇది 460 కోట్ల సంవత్సరాల కిందటిది... అని చెప్పగానే... డేవిడ్‌కి ఎలా స్పందించాలో అర్థం కాలేదు. ఉల్క అంటే ఏంటో అన్నట్లు చూశాడు... బంగారం కంటే విలువైనదా అని బేలగా చూశాడు.

దీనిపై మరింత వివరణ ఇచ్చిన డెర్మోట్ హెన్రీ... తన 37 ఏళ్ల సర్వీసులో ఇలాంటి ఉల్క రాళ్లను రెండు మాత్రమే చూశానని చెప్పారు. అవి రెండు వంద శాతం ఉల్కలే అని తెల్చారు. "నా దగ్గరకు చాలా మంది ఉల్కలు కావచ్చని రాళ్లను తెస్తుంటారు... అవేవీ ఉల్కలు కావని చాలాసార్లు తేల్చాను. ఇలాంటి రాళ్లు... మన భూ వాతావరణం లోకి రాగానే... రాపిడి వల్ల ఉడుకుతాయి... కాలిపోతూ ఉంటాయి... తీరా భూమిపై పడిన తర్వాత... ఇక్కడి చల్లదనం వల్ల మెల్లగా కూల్ అవుతాయి. ఆ క్రమంలో వీటికి ఓ రూపం అనేది వస్తుంది" అని ఆయన తెలిపారు.

ఈ రాయి బంగారం కంటే ఎక్కువ విలువైనది అనడానికి బలమైన కారణం ఉంది... దీన్ని శాస్త్రవేత్తలు అంతరిక్ష పరిశోధనల కోసం ఉపయోగిస్తారు. భూమి పుట్టి 450 కోట్ల సంవత్సరాలైంది. అంతకంటే పాతదైన ఈ రాయి.. ఎలా తయారైంది... అప్పట్లో విశ్వంలో వాతావరణం ఎలా ఉండేది అనేది ఈ రాయి ద్వారా తెలిసే ఛాన్స్ ఉంది. ఇలాంటి రాళ్లు నక్షత్రాల నుంచి వచ్చే దుమ్ము, దూళితో తయారవుతాయని శాస్త్రవేత్తలు చెబుతున్నారు.

NASA: గ్రహశకలాన్ని ఢీకొట్టబోతున్న నాసా.. తెరవెనక ప్లాన్ ఏంటి?
ప్రస్తుత రాయి... అంగారక గ్రహం, గురుగ్రహం మధ్య ఉండే గ్రహశకలాలకు చెందినది (asteroid belt between Mars and Jupiter) అని తేల్చారు. ఇతర గ్రహశకలాలు ఢీకొట్టుకున్నప్పుడు... మధ్యలో చిక్కుకున్న ఈ రాయి... దారి మళ్లి భూమివైపు వచ్చేసిందని.. భూమిని ఢీకొట్టిందని (smashes into Earth) అంచనా వేశారు. ఇది భూమిపైకి వచ్చి 100 ఏళ్ల నుంచి 1000 ఏళ్లు అయి ఉంటుందని భావిస్తున్నారు.