Peacock Tarantula video : అరుదైన నెమలి సాలీడు .. ఆంధ్రప్రదేశ్ లోనే కనిపిస్తుంది

Peacock Tarantula video : సాలీళ్లను చూడగానే మనలో ఏదో తెలియని వణుకు. వాటి కాళ్లు, కదలికలు.. అన్నీ మనల్ని భయపెడతాయి. కానీ అవే లేకపోతే... మన ఇళ్లలో రకరకాల పురుగులు మనపై దండయాత్రం చెయ్యగలవు. సాలి గూళ్లలో ఆ పురుగులు చిక్కేలా చేసి... మనపై దాడి చెయ్యకుండా చేస్తున్నాయి సాలీళ్లు. ఐతే.. వీటిలో తరంతులా సాలీళ్లు అర చెయ్యి సైజులో ఉంటాయి. వీటిలో కొన్ని విషపూరితమైనవి ఉంటాయి. మరికొన్ని కుట్టగలవు. పొడి ప్రాంతాలు, అమెరికా లాంటి దేశాల్లో ఇవి ఎక్కువగా కనిపిస్తాయి. ఐతే... వీటిలో ప్రత్యేకమైన నెమలి సాలీడు మాత్రం అమెరికాలోనే కాదు.. ప్రపంచంలో ఎక్కడా కనిపించదు.. ఒక్క ఆంధ్రప్రదేశ్‌లో మాత్రమే అవి కనిపిస్తున్నాయి. ఇవి చిన్న బల్లులు, కప్పలు, పక్షుల్ని తిని బతుకుతున్నాయి. (peacock tarantula)

తరంతులాని చూడగానే అమెరికన్లు కూడా భయపడతారు. ఎందుకంటే అవి నల్లగా... జూలుతో ఉంటాయి. అవి కదులుతుంటే.. భయంకరంగా ఉంటాయి. ఆ నల్ల రంగే భయపెడుతోంది. అవే సాలీళ్లు బ్లూ కలర్‌లో నెమలి రంగుల్లో ఉంటే... ఏమాత్రం భయం వెయ్యదు సరికదా... మనమే వాటిని పట్టుకునేందుకు ఆసక్తి చూపిస్తాం.

ఈ నెమలి సాలీళ్ల శాస్త్రీయ పేరు పోసిలోథెరియా మెటల్లికా (Poecilotheria metallica). తరంతులా సాలీళ్లలో ఇవి ప్రాచీన జాతివి. ఇవి ఆంధ్రప్రదేశ్ లోని దట్టమైన అడవుల్లో జీవిస్తున్నాయి. ఐతే... వీటిని అత్యంత వేగంగా అంతరించిపోతున్న జీవుల లిస్టులో చేర్చింది IUCN. అడవులు తగ్గిపోతుంటే.. మిగతా ప్రాణుల సంఖ్య తగ్గుతున్నట్లే.. వీటి సంఖ్యా తగ్గిపోతోంది.

ఈ సాలీడుకి సంబంధించిన వీడియోని తాజాగా రెడ్డిట్‌ లోని Alarming-Plate-8266 యూజర్ ఆగస్ట్ 8, 2022న పోస్ట్ చేశారు. ఈ వీడియోకి ఇప్పటికే 9 వేల మందికి పైగా అప్ ఓట్లు ఇచ్చారు.

ఆ వీడియోని ఇక్కడ చూడండి (viral video)

విషపూరిత సాలీళ్లు :
ఈ సాలీళ్లలో ఆడ సాలీళ్లకు నీలి రంగు అలాగే ఉంటుంది. మగ సాలీళ్లు పెద్దవి అయ్యాక.. వాటికి నెమలి రంగు తగ్గిపోతుంది. ఆడ సాలీళ్లు 12 ఏళ్ల దాకా బతుకుతాయి. మగవి 4 ఏళ్ల దాకా జీవిస్తాయి. వీటి నెమలి పించం రంగు మెరుస్తూ ఉంటుంది. అందుకే ఇవి బాగా ఆకర్షిస్తాయి. ఈ సాలీళ్లు కూడా విషపూరితమైనవే (venomous spider). కానీ ఇవి ఇప్పటివరకూ మనుషుల్ని చంపినట్లు రికార్డులు లేవు. వీటికి దగ్గరగా వెళ్తే కుట్టగలవు. వీటి విషం వల్ల తీవ్రమైన నొప్పి వస్తుంది. అంతేకాదు.. తలనొప్పి, వాపు, తిమ్మిరి కలుగుతాయి.