ప్రేమికులు అక్కడ ఎంచక్కా తలదాచుకోవచ్చు!

ప్రేమ కోసం ప్రేమికులు ఎంత పనైనా చేస్తారు. చివరికి ప్రేమించిన వ్యక్తితో పెళ్లి చేయకపోతే ఆత్మహత్యలు చేసుకుంటారు. కొందరైతే ఎన్ని కష్టాలొచ్చిన ప్రేమించిన వ్యక్తి కోసం గడపదాటుతుంటారు. కొన్నిసార్లు వారి పెద్దవాళ్లే తమ పిల్లల మీద దాడులు చేస్తుంటారు. ఈ నేపథ్యంలో రాజస్థాన్ పోలీసుశాఖ వినూత్నంగా ఆలోచించింది. పెళ్లి విషయంలో ఇంట్లో గొడవపడి బయటకు వచ్చేసే ప్రేమికుల కోసం వసతి గృహం ఏర్పాటు చేయాలని నిర్ణయం తీసుకున్నారు. ఏవైనా సమస్యలు వస్తే ప్రేమ జంటలు ఫోన్ చేసి సాయం కోరేందుకు హెల్ప్‌లైన్‌ నెంబరు సౌకర్యాన్ని కూడా కల్పిస్తామన్నారు. ప్రేమికులకు పెళ్లి విషయంలో తల్లిదండ్రులు, బంధువుల నుంచి ప్రాణహాని ఉంటే హెల్ప్ లైన్ నెంబర్‌కు ఫోన్ చేయవచ్చునని పౌర హక్కుల అదనపు డీజీపీ జంగ శ్రీనివాసరావు తెలిపారు. అన్ని జిల్లాల పోలీసు అధికారులు త్వరలో హెల్ప్ లైన్ ఏర్పాటు చేయనున్నారు.

ప్రేమికులపై తరచు దాడులు జరగడం, పరువు హత్యల నేపథ్యంలో రాజస్థాన్ హైకోర్టు తీర్పు మేరకు పోలీసులు ఈ నిర్ణయాలు తీసుకున్నారు. ఇలాంటి కేసులను పర్యవేక్షించేందుకు ప్రతి జిల్లా కేంద్రాల్లోనూ ఓ సీనియర్ మహిళా పోలీస్ అధికారిణిని నియమించబోతున్నట్లు వివరించారు.