అతడి కడుపు నిండా ఇనుప సామాన్లే.. ఆశ్చర్యపోయిన వైద్యులు

ఇటీవల కడుపు నొప్పితో ఆసుపత్రిలో చేరిన ఓ రోగి వైద్య పరీక్షలు నిర్వహించిన డాక్టర్లు ఆశ్చర్యపోయారు. అతడి కడుపులో సుమారు 80 ఇనుప వస్తువులను చూసి అవక్కయ్యారు. దీంతో వెంటనే అతడికి శస్త్ర చికిత్స నిర్వహించి, వాటిని వెలికితీసి ప్రాణాలు రక్షించారు. ఈ ఘటన రాజస్థాన్‌లోని ఉదయ్‌పూర్‌ ప్రభుత్వ ఆసుపత్రిలో చోటుచేసుకుంది.

మానసిక వ్యాధితో బాధపడుతున్న వ్యక్తి ఇటీవల కడుపునొప్పితో ఆసుపత్రిలో చేరాడు. అతడికి సిటీ స్కాన్ నిర్వహించగా కడుపులో కొన్ని ఘన పదార్థాలు ఉన్నట్లు కనిపించాయి. దీంతో వైద్యులు అతడికి శస్త్ర చికిత్స జరిపి, వాటిని వెలికి తీశారు. వాటిలో ఇనుప తాళాలు, నాణేలు, నైల్ కట్టర్‌, వైర్లతోపాటు.. రాజస్థాన్ ప్రజలు దూమపానానికి ఉపయోగించే చిల్లమ్‌లు కూడా ఉన్నాయి.

కొద్ది రోజుల కిందట హిమాచల్ ప్రదేశ్‌కు చెందిన ఓ వ్యక్తి కూడా ఇదేవిధంగా వస్తువులను మింగేశాడు. అతడి కడుపు నుంచి ఎనిమిది స్పూన్లు, రెండు స్క్రూడ్రైవర్లు, రెండు టూత్ బ్రష్‌లు, కత్తి వెలికితీశారు. వీరు కత్తులతో సహా ఎలా మింగేస్తున్నారని ఆశ్చర్యం వ్యక్తం చేస్తున్నారు.