ఇంట్లో సొంత వైద్యం.. నాణాలు, రాళ్లు, మూతలను మింగేసిన ప్రబుద్ధుడు!

ఓ వ్యక్తి తీవ్రమైన కడుపు నొప్పితో ఆసుపత్రిలో చేరాడు. అతని సమస్య తెలుసుకునేందుకు వైద్యులు కడుపును స్కాన్ చేశారు. కడుపులో నాణాలు, రాళ్లు, సీసా మూతలు చూసి షాకయ్యారు. ఈ ఘటన కొరియాలో చోటుచేసుకుంది. 54 ఏళ్ల వ్యక్తి ఆరాటం(Anxiety)తో బాధపడుతున్నాడు. ఆ సమస్య నుంచి బయట పడేందుకు ఇంట్లోనే సొంత వైద్యం మొదలుపెట్టాడు.

నాణాలే కాకుండా ఇంట్లో ఏ చిన్న వస్తువు కనిపించినా వాటిని మందులుగా మింగిసేవాడు. ఓ రోజు అతనికి కడుపు ఉబ్బరంగా, నొప్పిగా అనిపించడంతో వైద్యులను సంప్రదించాడు. కడుపులో మొత్తం రెండు కిలోల నాణాలు, రాళ్లు, మూతలు, నట్లు, పిన్నులు ఉన్నట్లు గుర్తించిన వైద్యులు తొలుత ఎండోస్కొపీ ద్వారా నోటి నుంచి వాటిని తొలగించేందుకు ప్రయత్నించారు.
అయితే, అది సాధ్యం కాలేదు. దీంతో సర్జరీ చేసి కడుపులో ఉన్న వస్తువులన్నీ తొలగించారు. ఈ విషయాన్ని డాక్టర్ పెయాంగ్ వాహ్ చి.. అమెరికన్ జర్నల్ ఆఫ్ మెడికల్ కేర్ రిపోర్ట్స్ ద్వారా వెల్లడించారు. ప్రస్తుతం బాధితుడు కోలుకుంటున్నాడని పేర్కొన్నారు. అయితే, అతను ఎన్నాళ్ల నుంచి వాటిని మింగుతున్నాడో తెలియరాలేదు.
Image credit: American Journal of Medical Case Reports