9 నిమిషాల్లో.. ఆరుగురికి జన్మనిచ్చిన మహిళ

హౌస్టన్‌కు చెందిన తెలమా చైకా అనే మహిళ ఒకే కాన్పులో ఆరుగురు పిల్లలకు జన్మనిచ్చింది. కేవలం 9 నిమిషాల వ్యవధిలోనే ఆమె ఆరుగురుకి జన్మనివ్వడం విశేషం. వీరిలో నలుగురు మగ పిల్లలు, ఇద్దరు ఆడ పిల్లలు ఉన్నారు. ఒక్కొక్కరి బరువు 453 గ్రాములు నుంచి 906 గ్రాములు మధ్య ఉన్నట్లు వైద్యులు తెలిపారు. ప్రస్తుతం తల్లి, పిల్లలు ఆరోగ్యంగానే ఉన్నట్లు వైద్యులు తెలిపారు.

పిల్లలకు ఇన్ఫెక్షన్లు సోకకుండా ఆసుపత్రిలోని చిన్నారుల ఐసీయూలో పెట్టారు. ఒకేసారి ఎక్కువ సంఖ్యలో పుట్టే పిల్లలు బతికే అవకాశాలు తక్కువగా ఉంటాయని, ముఖ్యంగా 32 వారాలు ముందు పుట్టే చిన్నారుల చనిపోవడం లేదా భవిష్యత్తుల్లో ఆరోగ్య సమస్యలను ఎదుర్కొనే ముప్పు ఉందని అమెరికన్ కాలేజ్ ఆఫ్ ఒబస్టేట్రిక్స్ అండ్ గైనకాలజీ వైద్యులు తెలిపారు. ప్రపంచంలో ప్రతి 4.7 బిలియన్ ప్రజల్లో ఒకరికి ఈ విధంగా ఇద్దరు కంటే ఎక్కువ పిల్లలు జన్మిస్తున్నారని పేర్కొన్నారు. అయితే, ప్రసవం సమయంలో ఆరుగురు చిన్నారులను బయటకు తీయడానికి సమయం పడుతుందని, కానీ.. ఈ కేసులో తెలమా కేవలం 9 నిమిషాల్లోనే ఆరుగురిని ప్రసవించడం విశేషమని తెలిపారు.