బాత్రూమ్‌లోకి దూరిన కొండ చిలువ.. షవర్ కింద స్నానం!

స్నానం చేద్దామని బాత్రూమ్‌లోకి వెళ్లిన ఓ వ్యక్తికి అనుకోని అతిథి కనిపించింది. బాత్రూమ్‌లోని అద్దాల తలుపుపై పాకుతూ షవర్‌ను అందుకుంటున్న కొండ చిలువను చూసి అతనికి గుండె జారినంత పనైంది. ఈ ఘటన ఆస్ట్రేలియాలోని క్వీన్‌ల్యాండ్‌లో చోటుచేసుకుంది.

ఆస్ట్రేలియాలో ఉష్ణోగ్రతలు పెరుగుతున్నాయంటే చాలు.. అక్కడి ప్రజల్లో భయాందోళనలు నెలకొంటాయి. ఏ క్షణంలో ఏ పాము ఇంట్లోకి దూరుతుందోనని కలవరపడతారు. క్వీన్‌ల్యాండ్‌లోని ఓ నివాసంలో కూడా అదే జరిగింది. ఉదయం స్నానానికి సిద్ధమవుతున్న వ్యక్తికి (పేరు వెల్లడించలేదు) కొండ చిలువ కనిపించింది. దీంతో అతను వెంటనే స్నేక్ క్యాచర్ ల్యూకె హుంట్లేకి ఫోన్ చేశాడు.

ఈ సందర్భంగా ల్యూకే మాట్లాడుతూ.. ‘‘బయట వేడి ఎక్కువగా ఉండటం వల్ల కొండ చిలువ బాత్రూమ్ కిటికీ ద్వారాలో లోపలికి చేరింది. దాహం తీర్చుకోడానికి పైన ఉన్న షవర్‌ను అందుకోడానికి ప్రయత్నించింది. దాన్ని బాత్రూమ్ నుంచి బయటకు తీసే క్రమంలో అది ట్యాప్‌ను తిప్పి మరీ షవర్ ఆన్ చేసింది’’ అని తెలిపాడు. ‘‘బహుశా.. ఆ కొండ చిలువ స్నానం చేయడానికి వచ్చి ఉండొచ్చు’’ అంటూ సరదాగా వ్యాఖ్యానించాడు. ఈ సందర్భంగా అతను తీసిన వీడియో సోషల్ మీడియాలో వైరల్‌గా మారింది. ఆ వీడియోను ఇక్కడ చూడండి.