Blind Man Allegedly Regains Eye Sight After Being Hit By Car
అద్భుతం.. కారు గుద్దగానే కంటి చూపు వచ్చేసింది, అంధుడికి వింత అనుభవం!
ఆ రోడ్డు ప్రమాదం అతడి జీవితాన్ని పూర్తిగా మార్చేసింది. ఆ ప్రమాదంలో తీవ్రమైన గాయాలైనా.. చూపుతోపాటు కొత్త జీవితం కూడా లభించింది. అదెలా సాధ్యమైందో చూడండి.
Samayam Telugu12 Feb 2020, 1:20 pm
యాక్సిడెంట్‌లో గతం మరిచిపోతే.. మళ్లీ అలాంటి ప్రమాదమే జరిగితే అన్నీ గుర్తొచ్చేస్తాయని డాక్టర్లు చెప్పడం సినిమాలు, సీరియల్‌లో చూసే ఉంటారు. ఆ సన్నివేశాలను చూస్తున్నప్పుడు మనకు తెలియకుండానే నవ్వొ్స్తుంది. మరి, ఇలాంటి సంఘటన నిజంగానే జరిగితే? అద్భుతం అనిపిస్తుంది కదూ. పోలాండ్‌కు చెందిన ఈ వ్యక్తి జీవితంలో చోటుచేసుకున్న ఈ చిత్రమైన ఘటన గురించి తెలిస్తే మీరు తప్పకుండా ఆశ్చర్యపోతారు.
Samayam Teluguఅద్భుతం.. కారు గుద్దగానే కంటి చూపు వచ్చేసింది, అంధుడికి వింత అనుభవం!
20 ఏళ్ల కిందట పోయిన కంటి చూపు
గోర్జో విల్కోపోల్స్కి నగరంలో నివసిస్తున్న జానుస్జ్ గోరాజ్ అనే వ్యక్తికి సుమారు 20 ఏళ్ల కిందట అతడి ఎడమ కన్ను పూర్తిగా చూపు కోల్పోయింది. కుడి కన్ను మాత్రమే స్వల్పంగా కనిపించేది. మసక పట్టినట్లుగా, నీడలు మాత్రమే కనిపించేవి. కొన్ని అలర్జీల వల్ల అతడు చూపు పూర్తిగా మందగించిందని, చికిత్స సాధ్యం కాదని వైద్యులు అప్పట్లో చెప్పేశారు. దీంతో గోరాజ్ అప్పటి నుంచి అంధుడిలాగానే జీవిస్తున్నాడు.
2018లో అద్భుతం..
దయనీయంగా సాగుతున్న అతడి జీవితంలో 2018 వెలుగులు నింపింది. జరిగింది ఘోర ప్రమాదమే, కానీ.. అతి అతడి జీవితాన్ని పూర్తిగా మార్చేసింది. ఓ రోజు అతడు రోడ్డు దాటుతుండగా వేగంగా దూసుకొచ్చిన ఓ కారు అతడిని బలంగా ఢీకొట్టింది. అతడి తల కారును ఢీకొట్టింది. గాల్లోకి ఎగిరి కిందపడ్డ గోరాజ్‌కు తీవ్ర గాయాలయ్యాయి. తుంటి భాగం విరగడంతో అతడు హాస్పిటల్‌లో చేరాల్సి వచ్చింది. వైద్యులు సర్జరీ చేసి అతడి తుంటికి చికిత్స అందించారు.
అనుకోకుండా ఓ రోజు..
తుంటికి సర్జరీ జరిగిన కొన్ని వారాల తర్వాత గోరాజ్ కోలుకున్నాడు. అయితే, ఓ రోజు ఉదయం కళ్లు తెరవగానే.. ఎదురుగా ఉన్న వస్తువులు, మనుషులు స్పష్టంగా కనిపించారు. అది కలో, నిజమో తెలియక అతడు కాసేపు గందరగోళానికి గురయ్యాడు. ఈ విషయం తెలుసుకున్న డాక్టర్లు ‘ఇది వైద్య చరిత్రలోనే మిరాకిల్’ అంటూ ఆశ్చర్యపోయారు.
అదెలా సాధ్యమైంది?
20 ఏళ్ల కిందట గొరాజ్ కళ్లు అలర్జీ వల్ల చూపు కోల్పోయాయి. అప్పటి నుంచి అతడు వాటికి ఎలాంటి చికిత్స పొందలేదు. గోరాజ్ చికిత్స పొందిన ఇండిపెండెంట్ పబ్లిక్ ప్రొవిన్సియల్ హాస్పిటల్ అధికార ప్రతినిధి ఈ మిరాకిల్‌పై స్పందిస్తూ.. యాక్సిడెంట్ తర్వాత వైద్యులు కొన్నిరకాల మందులను ఇచ్చాం. వాటిలో ఏ మందు పనిచేసిందో తెలీదుగానీ.. అది అతడి కంటి లోపాన్ని సరిచేసి ఉండవచ్చు. ఆ సమయంలో అతడికి రక్తం గడ్డకుండా ఇచ్చే యాంటికాగ్యులంట్స్ ఇచ్చాం. వాటి వల్ల అతడి చూపు మెరుగుపడి ఉండవచ్చు’’ అని తెలిపారు.
మొబైల్‌లోని అక్షరాలు కూడా చదవగలుగుతున్నా..
గోరాజ్ మాట్లాడుతూ.. ‘‘నాకు ఇప్పుడు వస్తువులు, మనుషులు.. అన్నీ స్పష్టంగా కనిపిస్తున్నాయి. మొబైల్‌లోని అక్షరాలను కూడా చదువగలుగుతున్నా. మళ్లీ చూపు ఎలా వచ్చిందనేది వైద్యులు నాకు చెప్పలేదు. ఆ యాక్సిడెంట్‌తో నా జీవితం మారిపోయింది’’ అని తెలిపాడు.
చిత్రం ఏమిటంటే.. గోరాజ్ ఏ హాస్పిటల్‌లో కంటి చూపును తిరిగి పొందాడో అక్కడే ఉద్యోగాన్ని సంపాదించాడు. సెక్యూరిటీ గార్డుగా విధులు నిర్వహిస్తున్నాడు. గోరాజ్ గురించి తెలిసి ఎన్నో వైద్య సంస్థలు పరిశోధనలు చేయడానికి ముందుకొచ్చాయి. కానీ, గోరాజ్.. తాను సాధారణ జీవితాన్ని గడపాలని అనుకుంటున్నానని, తనపై పరిశోధనలు వద్దని కోరడంతో అంతా వెనక్కి తగ్గారు. ఏది ఏమైనా.. అంధుడిగా దయనీయ జీవితం గడుపుతున్న అతడికి మళ్లీ చూపురావడం నిజంగా అద్భుతమే కదూ!!
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.
