విమాన చక్రాల్లోకి దూరి ప్రయాణం.. 3500 అడుగుల ఎత్తు నుంచి పడి వ్యక్తి దుర్మరణం

ఇదో అరుదైన ఘటన.. గార్డెన్‌లో సన్ బాత్ చేస్తున్న ఓ వ్యక్తి పక్కన ఓ శరీరం ఆకాశం నుంచి పడింది. దీంతో.. అప్పటివరకు ప్రశాంతంగా ఉన్న ఆ గార్డెన్‌లో అరుపులు, కేకలు వినిపించాయి. ఈ సమాచారం తెలియగానే పోలీసులు అక్కడికి చేరుకున్నారు. శరీరం చాలా ఎత్తు నుంచి పడి ఉంటుందని భావించిన పోలీసులు విమానాశ్రయ అధికారులను సంప్రదించారు. ఆ శరీరం విమానం నుంచి పడిందని నిర్ధరించారు. దక్షిణ లండన్ చోటుచేసుకున్న ఈ ఘటన సర్వాత్ర చర్చనీయమైంది. విమానం లోపలకి వెళ్లాలంటే ఎన్నో భద్రతా తనిఖీలు పూర్తిచేసుకోవాలి. అలాంటిది ఆ వ్యక్తి విమానం లోపలకి కాకుండా నేరుగా విమాన చక్రాల(ల్యాండింగ్ గేర్) కంపార్ట్‌మెంట్‌లోకి ఎలా ప్రవేశించడానే సందేహాలు నెలకొన్నాయి. పోలీసుల తెలిపిన వివరాల ప్రకారం..

సోమవారం కెన్యాలోని నౌరోబీ నుంచి బయల్దేరిన విమానంలోని ల్యాండింగ్ గేర్‌లో ఓ వ్యక్తి అక్రమంగా చొరబడ్డాడు. లండన్‌లోని హీత్రో విమానాశ్రయానికి చేరుకోగానే విమానం రన్‌వేపైకి దిగేందుకు ల్యాండింగ్ గేర్‌లు తెరుచుకున్నాయి. దీంతో ఆ వ్యక్తి పట్టుతప్పి విమానం నుంచి ఓ గార్డెన్‌లో పడ్డాడు. అక్కడ సన్‌బాత్ చేస్తున్న ఓ వ్యక్తికి మీటరు దూరంలో ఆ వ్యక్తి శరీరం పడింది. ఎత్తు నుంచి పడటం వల్ల శరీరం ఛిద్రమై రక్తం గార్డెన్ గోడలపైకి చిమ్మింది.
ఈ ఘటనపై కెన్యా ఎయిర్‌వేస్ స్పందిస్తూ.. తమ విమానంలోని ల్యాండింగ్ గేర్ కంపార్ట్‌మెంట్‌లో ఒక వాటర్ బాటిల్, బ్యాగ్, ఆహారం కనుగొన్నట్లు వెల్లడించింది. దీంతో పోలీసులు అతడు విమానం నుంచి పడి ఉంటాడని నిర్ధారించారు. అయితే, అతడు పడక ముందే చనిపోయాడా, పడిన తర్వాత చనిపోయాడా అనేది తెలియరాలేదు. ప్రమాదం సమయంలో విమానం 3500 అడుగుల ఎత్తులో ఉన్నట్లు తెలిసింది.
నౌరోబీ నుంచి హీత్రోకు విమానంలో చేరాలంటే 9 గంటల సమయం పడుతుంది. ఈ నేపథ్యంలో అతడు గాలి ఒత్తిడి వల్ల ఊపిరాడక చనిపోయి ఉండవచ్చని, ల్యాండింగ్ గేర్ తెరిచిన తర్వాత కంపార్ట్‌మెంట్ నుంచి జారి కిందపడి ఉండవచ్చని తెలుస్తోంది. 2012లో కూడా 30 ఏళ్ల వ్యక్తి ల్యాండింగ్ గేర్‌లో నక్కి విమానం నుంచి కిందపడి చనిపోయాడు. ఈ ఘటన కూడా హీత్రోలోనే చోటుచేసుకోవడం గమనార్హం.