దొంగకు నరకం చూపిన మహిళ.. రూపం కోల్పోయి ఆస్పత్రిపాలు!

ఆ దొంగ పొద్దున్నే ఎవరి ముఖం చూశాడో ఏమో.. చోరీకెళ్లి నరకం చూశాడు. చివరికి కుయ్యొ మొర్రో అంటూ ఆసుపత్రిలో చేరాడు. లరోండ్రిక్ మ్యాక్లిన్ అనే దొంగ అలబామాలోని డెకాతూర్ ప్రాంతంలోని ఓ ఇంట్లో దొంగతనం చేసేందుకు వెళ్లాడు. ఇంట్లో అలికిడి విని నిద్రలేచిన మహిళకు మ్యాక్లిన్ కనిపించాడు. దీంతో షాకైన ఆమె గట్టిగా కేకలు పెట్టింది.

మ్యాక్లిన్ తన వద్ద ఉన్న గన్ తీసి ఆమెను బెదిరించాడు. దీంతో ఆమె మరో గదిలోకి పరిగెట్టింది. అక్కడ ఓ పాత్రలో ఉన్న వేడి వేడి గ్రీజును అతడి ముఖం మీద వేసింది. దీంతో మ్యాక్లిన్‌కు ప్రాణం పోయినంత పనైంది. గన్ కిందపడేసి బాధతో కేకలు పెట్టాడు. ఆమె పోలీస్ హెల్ప్‌లైన్ నెంబరు 911కు ఫోన్ చేసింది. దీంతో పోలీసులు అక్కడికి చేరుకుని మ్యాక్లిన్‌ను అదుపులోకి తీసుకున్నారు. అనంతరం ఆసుపత్రికి తీసుకెళ్లి చికిత్స అందించారు. వేడి గ్రీజ్ వల్ల అతడి బుగ్గలు, కళ్లు, నుదురు కాలిపోయాయి. గ్రీజు మీదపడగానే అతడు కళ్లు మూసుకున్నాడు. లేకపోతే అతడి చూపు కూడా పోయేది.