China Man With Amnesia Remembers His Home While Watching Coronavirus News Report
కరోనాతో గతం గుర్తొచ్చింది.. 30 ఏళ్ల తర్వాత కుటుంబాన్ని కలవనున్న చైనా ‘గజనీ’
కరోనా ఎంత కీడు చేస్తుందో తెలిసిందే. కానీ, ప్రపంచంలో దీని వల్ల ఒకే ఒక వ్యక్తికి మేలు జరిగింది. అదెలాగో తెలిస్తే ఆశ్చర్యపోతారు.
Samayam Telugu26 Mar 2020, 3:50 pm
కరోనా వైరస్ (Covid 19).. ప్రపంచాన్ని ఎంతగా కలవర పెడుతుందో తెలిసిందే. ఇది ప్రమాదకరంగా వ్యాపిస్తుందో తెలిస్తే గుండె జారిపోతుంది. అయితే, ఈ వైరస్ వల్ల నష్టపోయేవాళ్లే గానీ.. లాభపడినవాళ్లు ఎవరూ లేరు. ఈ వైరస్ వల్ల లాభపడుతున్నది కేవలం ప్రకృతి మాత్రమే. లాక్డౌన్ వల్ల వాహనాల రాకపోకలు నిలిచిపోయిన నేపథ్యంలో కాలుష్యంగా భారీగా తగ్గుముఖం పట్టినట్లు పర్యావరణవేత్తలు తెలుపుతున్నారు.
ప్రకృతి తర్వాత ఈ వైరస్ వల్ల ఓ వ్యక్తికి మాత్రమే మంచి జరిగింది. అతనే చైనాకు చెందిన ఝూ జియామింగ్. సుమారు 30 ఏళ్ల కిందట గతం మరిచిపోయిన ఇతడు కరోనా వైరస్ వల్ల మళ్లీ అన్నీ గుర్తుకొచ్చాయి. తన ఊరు, పేరు.. అన్నీ మళ్లీ కళ్ల ముందు గిరిగిరా తిరిగాయి. తాను ఎవరో తెలియడంతో అతడు పోలీసులను ఆశ్రయించి జరిగిన విషయం చెప్పాడు. దీంతో పోలీసులు మళ్లీ.. అతడి కుటుంబ సభ్యులకు సమాచారం ఇచ్చారు. అయితే, అతడికి ‘కరోనా వైరస్’ ఎలా ఉపయోగపడింది? అతడికి కూడా ఈ వైరస్ సోకిందా? అతడికి మళ్లీ గతం ఎలా గుర్తొచ్చిందో తెలియాలంటే.. అతడు గతాన్ని ఎలా మరిచిపోయాడో తెలుసుకోవాల్సిందే.
30 ఏళ్ల కిందట గతం మరిచిపోయి..
నైరుతి చైనాలోని గుయ్జౌ ప్రాంతానికి చెందిన ఝూ జియామింగ్ 1990లో హూబీలోని ఓ నిర్మాణ పనుల్లో కూలి పనుల కోసం వెళ్లాడు. అక్కడ పనిచేస్తుండగా జరిగిన ప్రమాదంలో తలకు పెద్ద దెబ్బ తగిలింది. తీవ్ర గాయాలతో హాస్పిటల్లో చేరిన అతడు చనిపోతాడని అంతా భావించారు. వైద్యుల ప్రయత్నం వల్ల అతడి ప్రాణమైతే నిలిచింది. అమ్నేసియా వల్ల జ్ఞాపకశక్తి పోయింది. గతం మొత్తం మరిచిపోయిన అతడు తన పేరు, ఊరు తెలియక ఇబ్బందిపడ్డాడు.
గుర్తింపు కార్డు కూడా పోవడంతో..
ప్రమాదం రూపంలో దురదృష్టం అతడిని వెంటాడింది. అతడి వివరాలున్న ఐడి కార్డు కూడా పోయింది. దీంతో అతడి హుబీలోనే బందీ అయ్యాడు. అందరూ ఉన్నా.. అనాథగా మారాడు. వీధుల్లో తిరుగుతున్న అతడి బాధను అర్థం చేసుకుని ఓ జంట అక్కున చేర్చుకున్నారు. అతడి ఫొటోను పోలీసులకు ఇచ్చి.. కుటుంబికుల ఆచూకీ కనుగోమన్నారు. మిస్సింగ్ ఫిర్యాదుల్లో అతడికి సంబంధించిన వివరాలేవీ లభించలేదు. దీంతో అప్పటి నుంచి జియామింగ్ ఆ నగరంలోనే ఉండిపోయాడు.
ఆ ప్రయాణంతో మార్పులు
2015లో జియామింగ్ జీజాంగ్ ప్రోవీన్స్కు తీసుకెళ్లాలని, తాను అక్కడి నుంచే వచ్చానని అనిపిస్తోందని తెలిపాడు. దీంతో వారు అతడిని అక్కడికి తీసుకెళ్లారు. ఊహించినట్లే అతడికి ఆ ప్రాంతాన్ని ఎప్పుడో చూసినట్లుగా, తిరిగినట్లుగా అనిపించింది. అది ఖచ్చితంగా తనకు తెలిసిన ప్రాంతమేనని చెప్పాడు. కానీ, అతడి ఇల్లు, కుటుంబ సభ్యులు ఎవరనేది మాత్రం ఎంత ప్రయత్నించినా గుర్తురాలేదు. దీంతో అతడు తిరిగి హూబీకి వెళ్లిపోయాడు.
కరోనా వైరస్తో గుర్తొచ్చిన గతం..
గత రెండు నెలలుగా చైనాలో కరోనా వైరస్ ఎంతగా కలవర పెట్టిందో తెలిసిందే. ఈ సందర్భంగా స్థానిక టీవీ చానెల్లో వార్తలు చూస్తుండగా అతడి సొంత ఊరైన గుయ్జౌను చూపించారు. దీంతో జియామింగ్కు తన ఊరు గుర్తొచ్చింది. వెంటనే పోలీస్ స్టేషన్కు వెళ్లిన జియామింగ్.. గుయ్జౌ ప్రాంతానికి చెందిన తనకు గతం గుర్తుకొచ్చిందని తెలిపాడు. ఈ సందర్భంగా తన తండ్రి పేరు చెప్పి.. సమాచారం ఇవ్వాలని కోరాడు.
లాక్డౌన్ వల్ల కలవలేని పరిస్థితి..
పోలీసులు అతడి కుటుంబ సభ్యుల వివరాలు తెలుసుకున్నారు. జియామింగ్ బతికే ఉన్నాడనే సమాచారం ఇచ్చారు. కానీ, అతడి తండ్రి 18 ఏళ్ల కిందటే చనిపోయాడని తెలిపారు. ప్రస్తుతం చైనాలో లాక్డౌన్ ఉండటం వల్ల అతడు ప్రయాణం చేయడం సురక్షితం కాదని పోలీసులు తెలిపారు. కుటుంబికులను కలవడానికి కొద్ది రోజులు వేచిచూడాలని తెలిపారు.
వీడియో కాల్లో తల్లితో మాట్లాడిన జియామింగ్
పోలీసులు జియామింగ్ కుటుంబ సభ్యుల ఫోన్ నెంబరు ఇచ్చారు. దీంతో జియామింగ్ వాళ్లకు వీడియో కాల్ చేసి మాట్లాడాడు. ఈ సందర్భంగా 83 ఏళ్ల తల్లి జియామింగ్తో మాట్లాడుతూ.. ‘‘నేను బతికుండగా నిన్ను చూడలేనేమో అనుకున్నా. నువ్వు ఇంకా జీవించి ఉన్నందుకు చాలా సంతోషంగా ఉంది’’ అని తెలిపింది. జియామింగ్ మాట్లాడుతూ.. ‘‘ఎట్టకేలకు నా ఊరు, కుటుంబాన్ని తెలుసుకోగలిగాను. ఇప్పుడు నాకు చాలా సంతోషంగా ఉంది’’ అని తెలిపాడు. చూశారుగా.. అతడు తిరిగి తన కుటుంబాన్ని కలిసేందుకు కరోనా ఎలా ఉపయోగపడింది. అలాగని కరోనా మంచిదని మాత్రం అనుకోకండి. అతడికి మేలైతే జరిగి ఉండొచ్చు. కానీ, అది సోకితే ప్రాణాలు కూడా మిగలవు. (Photo: odditycentral)
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.