చనిపోయిందనుకొని పూడ్చిపెడితే.. సమాధి తవ్వుకుని బయటకొచ్చిన కుక్క!

చనిపోయిన వ్యక్తులు బతికి వస్తే ఒక పక్క సంతోషం, మరో పక్క ఆశ్చర్యం కలగక మానదు. రష్యాలోని నోవోనికోల్సక్ అనే గ్రామంలో కూడా ఇదే చోటుచేసుకుంది. డిక్ అనే 18 ఏళ్ల కుక్క తన యజమాని ఎంత పిలిచినా స్పందించలేదు. దాన్ని కదిపి చూసినా చలించలేదు. ఊపిరి కూడా తీసుకోకపోవడంతో అది చనిపోయిందని అంతా భావించారు.

దీంతో డిక్ యజమాని, ఆమె కుటుం ఎంతో రోదించింది. చుట్టుపక్కలవారిని పిలిచి దానికి అంత్యక్రియలు జరిపించింది. భూమిలో పూడ్చిపెట్టింది. అయితే, కొన్ని గంటల తర్వాత డిక్‌కు మెలకువ వచ్చింది. సమాధిలో ఉన్న డిక్ తనపై కప్పిన మట్టిని తొలుచుకుంటూ రోడ్డు మీదకు వచ్చింది. డాగ్ షెల్టర్‌లో పనిచేసే వ్యక్తులు డిక్‌కు ఆశ్రయం కల్పించారు. దాని ఫొటోను సోషల్ మీడియాలో షేర్ చేశారు. ఆ ఫొటో చూడగానే యజమాని, ఆమె కుటుంబ సభ్యులు షాకయ్యారు. పరుగు పరుగున డాగ్స్ షెల్టర్‌కు వెళ్లి డిక్‌ను తీసుకున్నారు. డిక్ తిరిగి వచ్చిందనే సంతోషంతో షెల్టర్‌కు రూ.5వేలు నజరానాగా ఇచ్చారు. అయితే, డిక్ గాఢ నిద్రలో ఉండటమో లేదా స్పృహ కోల్పోయి ఉండవచ్చని భావిస్తున్నారు. ఏది ఏమైనా ప్రాణానికి ప్రాణమైన పెంపుడు కుక్క మళ్లీ బతికి రావడమంటే గ్రేటే కదూ.