Hairball in Girl Belly: వామ్మో.. 1.5 కిలోల వెంట్రుకలను మింగేసిన బాలిక

కడుపు నొప్పితో ఆసుపత్రిలో చేరిన ఎనిమిదేళ్ల చిన్నారిని పరీక్షించిన వైద్యులు ఆమె కడుపులో 1.5 కేజీల బరువున్న వెంట్రుకలను చూసి షాకయ్యారు. ఈ ఘటన చైనాలోని గువాంగ్ డాంగ్‌లో చోటుచేసుకుంది. ఫెయ్ఫెయ్ అనే బాలికకు రెండేళ్ల వయస్సు నుంచి తల వెంట్రుకలను తినడం అలవాటుగా మారింది. కడుపులోకి చేరిన ఆ వెంటుకలు అక్కడే ఉండలా పేరుకుపోయాయి.

ఈ ఏడాది ఫిబ్రవరి నుంచి ఆమెకు కడుపులో నొప్పి రావడం మొదలైంది. ఇటీవల నొప్పి తీవ్రమై వాంతులు కూడా చేసుకుంది. దీంతో ఆమెను హుటాహుటిన దొంగువా ఆసుపత్రిలో చేర్చారు. ఫెయ్ఫెయ్‌కు సీటీ స్కాన్ నిర్వహించిన వైద్యులు ఆమె కడుపులో ఉండలా చుట్టుకున్న వెంట్రుకలు కనిపించాయి. దీంతో వైద్యులు ఎండోస్కోపీ ద్వారా ఆమె కడుపు నుంచి 1.5 కేజీల వెంటుకలను బయటకు తీసేశారు.

వెంట్రుకలను తినడం ప్రమాదకరమైన అలవాటని వైద్యులు పేర్కొన్నారు. వైద్య పరిభాషలో దీన్ని ‘పికా’ అంటారని, దీనివల్ల పోషకాల్లేని వస్తువులను తినాలనే ప్రేరణ కలుగుతుందన్నారు. ఫెయ్ఫెయ్ కూడా ఇదే సమస్యను ఎదుర్కొందని తెలిపారు. ఇకపై ఆమె వెంట్రుకలు తినకుండా జాగ్రత్తలు తీసుకోవాలని తల్లిదండ్రులకు సూచించారు.

Photo credit: YouTube (Image grabbed as screen shot)