మద్యం మత్తు దిగకపోతే.. ఫుల్ డే సెలవు, ఉద్యోగులకు బంపర్ ఆఫర్!

‘‘రాత్రి బాగా మందు కొట్టా, మత్తు దిగలేదు.. సెలవు కావాలి’’ అని మీ బాసును ఎప్పుడైనా అడిగారా? ‘‘బాబోయ్, ఇంకేమైనా ఉందా.. తర్వాతి రోజు ఉద్యోగం పీకేయడూ’’ అనే కదా మీ సమాధానం. అదీ కరక్టే. కానీ, యూకేలోని ఓ కంపెనీ ‘హ్యాంగ్‌ఓవర్ డే’ సెలవులను అందుబాటులోకి తెచ్చింది. రాత్రంతా తాగి, ఉదయానికి కూడా మత్తు దిగకపోతే.. ఈ సెలవును ఉపయోగించుకోవచ్చు.

ఒక్క రోజు సెలవు పెడితే కొంపలు మునిగిపోయేంత హడావిడి చేసే బాసులు ఉన్న ఈ రోజుల్లో.. మద్యం మత్తు దిగలేదనే కారణంతో సెలవిచ్చే బాసులు కూడా ఉంటారా అనే కదా మీ అనుమానం. మీకు ఆ సందేహమే వద్దు. వాయువ్య ఇంగ్లాండ్‌లో గల ఓ డిజిటల్ మార్కెటింగ్ సంస్థ ఈ సరికొత్త విధానాన్ని ప్రవేశపెట్టింది. రాత్రంతా మందుకొట్టి మత్తులో జోగే ఉద్యోగులు.. ఉదయం నిద్రలేచి ఆఫీసుకు రావడం కష్టమని భావించిన ఆ కంపెనీ.. ఈ ‘హ్యాంగ్‌ఓవర్ ఆఫ్’ను ప్రవేశపెట్టింది.

Also Read: ఆ ఆఫీసులో ఉద్యోగి టాయిలెట్‌కు వెళ్లొస్తే.. వాసన చూస్తారట! ఎందుకో తెలుసా?

ఈ సెలవులు కేవలం మద్యం అలవాటు ఉన్న ఉద్యోగులకే కాదు, ఆ అలవాటు లేని ఉద్యోగులకూ వర్తిస్తుంది. ఉద్యోగులు మందు కొట్టకపోయినా.. రాత్రంతా ఏదైనా కారణాల ఎక్కువ సేపు మేల్కొని, ఉదయం నిద్ర లేవలేని పరిస్థితి ఉంటే ఈ సెలవు తీసుకోవచ్చు. లేదా వర్క్ ఫ్రం హోం చేయవచ్చు. ఈ సందర్భంగా ఆ సంస్థకు చెందిన ఎల్లీ ఎంట్విస్ట్‌లే మాట్లాడుతూ.. ‘‘నా ఫ్రెండ్ చాలామంది యూనివర్శిటీలో చదువుకుంటున్నారు. వారంతా షిఫ్టుల్లో పనిచేస్తుంటారు. దాని వల్ల శని, ఆదివారాల్లో బయటకు రాలేదు. దీంతో మేమంతా గురువారం రాత్రి మందు కొడతాం. ఒక వేళ రాత్రి మందు ఎక్కువైతే తర్వాతి రోజు సెలవు తీసుకోవచ్చు’’ అని తెలిపాడు. ఈ విషయం సోషల్ మీడియాలో వైరల్ కావడంతో.. అంతా ఆ కంపెనీని ప్రశంసలతో ముంచెత్తుతున్నారు. ఉద్యోగుల మీద ఇంత శ్రద్ధ చూపే సంస్థను మరెక్కడా చూడలేదని తెగ పొగిడేస్తున్నారు.

Also Read: నువ్వు దేవుడు సామీ.. ఉద్యోగుల జీతాన్ని ఒకేసారి రూ.7 లక్షలకు పెంచిన బాస్!