బతికున్న చేపను నోట్లో పెట్టుకున్నాడు.. అంతలోనే ఘోరం!

లాక్‌డౌన్‌లో ఇంట్లోనే ఉండాలని పోలీసులు ఆదేశించినా యువకులు మాట వినడం లేదు. స్నేహితులతో కలిసి బయటకు తిరిగేందుకు ఎక్కువ ఆసక్తి చూపుతున్నారు. ఈ నేపథ్యంలో తమిళనాడుకు చెందిన ఓ యువకుడు చెరువులో చేపలు పట్టేందుకు వెళ్లి ఊహించని రీతిలో చనిపోయాడు. తల్లిదండ్రులను శోకసంద్రంలో ముంచాడు.

కీలమలైకు చెందిన హరికంఠన్ (18) తన స్నేహితులతో కలిసి మేల్ అరుంగునం చెరువులో చేపలు పట్టేందుకు వెళ్లాడు. చెరువులో వేసిన గాలానికి చిక్కుకున్న చేపను తీసి పక్కన పెట్టడానికి బదులు నోటితో పట్టుకున్నాడు. గాలానికి ఎరను గుచ్చుతుండగా.. నోట్లో ఉన్న ఆ చేప అతడి గొంతులోకి జారుకుంది. దీంతో హరికంఠన్ ఊపిరి ఆడక ఉక్కిరిబిక్కిరయ్యాడు. దీంతో అతడి స్నేహితులు హుటాహుటిన ముండియం బాక్కం ప్రభుత్వ హాస్పిటల్‌కు తరలించారు. వైద్యులు గొంతులో చిక్కుకున్న చేపని బయటకు తీశారు. కానీ, హరికంఠన్ ప్రాణాలను మాత్రం కాపాడలేకపోయారు. ఈ ఘటన స్థానికంగా తీవ్ర విషాదం నింపింది.

Also Read: వయాగ్రాకు ఆ శక్తి ఉందా? ‘కరోనా’ పరిశోధకుల్లో కొత్త ఆశలు, త్వరలో గుడ్‌న్యూస్?