మేకకు మేయర్ పదవి.. కుక్కపై 13 ఓట్ల తేడాతో గెలుపు!

మేయర్ పదవి కోసం అక్కడ హోరా హోరీ పోరు జరిగింది. ఆ పదవి కోసం ఓ మేక.. కుక్కలు, పిల్లులతో పోటీపడింది. చివరికి 13 ఓట్ల తేడాతో మేయర్ పదవిని దక్కించుకుంది. మేక మేయర్ కావడం ఏమిటీ? ఇదేమైనా జంగిల్ బుక్ కథా? అని సందేహిస్తున్నారా? కానే కాదు. అమెరికాలోని ఫెయిర్ హెవెన్‌లో జరిగిన వాస్తవ ఘటన. అదెలాగో చూడండి.

సుమారు 2500 జనాభా కలిగిన ఫెయిర్ హెవెన్‌‌కు మేయర్ లేరు. ఆ ఊరు బాధ్యతలన్నీ జోసెఫ్ గంటర్ అనే మేనేజరే చూసుకుంటున్నాడు. ఆయనకు ఆ ఊరిలో ప్లేగ్రౌండ్ కట్టాలని భావించాడు. ఇందుకు నిధులు అవసరం కావడంతో గంటర్‌కు ఓ ఐడియా వచ్చింది. ఇటీవల మిచిగన్‌లోని ఒమెనా అనే గ్రామంలో జంతువులకు జరిపిన ఎన్నికల్లో పిల్లి మేయర్‌ అయ్యిందనే వార్త చూశాడు. ఈ సందర్భంగా గంటర్ కూడా ఫెయిర్ హెవెన్‌లో కూడా జంతువులకు ఎన్నికలు నిర్వహించాలని నిర్ణయించాడు. పోటీలో నిలబడే జంతువు యజమాని నగదు చెల్లించాలనే షరతు పెట్టాడు. ఈ ఎన్నికల్లో విజయం సాధించే జంతువును మేయర్‌గా నియమిస్తామని ప్రకటించాడు. తొలుత ఈ ప్రకటన విని ఆ ఊరి ప్రజలంతా ఆశ్చర్యపోయారు. అయితే, నిధుల సేకరణ కోసమే ఈ ఎన్నికలని చెప్పడంతో అంతా ఆసక్తి చూపారు. పిల్లలంతా తమ పెంపు జంతువులతో వచ్చి ఎన్నికల్లో పాల్గొన్నారు.

ఈ ఎన్నికల్లో ఓ స్కూల్ టీచర్‌కు చెందిన లింకన్ అనే మేకతోపాటు కుక్కలు, పిల్లులు సైతం పోటీకి నిలబడ్డాయి. ఈ పోటీలో లింకన్ సమ్మి అనే కుక్కపై 13 ఓట్ల తేడాతో గెలుపొందింది. ఈ కౌన్సిల్‌లో మరో 15 జంతువులు కూడా సభ్యులుగా ఎన్నికయ్యాయి. మేయర్‌గా ఎన్నికైన లింకన్ ఏడాదిపాటు ఆ పదవిలో చెలామణి అవుతుంది. దానికి మెమోరియల్ పరేడ్‌తోపాటు ప్రతి శుక్రవారం ఆపిల్ ఫెస్ట్ కూడా నిర్వహిస్తారు. పోటీ అయితే బాగానే జరిగింది. కానీ, ఆ ఎన్నికల్లో కేవలం 100 డాలర్ల ఫండ్ మాత్రమే వచ్చింది. అయితే, ఈ ఎన్నికల వల్ల పిల్లలకు ఓటు హక్కు విలువ తెలిసిందని గంటర్ తెలిపారు.