Lovers Case : ఫలించని ప్రేయసి ప్లాన్.. అడ్డంగా దొరికిపోయిన లవర్

ఈమధ్య ఉత్తరప్రదేశ్‌లో పోలీసులే కాదు... ప్రజలు కూడా అలర్ట్‌గా ఉంటున్నారు. తాజాగా పోలీసులు పాతికేళ్ల కుర్రాణ్ని అరెస్టు చేశారు. అతని పేరు సైఫ్ అలీ. షాజహాన్‌పూర్‌లో ఉంటున్నాడు. ప్రజల శాంతికి భంగం కలిగించాడు (breach of peace) అనే కేసులో అతన్ని అరెస్టు చేశారు. ఇదేం కేసు అనిపిస్తోందా.. అదే మరి ఈ స్టోరీలో ట్విస్ట్. అలీ గర్ల్‌ఫ్రెండ్.. మెహమద్‌పూర్‌లో ఉంటోంది. అలీకి మరో ఊరిలో ఉద్యోగం వచ్చింది. ఇన్నాళ్లూ ప్రేమించిన అమ్మాయికి దూరం అవుతూ... ఉద్యోగం కోసం వేరే ఊరికి వెళ్లిపోవాల్సిన పరిస్థితి. అందువల్ల ఆమెను చివరిసారి చూసిపోదామని అనుకున్నాడు. ఈ విషయం ఆమెకు చెప్పాడు. ఆమె కూడా "వచ్చేయ్" అంది. (love affair)

"అమ్మో.. మీ ఊరికి వస్తే ఇంకేమైనా ఉందా? అక్కడ ఎవరైనా నిన్నూ, నన్నూ చూశారంటే.. అయిపోయినట్లే. అందరికీ తెలిసిపోతుంది. నానా రచ్చ అవుతుంది. పైగా నేను ఆ ఊళ్లో చాలా మందికి తెలుసు" అన్నాడు. దాంతో ఆమె "అలా చెయ్" అని ఓ ప్లాన్ చెప్పింది. ఇదేదో బాగుంది... చేస్తా అన్నాడు.

కట్ చేస్తే... ఆ ఊళ్లోకి ఓ మహిళ బురఖా వేసుకొని రాసాగింది. అక్కడ రచ్చబండ దగ్గర కూర్చొని... కబుర్లు చెప్పుకుంటున్న వాళ్లకు ఆ మహిళను చూడగానే డౌట్ వచ్చింది. "ఎవరయి ఉంటుంది.. మన రహీం భార్య... కాదు కాదు... అహ్మద్ అక్క అయివుంటుంది" ఇలా వాళ్ల అంచనాలు వాళ్లు వేసుకున్నారు. కానీ.. ఆ మహిళ నడక, నడత చూసి వాళ్లకు డౌట్ వచ్చింది. ఏదో తేడా కొడుతోంది అనుకున్నారు. వెనకాలే రహస్యంగా ఫాలో అయ్యారు.

ఆ బురఖా మహిళ... ఓ యువతిని కలిసి మాట్లాడుతుండగా... ఊళ్లో వాళ్లు... చుట్టూ మూగారు. "బురఖా తియ్" అన్నారు. భయపడుతూనే తీశాడు. దాంతో... అతను మహిళ కాదనీ... సైఫ్ అలీ అనీ అర్థమైంది. కొంపముంచేందుకే వచ్చాడంటూ... పోలీసులకు కాల్ చేశారు. అంతే.. ASP సంజీవ్ బాజ్‌పాయ్ టీమ్ ఆ కుర్రాణ్ని అరెస్టు చేసింది.

నాలుగేళ్ల ప్రేమ :
సైఫ్ అలీ, అతని గర్ల్‌ఫ్రెండ్.. నాలుగేళ్లుగా ప్రేమించుకుంటున్నారు. ఈ విషయం ఎవరికీ తెలియకుండా మేనేజ్ చేశారు. ఇప్పుడు ఊళ్లోని ఓ యువకుడు.. ఈ బురఖా డ్రామా అంతా సీక్రెట్‌గా వీడియో తీసి... సోషల్ మీడియాలో పెట్టి... టాంటాం చేశాడు. దాంతో వీళ్ల ప్రేమ కహానీ... దేశమంతా తెలిసింది.

సోషల్ మీడియాలో సైఫ్ అలీకి నెటిజన్లు సపోర్ట్ ఇస్తున్నారు. వాళ్లది బాధ్యతాయుతమైన ప్రేమ అంటున్నారు. ప్రేమించుకునే హక్కు వారికి ఉందనీ.. ఊరి వాళ్లు వాళ్లను ఇబ్బంది పెట్టడం సరికాదని అంటున్నారు.