స్నేహితుడి చిలిపి పనికి నుజ్జయిన పేగులు, మూత్రాశయం తొలగింపు!

స్నేహితుడి చిలిపి పని ఆ యువకుడిని ప్రమాదంలోకి నెట్టింది. అతడి వల్ల పూర్తిగా మూత్రాశయాన్నే కోల్పోవలసి వచ్చింది. ఈ ఘటన ఢిల్లీలో చోటుచేసుకుంది. ‘జర్నల్ ఆఫ్ మెడికల్ కేస్ రిపోర్ట్స్’ ప్రకారం.. ఓ యువకుడు కడుపులో నొప్పితో మౌలానా ఆజాద్ మెడికల్ కాలేజ్‌లో చేరాడు. అతడిని పరీక్షించిన వైద్యులు.. కడుపులో పేగులు దెబ్బతిన్నాయని తెలిపారు.

తన స్నేహితుడు సరదా కోసం మూత్రాశయంలోకి ఎయిర్ కంప్రెసర్ ద్వారా గాలి పంప్ చేశాడని, అప్పటి నుంచి కడుపు, మూత్రాశయం వద్ద నొప్పిగా, మంటగా ఉంటోందని బాధితుడు తెలిపాడు. దీంతో వైద్యులు అతడికి వెంటనే శస్త్ర చికిత్స నిర్వహించి దెబ్బతిన్న పేగులు, మూత్రాశయాన్ని తొలగించారు. రుషికేష్‌లో కూడా ఇలాంటి ఘటనలు చోటుచేసుకున్నాయని రిపోర్ట్‌లో పేర్కొన్నారు.

బాధితుడికి చికిత్స అందించిన వైద్యులు మాట్లాడుతూ.. ‘‘అతడి స్నేహితుడు టైర్లకు గాలికొట్టే నాజిల్‌ను వెనుక నుంచి మూత్రాశయంలో పెట్టి గాలి పంపు చేశాడు. దీనివల్ల కడుపులోని పేగుల్లో రంథ్రాలు ఏర్పడ్డాయి. మలం శరీరంలోని ఇతర అవయవాల్లోకి చేరింది. అతడి పురీషనాళం కూడా పాడైంది. దీంతో మొత్తం మూత్ర వ్యవస్థను తొలగించి ‘స్టోమా బ్యాగ్’ను అమర్చాం’’ అని తెలిపారు. చూశారుగా.. కొన్ని కొన్ని సరదా పనులు ఎంత ప్రమాదం తెచ్చిపెడతాయో!