అతడి చెవిలో పదుల సంఖ్యలో బొద్దింకలు.. ఏకంగా ఫ్యామిలీ పెట్టేశాయి!

చెవిలోకి చిన్న పురుగు దూరినా ప్రాణం విలవిల్లాడుతుంది. అలాంటిది అతడి చెవిలోకి ఏకంగా పదుల సంఖ్యలో బొద్దింకలు నివసిస్తున్నాయి. చెవి పోటుతో ఆసుపత్రిలో చేరిన ఆ వ్యక్తి చెవిని పరీక్షించిన వైద్యులు.. అతడి చెవి చిల్లుపడేలా చివాట్లు పెట్టారు. అపరిశుభ్రంగా ఉంటే.. పరిస్థితి చేయి దాటుతుందని హెచ్చరించారు.

Also Read: మహిళ చెవిలో మొలిచిన పుట్టగొడుగులు.. షాకైన వైద్యులు

చైనాకు చెందిన ఓ వ్యక్తి అర్ధరాత్రి తీవ్రమైన చెవి నొప్పితో నిద్రలేచాడు. తన చెవిలో ఏముందో చూసి చెప్పాలని కుటుంబ సభ్యులను కోరాడు. టార్చ్‌లైట్ వేసి చూడగా.. చెవిలో ఏవో కదులుతున్నట్లు కనుగొన్నారు. దీంతో అతడు వెంటనే వైద్యుడిని సంప్రదించాడు. అతడి చెవిని పరీక్షించిన వైద్యులు.. లోపలు బొద్దింకలు షికారు చేయడం చూసి షాకయ్యారు. ఓ బొద్దింక అతడి చెవిలో ఏకంగా ఫ్యామిలీయే పెట్టేసిందని తెలిపారు. చెవి నుంచి ఒక పెద్ద బొద్దింక, పది పిల్ల బొద్దింకలను వెలికి తీశారు. బొద్దింకల వల్ల అతడి చెవి ఇన్ఫెక్షన్‌కు గురైనట్లు వైద్యులు తెలిపారు. ఇంటిని, ఇంటి పరిసరాలను పరిశుభ్రంగా ఉంచుకోకపోతే ఇలాంటి సమస్యలే ఏర్పడతాయన్నారు.

Also Read: ఫోన్ మాట్లాడుతూ పాములపై కూర్చున్న మహిళ, కాటు వేయడంతో..

ఇటీవల ఇంగ్లాండ్‌కు చెందిన లియాం గోమెజ్ అనే 27 ఏళ్ల వ్యక్తికి కూడా ఇలాంటి చేదు అనుభవమే ఎదురైంది. ఓ రోజు అతడి చెవిలో శబ్దాలు ఏర్పడటంతో నిద్రలేచాడు. చెవిలో ఏదో దూరినట్లు గుర్తించిన అతడు చిన్న పిన్, దూది సాయంతో దాన్ని బయటకు తీశాడు. దీంతో చెవిలో ఉన్న సాలీడు పురుగు బయటకు వచ్చింది. ఆ ముందు రోజు రాత్రి తాను సాలీడు గూడు దగ్గర పడుకున్నానని, అప్పుడే ఆ సాలీడు చెవిలోకి దూరి ఉండవచ్చని తెలిపాడు. చూశారుగా.. ఈ సారి నిద్రపోయేప్పుడు మీరు పడుకునే బెడ్, పరిసరాలను శుభ్రంగా ఉంచుకోండి. లేకపోతే.. వీరి పరిస్థితే మీకూ ఎదురుకావచ్చు.