వ్యాయమం చేయకుండానే సిక్స్ ప్యాక్.. ఇతడేం చేశాడో చూడండి!

సిక్స్ ప్యాక్ చేయడం ఎంత కష్టమో తెలిసిందే. రోజూ జిమ్‌కు వెళ్లి.. తగిన ఆహార నియమాలు పాటిస్తేగానీ సిక్స్ ప్యాక్ రాదు. అయితే, థాయ్‌లాండ్‌కు చెందిన పంగ్‌పార్న్ అన్విలాయ్ అనే యువకుడు జిమ్‌కు వెళ్లి కసరత్తులు చేయకుండానే శాస్వత సిక్స్ ప్యాక్‌ను సంపాదించాడు. ఇది ఆశ్చర్యం కలిగించినా.. నూరు శాతం నిజం!!

మాంచి బాడీ ఉంటే అమ్మాయిలను పడేయొచ్చని ప్రతి యువకుడు కలగంటాడు. కానీ, జిమ్‌కు వెళ్లాలంటేనే బద్దకం. ఇంకొందరు ఎంత ప్రయత్నించినా సిక్స్ ప్యాక్‌కు అవసరమైన షేప్ కనిపించదు. దీంతో తీవ్ర మానసిక వేదనకు గురవ్వుతారు. అయితే, అన్విలాయ్ మాత్రం సింపుల్‌గా ఆసుపత్రికి వెళ్లి సిక్స్‌ప్యాక్ సాధించాడు.

బ్యాంకాక్‌లోని మాస్టర్‌పీస్ కాస్మొటిక్ హాస్పిటల్‌ వైద్యులను సంప్రదించిన అన్విలాయ్ తన సమస్యను వివరించాడు. తాను ఎన్నాళ్ల నుంచి సిక్స్ ప్యాక్ ట్రై చేస్తున్నా.. ఆ షేప్ రావడం లేదని తెలిపాడు. దీంతో ప్లాస్టిక్ సర్జన్ వైద్యుడు అతిత్తయపా పొతియా అతడికి లైపోసక్షన్ (liposuction) విధానంలో పొత్తి కడుపు వద్ద ఉన్న కొవ్వును తొలగించారు. కొవ్వును తొలగించిన ప్రాంతాన్ని బ్యాండేజ్‌లతో మూసేశారు. సిలికాన్, ప్లాస్టిక్‌లను వాడకుండానే శస్త్ర చికిత్స పూర్తి చేశారు. కొద్ది నెలల తర్వాత అతని కడుపుపై సిక్స్ ప్యాక్స్ స్పష్టంగా కనిపించడం మొదలైంది. దీంతో మనోడి ఆనందానికి అవధుల్లేవు.

రిస్క్ కూడా ఉంది: ఇది నొప్పితో కూడుకున్న వైద్యమని, ఈ సర్జరీ అందరికీ సూట్ కాదని వైద్యులు తెలిపారు. ఈ సర్జరీ చేయించుకునేవారు ఆరోగ్యకరమైన ఆహారం తీసుకోవాలని, నిత్యం వ్యాయామం చేస్తుండాలన్నారు. పొట్ట పెరగకుండా జాగ్రత్తపడాలి. ఈ చికిత్స చేయించుకునే వ్యక్తి లావైతే సర్జరీ చేసిన ప్రాంతంలో కొవ్వు పెరిగి ఇన్ఫెక్షన్ ఏర్పడే ప్రమాదం కూడా ఉందని తెలిపారు. ‘సిక్స్ ప్యాక్ - ఓపీ’గా పేర్కొనే ఈ సర్జరీ చేయించుకునే ముందు తప్పకుండా దానివల్ల కలిగే సైడ్ ఎఫెక్ట్స్ గురించి తెలుసుకునే ముందుకెళ్లండి. లైఫ్‌ను రిస్క్ చేయొద్దు.