Nangeli The Woman Who Cut Off Her Breasts To Protest A Tax
పన్ను కట్టమంటే రొమ్ములు కోసిచ్చింది.. ఈ వనిత కథ గుండె బరువెక్కిస్తుంది
అక్కడ అగ్రవర్ణాల మహిళలు మినహా మరెవ్వరూ రొమ్ములను వస్త్రాలతో కప్పకూడదు. పైగా వాళ్ల రొమ్ము సైజు, బరువు ఆధారంగా పన్నులు కూడా చెల్లించాలి. అప్పట్లో రొమ్ములపై పన్ను ఎందుకు విధించారు? రొమ్ములను కప్పుకున్న నంగేలీ ఎలాంటి పరిస్థితులను ఎదుర్కొంది?
Samayam Telugu23 Mar 2021, 6:58 pm
చరిత్రలో మనం ఎన్నో ఉద్యమాల గురించి విని ఉంటాం. కానీ, కేరళలో జరిగిన ఉద్యమం అన్నింటికంటే భిన్నమైనది. రాజులు పాలించే కాలంలో పేద ప్రజలు ఎన్నో సమస్యలను ఎదుర్కొనేవారు. ముఖ్యంగా రాజులు విధించే పన్నులు కట్టలేక బానిసలుగా బతికేవారు. దారుణమైన శిక్షలు అనుభవిస్తూ వెట్టిచాకిరీ చేసేవారు. దీనికి కారణం.. పేద ధనికుల మధ్య ఉండే వ్యత్యాసమే. పేదలు, నిమ్న కులాలు, గిరిజనులు సంపన్నులు కావడాన్ని ఉన్నత శ్రేణులకు ఇష్టం ఉండేది కాదు. పేదలు పేదవాళ్లలాగే ఉండాలని, వారి సంపాదన పెరిగితే తమ మాట వినరనే అభిప్రాయం ఉండేది. కేరళలో కూడా ఒకప్పుడు ఇవే పరిస్థితులు ఉండేవి. అప్పట్లో అక్కడ కులగజ్జి రాజ్యమేలింది. నిమ్న కులాలను అణగదొక్కడానికే రాజులు పనిచేసేవారు. పేదలకు వచ్చే కొద్దిపాటి ఆదాయాన్ని కూడా లాక్కొనేందుకు పన్నులు విధించేవారు. ముఖ్యంగా ట్రావెన్కో సంస్థాన పాలనలో దారుణమైన పన్నుల విధానం ఉండేది. వీటిలో అత్యంత క్రూరమైనది ‘రొమ్ము పరిమాణ పన్ను’.
మహిళలు రొమ్ములు కప్పకూడదు
పన్నులకు వ్యక్తి శరీరానికి ఎలాంటి సంబంధం ఉండదు. కానీ.. ట్రావెన్కో సంస్థానంలో ఏకంగా మహిళ రొమ్ము పరిమాణాలను చూసి మరీ పన్ను విధించేవారు. అంటే, మహిళల రొమ్ములు ఎంత పెద్దగా ఉంటే.. అంత పన్ను చెల్లించాలి. అంతేకాదు.. మహిళల తమ రొమ్ములను వస్త్రంతో కప్పకూడదు. కేవలం ఉన్నత కులాలు, ధనిక కుటుంబాలకు చెందిన మహిళలకు మాత్రమే రొమ్ములను వస్త్రాలతో కప్పుకొనే హక్కు ఉంది. గిరిజనలు, ఇతరాత్ర నిమ్న కులాల మహిళలు పై వస్త్రం లేకుండా బయట తిరిగాలి. అధికారులకు వాటిని చూపించాలి. దీంతో మహిళ భయంతో పైవస్త్రాలు ధరించకుండా తిరిగేవారు. దీన్ని ఆసరగా తీసుకుని సైనికులు, అధికారులు మహిళలపై లైంగిక దాడులకు పాల్పడేవారు. మహిళలకు నరకం చూపించేవారు.
రొమ్ముల పన్ను ఎందుకు?
రొమ్ములపై పన్ను విధించడం విచిత్రంగానే అనిపించవచ్చు. అయితే, అప్పట్లో దాని గురించి పాలకుల మెదడలో ఓ లాజిక్కు ఉండేది. ఎవరైతే ఆహారం ఎక్కువగా తింటారో వారి రొమ్ములు పెద్దవిగా ఉంటాయని, తక్కువ ఆహారం తినేవారి రొమ్ములు చిన్నవిగా ఉంటాయని గుడ్డిగా నమ్మేవారు. అంటే, మహిళలు రొమ్ములు పెద్దగా ఉన్నట్లయితే.. వారికి మూడు పూటలా మంచి ఆహారం లభిస్తుందని, అంతగా తిండి తింటున్నారంటే వారి ఆర్థిక స్థితి మెరుగ్గా ఉందనే అంచనాకు వచ్చేవారు. పెద్ద రొమ్ములు ఉండే మహిళల నుంచి భారీగా పన్నులు వసూళ్లు చేసేవారు. చెల్లించకపోతే అత్యాచారాలకు పాల్పడేవారు.
నెలకు ఒకసారి రొమ్ముల పరీక్ష
అధికారులు నెలకు ఒకసారి ప్రజల ఇళ్లను సందర్శించేవారు. ఇళ్లలో మహిళల రొమ్ముల పరిమాణం, వాటి బరువును కొలిచేవారు. దాని ప్రకారం పన్నులు విధించేవారు. ఈ పన్ను విధానాన్ని అక్కడివారు ‘ముళక్కరం’ అని పిలిచేవారు. డబ్బులు లేక పన్ను చెల్లించలేమని చెప్పే మహిళలను భర్త ఎదుటే అధికారులు అత్యాచారాలు చేసేవారు. కొందరు ఈ అవమానాన్ని తట్టుకోలేక తనువు చాలించేవారు. భర్తలకు దూరమయ్యేవారు. కొందరు అధికారులు పన్ను మినహాయింపు పేరుతో మహిళలను లోబరుచుకొనేవారు.
ధనబలం, అంగబలాలను ఎదిరించలేక..
అప్పట్లో అక్కడ అగ్రవర్ణాలదే పైచేయి. వారిని ఎదిరించలేక గిరిజన ప్రజలు భయాందోళనలతో బిక్కుబిక్కుమంటూ గడిపేవారు. ఎవరైనా ఎదురు తిరిగితే పాలకులు దారుణంగా హింసించి చంపేసేవారు. కానీ, ఇలాంటి దుర్మార్గాలు ఏదో ఒక రోజు వ్యతిరేకతకు దారితీస్తాయనే విషయాన్ని అప్పటి పాలకులు ఊహించలేకపోయారు. నంగేలీ అనే మహిళ త్యాగం ప్రజల్లో ఆగ్రహాన్ని రగిలించింది. చివరికి పాలకులపై తిరుగుబాటుకు దారి తీసింది.
నంగేలీ తిరుగుబాటు..
ట్రావెన్కోర్ సంస్థానంలోని ఆంక్షాలను వ్యతిరేకించిన ఏకైక మహిళ నంగేలి. ఆడవారికి సహజంగా పెరిగే రొమ్ములపై పన్నులు వేయడం ఏమిటని ఆమె అధికారులను నిలదీసేది. అంతేకాదు, అగ్రకులాల స్త్రీల వలె తాము ఎందుకు రొమ్ములు కనిపించకుండా వస్త్రాలను ధరించకూడదని ప్రశ్నించేది. తాను అర్థనగ్నంగా తిరగనంటూ తన రొమ్ములను ఎప్పుడూ కప్పి ఉంచేది. అధికారులు పన్ను కోసం ఇంటికి వస్తే.. తాను తన రొమ్ములను చూపించనని మొండికేసేది. ఇందుకు ఆమె భర్త కూడా మద్దతు తెలపడంతో ఆమె ధైర్యంగా పన్ను విధానాన్ని ఎదుర్కోగలిగింది.
రొమ్ములు కనిపించకుండా వస్త్రధారణ
ఒంటరి పోరాటం వల్ల ఫలితం ఉండదని భావించిన నంగేలీ. చట్టాన్ని వ్యతిరేకిస్తూ.. బహిరంగ ప్రదేశాల్లో కూడా వస్త్రాలు ధరించి తిరిగేది. పన్ను కట్టమన్నా పట్టించుకొనేది కాదు. ఆమె తీరు తోటి మహిళల్లో ధైర్యం నింపింది. ఆమెలాగే ఇతర మహిళలు వస్త్రాలు ధరించి వీధుల్లోకి రావడాన్ని చూసిన అధికారులు వ్యతిరేకతను జీర్ణించుకోలేకపోయారు. నంగేలీకి తగిన శిక్ష విధించడం ద్వారా ప్రజల్లో మళ్లీ భయాన్ని పెంచాలని భావించేవారు. ఈ సందర్భంగా భారీ సైన్యంతో ఆమె ఇంటిని చుట్టుముట్టారు.
రొమ్ములను కోసి.. అరిటాకులో పెట్టి..
అధికారులు నంగేలీని అదుపులోకి తీసుకుని పన్ను వసూలు చేసే ప్రయత్నం చేశారు. ఈ సందర్భంగా ఆమె పైవస్త్రాలను తొలగించి అత్యాచారానికి సిద్ధమయ్యారు. దీంతో ఆమె వారిని పక్కకు నెట్టి.. పన్ను కడతానని చెప్పింది. ఇంట్లోకి వెళ్లి.. పదునైన కొడవలితో తన రొమ్ములను కోసింది. అరిటాకులు వాటిని పెట్టి.. రక్తమోడుతున్న చాతితో అధికారుల వద్దకు వచ్చింది. ఈ రక్తపు ముద్దలను పన్నుగా తీసుకోండి అంటూ తొలగించిన రొమ్ము భాగాలను అధికారుల ముఖం మీదకు విసిరింది. ఆమె చర్యకు భయపడిన అధికారులు అక్కడి నుంచి వెళ్లిపోయారు. తీవ్ర రక్తస్రావంతో నంగేలీ అక్కడికక్కడే ప్రాణం విడించింది.
భార్య చితిలోకి దూకి భర్త ఆత్మహత్య
నంగేలీని ప్రాణం కంటే ఎక్కువగా ప్రేమించిన భర్త.. ఆమె మరణాన్ని తట్టుకోలేకపోయాడు. ఆమె భౌతిక కాయాన్ని దహనం చేస్తుండగా చితిలోకి దూకి ఆమెతోపాటే ఆ జ్వాల్లల్లో కాలిపోయి మరణించాడు. ఈ దారుణాలను కళ్లారా చూసిన ప్రజల్లో ఆగ్రహం కట్టలు తెంచుకుంది. నంగేలీ, ఆమె భర్త మరణాలు వృథా పోకూడదని, పాలకుల ఆగడాలపై పోరాడితేనే తమ పిల్లల భవిష్యత్తు బాగుంటుందని భావించి ప్రాణాలకు తెగించి పోరాటానికి సిద్ధమయ్యారు.
‘నంగేలీ’ పోరాటంతో మంచి రోజులు
‘‘బలవంతుడి నాకేమని పలువురితో విగ్రహించి పలుకుటమెలా? బలవంతమైన సర్పం చలి చీమల చేత జిక్కి చావదె సుమతి’’ అన్నట్లుగా ఆ అమానుష చట్టం వల్ల నిమ్న కులాల ప్రజలంతా ఒక్కటయ్యారు. అగ్రవర్ణాలపై తిరగబడ్డారు. దీక్షలు, పోరాటాలతో పాలకుల్లో వణుకు పుట్టించారు. తిరుగుబాటు వల్ల ప్రజలకు అమానుష చట్టాల నుంచి విముక్తి లభించింది. నంగేలీ త్యాగం కేరళలో నవ సమాజ స్థాపనకు మార్గం చూపింది. ఆమె తెగువకు, ధైర్యానికి తప్పకుండా సెల్యూట్ కొట్టాల్సిందే.
We use cookies and other tracking technologies to provide services in line with the preferences you reveal while browsing the Website to show personalize content and targeted ads, analyze site traffic, and understand where our audience is coming from in order to improve your browsing experience on our Website. By continuing to browse this Website, you consent to the use of these cookies. If you wish to object such processing, please read the instructions described in our privacy policy/cookie policy.