ఆన్‌లైన్‌లో ఫుడ్ ఆర్డర్.. ఆహారం నిండా బొద్దింకలే!

ఆన్‌లైన్ ఫుడ్ అంటేనే భయపడే పరిస్థితులు వచ్చాయి. కొంతమంది డెలివరీ బాయ్‌లు మధ్య దారిలోనే ఆహారాన్ని స్వాహా చేసేస్తుంటే, మరికొందరు ప్యాకెట్లు మార్చి నాణ్యతలేని ఆహారాన్ని డెలివరీ చేస్తున్నారు. ఇటీవల నూడుల్స్‌లో రక్తంతో తడిచిన బ్యాండేజీ కూడా బయటపడింది. తాజాగా ఓ కస్టమర్ ఆన్‌లైన్లో ఆర్డర్ చేసిన ఆహారంలో బొద్దింకలు బయటపడ్డాయి.

చైనాకు చెందిన ఓ మహిళ తన స్నేహితులతో కలిసి భోజనం చేయాలనుకుంది. ఈ సందర్భంగా ఆన్‌లైన్‌లో ఫుడ్ ఆర్డర్ చేసింది. ఆకలితో నకనకలాడుతున్న ఆమె స్నేహితురాలు పార్శిల్స్ విప్పి తింటుండగా అందులో చనిపోయిన బొద్దింకలు కనిపించాయి. దీంతో ఆమెకు వాంతు వచ్చినంత పనైంది. ఆమె ఆ ఆహారాన్ని పరిశీలించగా 40 వరకు బొద్దింకలు ఉన్నాయి. దీంతో ఆమె ఆహారం నుంచి బొద్దింకలు బయటకు తీస్తూ వీడియో తీసి సోషల్ మీడియాలో పోస్ట్ చేసింది. అనంతరం పోలీసులకు ఫిర్యాదు చేసింది. పోలీసులు ఆ ఆహారాన్ని సరఫరా చేసిన రెస్టారెంట్‌పై చర్యలు తీసుకున్నారు. విచారణ పూర్తయ్యే వరకు 15 రోజుల పాటు రెస్టారెంట్‌ను మూసివేయాలని ఆదేశించారు.