30 రోజులుగా కుక్క ఆహారాన్ని తింటున్న వ్యాపారి.. కారణం తెలిస్తే ఆశ్చర్యపోతారు!

అతడు గత కొద్ది రోజులుగా కుక్క ఆహారాన్ని మాత్రమే తింటున్నాడు. ఒకటి కాదు, రెండు కాదు.. సుమారు 30 రోజులపాటు అతడు ఈ ఆహారాన్ని తింటున్నాడు. అదేంటీ.. కుక్క ఫుడ్ తినడం చాలా కష్టం కదా. అది తినడం వల్ల అతడి ఆరోగ్యానికి ఏమీ కాలేదా? అనే కదా మీ డౌట్? అయితే, అతడు ఆ ఫుడ్‌ ఎందుకు తింటున్నాడో తప్పకుండా తెలుసుకోవాల్సిందే.

టెక్సాస్‌లోని మన్స్టర్‌లో నివసిస్తున్న మిచ్ ఫెల్డరాఫ్ అనే వ్యాపారి.. 30 రోజులపాటు కుక్కతినే ఆహారాన్ని మాత్రమే తింటానని శపథం చేశాడు. చెప్పినట్లే అతడు గత కొన్ని రోజులుగా డాగ్ ఫుడ్ మాత్రమే తీసుకుంటున్నాడు. అతను అలా చేయడానికి కారణం.. ఆ కుక్క ఆహారాన్ని తయారు చేసే సంస్థకు అతనే యజమాని కావడం.
అదేంటీ? యజమానైతే మాత్రం.. అలా కుక్క బిస్కట్లను తినేస్తాడా? అనే కదా మీ సందేహం. అయితే, అతను ఏం చెప్పాడో చూడండి. ‘‘మేం కుక్కల ఆరోగ్యంపై చాలా శ్రద్ధ పెడతాం. మా డాగ్ ఫుడ్‌ను యజమానులు ఎంతో ప్రేమగా తమ కుక్కలకు తినిపిస్తారు. ఎందుకంటే.. మా ఫుడ్‌పై నమ్మకం అలాంటిది. కాబట్టి.. మా ఫుడ్ నాణ్యత గురించి తెలియజెప్పేందుకు 30 రోజులపాటు డాగ్ ఫుడ్‌నే ఆహారంగా తీసుకుంటున్నా’’ అని మిచ్ తెలిపాడు. డాగ్‌ఫుడ్ తినడం వల్ల తన బరువు 20 పౌండ్లు (9 కిలోలు) తగ్గిందని, చాలా ఎనర్జీ వచ్చినట్లుగా అనిపిస్తోందని మిచ్ పేర్కొన్నాడు. డాగ్ ఫుడ్ తింటున్న వీడియోలను సోషల్ మీడియాలో పోస్టు చేశాడు.

Also Read: టిక్‌టాక్ ‘ఔట్‌లెట్ ఛాలెంజ్’‌.. మీ ఇంట్లో ఇలా అస్సలు చేయొద్దు!