‘ఫింగర్’ ఫ్యామిలీ.. ఆ కుటుంబంలో అందరికీ 12 నుంచి 14 వేళ్లు!

ఆ కుటుంబంలో ఎవరికీ సాధారణ మనుషుల్లా పదేసి వేళ్లు ఉండవు. ఒకరికి 12 లేదా మరొకరికి 14 చొప్పున వేళ్లు ఉంటాయి. కేవలం చేతులకే కాదు, కాళ్లకు కూడా పది కంటే ఎక్కువ వేళ్లు ఉంటాయి. ఈ సమస్య వల్ల తమలో ఎవరికీ ఉద్యోగాలు లభించడం లేదని చదువులు పూర్తి చేయడం కూడా కష్టంగా మారిందని ఆ కుటుంబ సభ్యులు వాపోతున్నారు.

మధ్యప్రదేశ్‌లోని బెతుల్ ప్రాంతంలోని ఆదనర్‌లో బల్‌దేవ్ యవాలే కుటుంబంలో 25 మందికి పది కంటే ఎక్కువ చేతి, కాళ్లు వేళ్లు ఉన్నాయి. ఈ సమస్యను పోలీడాసిటీలై లేదా బహు అంగుళికత అని అంటారు. జన్యు లోపం వల్ల ఇలాంటి అరుదైన సమస్యలు ఏర్పడతాయి. దీని వల్ల ముందు తరాలను కూడా ఈ సమస్య వెంటాడుతుంది.

Read also: ‘కింగ్’ వైభోగం.. నాగార్జున గురించి కళ్లు చెదిరే వాస్తవాలు!

ఆ కుటుంబ పెద్ద బల్‌దేవ్ ANI వార్తా సంస్థతో మాట్లాడుతూ.. ‘‘మా పిల్లలు స్కూల్‌కు వెళ్తున్నారు. కానీ, చదువులు పూర్తి చేయడం వారికి కష్టంగా మారింది. తోటి విద్యార్థులు వారిని హేళన చేస్తుండటంతో మధ్యలోనే స్కూలు మానేస్తున్నారు. మాది చాలా పేద కుటుంబం. మమ్మల్ని ఆదుకోవాలని ప్రభుత్వాన్ని కోరుతున్నా’’ అని తెలిపాడు.

బలదేవ్ కుమారుడు సంతోష్ యవాలే మాట్లాడుతూ.. ‘‘కేవలం చదువుల సమస్యే కాదు. మా శరీరక వైకల్యం వల్ల ఉద్యోగం సంపాదించడం కూడా కష్టంగా ఉంది. సాధారణ చెప్పులు, షూలు నా కాళ్లకు పట్టవు. నేను పదో తరగతి వరకు మాత్రమే చదివాను. ఓసారి నేను ఆర్మీ పరీక్షకు వెళ్లాను. అయితే, అక్కడ శరీరక పరీక్షలో విఫలమయ్యాను. మా సమస్యను అర్థం చేసుకుని ప్రభుత్వం ఆదుకోవాలి. నా చేతికి మొత్తం 12 వేళ్లు ఉన్నాయి. కాళ్లకు 14 వేళ్లు ఉన్నాయి. ఇంట్లో అందరికీ ఇదే సమస్య’’ అని తెలిపారు.

Read also: ఈ పబ్‌లో ఇక నగ్నంగా తిరగొచ్చు.. చిందులేయొచ్చు!

యవాలే సమస్య మనకు వింతగానే అనిపించవచ్చు. కానీ, వారు ఎదుర్కొంటున్న కష్టాలను చూస్తే తప్పకుండా జాలి వేస్తుంది. ఉపాధి అవకాశాలు లేక కూలీలుగా పనిచేస్తూ ఆ కుటుంబం సభ్యులు జీవితం సాగిస్తున్నారు. అయితే, ఈ సమస్యతో యవాలే కుటుంబం చుట్టుపక్కల గ్రామాల్లో ఫేమస్ అయ్యారు. వీరిని చూసేందుకు చాలామంది వారి గ్రామానికి వచ్చి పోతుంటారు. కానీ, ఆ కుటుంబం కోరుకుంటున్నది పేరు ప్రఖ్యాతలు కాదు. ప్రభుత్వం నుంచి చేయూత. మరి, సర్కారు స్పందన ఎలా ఉంటుందో చూడాలి.