గురకను తగ్గించే తలగడ.. ఎలా పనిచేస్తుందంటే..

గురక.. ఈ సమస్యను అనుభవించేవారికంటే.. వారి పక్కన నిద్రపోయే వ్యక్తులకే ఎక్కువ ఇబ్బంది. గురక పెట్టే వ్యక్తుల వల్ల నిద్రలేని రాత్రులు గడుపుతారు. దీంతో వారి గురక నుంచి విముక్తి పొందేందుకు రకరకాల మార్గాలను అన్వేషిస్తారు. అలాంటివారికి ఓ సంస్థ గుడ్ న్యూస్ చెప్పింది. తమ తలగడ (పిల్లో) వాడితే గురక ఆగిపోతుందని, రాత్రంతా హాయిగా నిద్రపోవచ్చని వెల్లడించింది.

‘మ్యాట్రిక్స్ పిల్లో’ పేరుతో రూపొందించిన ఈ తలగడ వాడితే గురక రాదట. సాధారణ తలగడలతో పోల్చితే ఇది చాలా భిన్నమైనదట. సరైన భంగిమలో నిద్రపోకపోయినా, తలగడ బాగోలేకపోయినా గురక సమస్య వెంటాడుతుంది. కొందరికి అనారోగ్య సమస్యల వల్ల కూడా గురక వస్తుంది. ఇవన్నీ దృష్టిలో పెట్టుకుని ‘మ్యాట్రిక్స్ పిల్లో’ను రూపొందించామని ఆ సంస్థ వెల్లడించింది.

Read Also: భయానకం.. విమానం అద్దం పగిలి ఎగిరిపోయిన పైలట్, 23 వేల అడుగుల ఎత్తులో...

‘మ్యాట్రిక్స్ పిల్లో’ను రెండు లేయర్ల మిశ్రమ పదార్థంతో రూపొందించినట్లు సంస్థ వెల్లడించింది. తలకు మరింత సౌకర్యంగా ఉండేందుకు మెమరీ ఫోమ్ ఉపయోగించామని ప్రకటనలో పేర్కొంది. ఈ తలగడను మొత్తం 14 క్యూబ్‌లుగా విభజించామని, ఎటువైపు తిరిగి పడుకున్నా సరే తలకు తగిన సపోర్ట్ ఇచ్చి హాయిగా నిద్రపోయేందుకు సహకరిస్తుందని తెలిపింది.

Read Also: ఒక్క రూపాయికే విమాన టికెట్.. ఆ సంస్థ ఇప్పుడు ఏమైంది? అసలు కథ ఇదీ!

‘‘తలకు ఎలాంటి సపోర్ట్ లేకుండా ఫ్లాట్‌గా నిద్రపోవడం వల్ల గురక వస్తుంది. ఇలా నిద్రపోవడం వల్ల ముక్కులోని శ్వాసకోశ రంథ్రాలు స్వల్పంగా లేదా పూర్తిగా మూసుకుపోతాయి. ఫలితంగా నిద్రలో గురక ఏర్పడుతుంది’’ అని పిల్లో తయారీదారులు వెల్లడించారు. మ్యాట్రిక్స్ పిల్లో డిజైన్ వల్ల అలాంటి పరిస్థితి రాదని, ఇది మంచి నిద్రను కూడా అందిస్తుందన్నారు. దీనివల్ల శరీరానికి మంచి ఎనర్జీ, రోగ నిరోధక శక్తిని అందిస్తుందని తెలిపారు. ప్రస్తుతం యూకేలో మాత్రమే అందుబాటులో ఉన్న ఈ పిల్లోను కొనాలంటే మాత్రం మత్తు వదిలిపోతుంది. ఎందుకంటే.. దీని ధర రూ.59 పౌండ్లు. భారత కరెన్సీలో రూ.5,821.