వీడు మనిషేనా? టిక్‌టాక్ లైక్స్ కోసం రైల్లో పాలు కుమ్మరించాడు.. క్లీన్ చేసేదెవరు?

టిక్‌టాక్.. వచ్చిన తర్వాత ఎంతో మంది ప్రతిభను చూసేందుకు అవకాశం లభించింది. చాలామంది తమ టాలెంట్‌ను చూపిస్తూ మనసు దోచుకుంటున్నారు. ప్రతిభావంతులు తమ క్రియేటివిటీని చూపించుకోడానికి ‘టిక్‌టాక్’ ఒక వేదికగా మారింది. దురదృష్టం ఏమిటంటే.. ఈ టిక్‌టాక్‌లో కొన్ని పనికిమాలిన చర్యలను కూడా చూడాల్సి వస్తోంది. ఇప్పటికే కొందరు అబ్బాయిలు.. టిక్‌టాక్‌లు చేసి చేసి అమ్మాయిలుగా మారిపోయారు. ఇంకొందరు పిచ్చి ఛాలెంజులతో.. యూజర్ల సహనానికి పరీక్ష పెడుతున్నారు.

అయితే, న్యూయార్క్‌కు చెందిన జాష్ పాప్కిన్ అనే ‘టిక్‌టాక్’ ప్రాంక్ స్టార్ చేసిన పని చూసి నెటిజనులు ఆగ్రహం వ్యక్తం చేస్తున్నారు. ధాన్యం కలిపిన పాలతో ఉన్న పెద్ద కంటైనర్‌తో సబ్‌వే రైలు ఎక్కిన పాప్కిన్.. తెలివి తక్కువ ప్రాంక్‌కు పాల్పడ్డాడు. ఆ కంటైనర్లో ఉన్న పాలు మొత్తాన్ని బోగీలో కావాలని కుమ్మరించాడు. అదేదో తనకు తెలియకుండా పారబోసినట్లు ఓవర్ యాక్షన్ చేస్తూ తోటి ప్రయాణికులను నమ్మించే ప్రయత్నం చేశాడు. వారిని ఇబ్బంది పెట్టాడు.

Also Read: చనిపోయిన కొడుకు మూడేళ్ల తర్వాత బతికొచ్చాడు.. అంతా లాక్‌డౌన్ మాయ!

ఈ వీడియోపై న్యూయార్క్ సబ్‌వే రైలు అధికారులు ఆగ్రహం వ్యక్తం చేశారు. అతడు చేసిన చెత్తపని వల్ల తమ రైళ్లు, రైల్వే స్టేషన్ పరిసరాలను శుభ్రం చేసే పారిశుద్ధ్య కార్మికులు ఇబ్బందిపడ్డారని పేర్కొంది. లాక్‌డౌన్‌లోనూ ప్రజలకు ఇబ్బంది లేకుండా సేవలు అందించడంలో తలమునకలైన తమ సిబ్బందికి అదనంగా పనిపెట్టాడని అధికారులు తెలిపారు. ఈ వీడియో చూసిన నెటిజనులు సైతం పాప్కిన్‌పై ఆగ్రహం వ్యక్తం చేశారు. ప్రాంక్‌లు చేయడానికి ఇదా సమయం అని తిట్టిపోశారు. ఆ బోగిని అతడితోనే శుభ్రం చేయించండని పలువురు సలహా ఇస్తున్నారు. వీలైతే సబ్‌వేలోని పారిశుద్ధ్య పనులన్నీ అతడితోనే చేయించాలని రైల్వే అధికారులకు సూచిస్తున్నారు. మరి, ఇతడి ప్రాంక్‌పై మీరేమంటారు?