ప్రియురాలి కళ్లు పీకేయబోయిన ప్రియుడు, కారణం వింటే షాకవుతారు!

ఈ రోజుల్లో అంతా సోషల్ మీడియానే లోకంగా బతికేస్తున్నారు. తమ పోస్టులకు లైకులు రాకపోయినా, ట్రోల్ చేసినా కుంగిపోవడం సాధారణమైపోయింది. కొందరైతే ఏకంగా దాడులకే దిగుతున్నారు. ఇందుకు యూకేలోని కెంట్‌లో చోటుచేసుకున్న ఘటనే నిదర్శనం. వైట్‌స్టేబుల్‌లో నివసిస్తున్న బాడీ బిల్డర్ డానీ బ్రిడ్జెస్(35)కు తన ప్రియురాలితో అమానుషంగా ప్రవర్తించి చిక్కుల్లో పడ్డాడు.

ఇటీవల ఆమె ఫేస్‌బుక్‌లో ఓ పోస్టును లైక్ చేసింది. ఈ విషయం తెలిసి డానీ తీవ్ర ఆగ్రహానికి గురయ్యాడు. నువ్వు వేరేవారి పేజ్‌ను లైక్ చేయడం ఏమిటంటూ ఆమె కళ్లను బలవంతంగా పెకిలించేందుకు ప్రయత్నించాడు. అతడి ఉక్కు కౌగిలిలో ఉక్కిరిబిక్కిరైన ఆమె తప్పించుకోడానికి ఎంతో ప్రయత్నించింది. మొత్తానికి అతడి నుంచి తప్పించుకుని.. తన ఫ్రెండ్‌కు రక్షించాలని మెసేజ్ పంపింది. దీంతో పోలీసులు రంగ ప్రవేశం చేశారు. అయితే, డానీ ఇంటి తలుపులు తెరవడానికి నిరాకరించాడు. దీంతో పోలీసులు తలుపులు బద్దలకొట్టి డానీని అదుపులోకి తీసుకున్నారు.

ఈ కేసు తాజాగా కాంటర్బరీ క్రౌన్ కోర్టులో విచారణకు వచ్చింది. ఈ సందర్భంగా బాధితురాలు మాట్లాడుతూ.. ‘‘అతడు నా కళ్లను బయటకు లాగేస్తున్నట్లు అనిపించింది. గుడ్లు ఊడి బయటకు వచ్చి చచ్చిపోతానేమో అనిపించింది. కళ్ల వద్ద నాకు బలమైన గాయాలయ్యాయి’’ అని తెలిపింది. అతడు తనపై దాడి చేయడం కొత్తకాదని, గతేడాది ఏప్రిల్, నవంబరు మాసాల్లో కూడా దాడి చేశాడని ఆమె తరఫు న్యాయవాది కోర్టుకు తెలిపాడు. దీంతో కోర్టు డానీకి తొమ్మిదేళ్ల జైలు శిక్ష విధించింది.