షాకింగ్.. 178 యూనిట్లకు రూ.23 కోట్ల కరెంట్ బిల్లు!

కరెంటే కాదు.. ఒక్కోసారి కరెంట్ బిల్లులు కూడా షాక్ కొడతాయి. ఉత్తర ప్రదేశ్‌లోని కనౌజు ప్రాంతానికి చెందిన ఓ వ్యక్తికి ఇలాంటి చేదు అనుభవమే ఎదురైంది. ఈ నెల వచ్చిన కరెంటు బిల్లు చూడగానే అతడికి గుండె ఆగినంత పనైంది. దీంతో ఆ వ్యక్తి బిల్లు పట్టుకుని విద్యుత్ కార్యాలయానికి పరుగులు పెట్టాడు.

అబ్దుల్ బసిత్ అనే చిరు ఉద్యోగికి గత నెల మొత్తం178 యూనిట్ల విద్యుత్తు ఖర్చు చేయగా.. దానికి రూ.23,67,71,524 (రూ.23.67 కోట్లు) బిల్లు వచ్చింది. ఈ సందర్భంగా బసిత్ మాట్లాడుతూ.. ‘‘ఉత్తరప్రదేశ్‌ ప్రజలు చెల్లించాల్సిన మొత్తం బిల్లు నాకే వచ్చినట్లుంది. నా జీవితాంతం కష్టపడినా ఇంత మొత్తాన్ని చెల్లించలేను’’ అని తెలిపాడు.

దీనిపై ఎగ్జిక్యూటివ్ ఇంజినీర్ శాదాబ్ అహ్మద్ స్పందిస్తూ.. ‘‘రీడింగ్ సమయంలో కొన్ని లోపాలు తలెత్తుతూ ఉంటాయి. వినియోగదారుడి ఫిర్యాదు మేరకు మళ్లీ రీడింగ్ తీసుకుని సమస్య పరిష్కరిస్తాం. రెండో సారి తీసుకున్న బిల్లులో ఎటువంటి లోపాలు లేనట్లయితే.. ఆ మొత్తాన్ని మాత్రమే చెల్లించాలని కోరతాం’’ అని తెలిపారు.