Whirlpool Hole in UAE: ఆకాశానికి చిల్లు.. యూఏఈలో వింత, కారణం ఇదేనా?

ఆకాశానికి చిల్లు పడిందా ? లేదా ఊడి పడిందా? అనేలా యూఏఈ ఆకాశంలో వింతైన ఆకారం ఆశ్చర్యపరిచింది. ఈ ఆకారం ఏర్పడటానికి ముందు ఆ దేశంలోని వివిధ ప్రాంతాల్లో భారీ వర్షం కురిసింది. కొద్ది సేపటి తర్వాత ఆకాశంలోని మేఘాలు ఈ రూపంలోకి మారిపోయి ఆశ్చర్యపరిచాయి. ఆ వీడియో ఇప్పుడు సోషల్ మీడియాలో వైరల్ అయ్యింది.

షార్జాకు చెందిన ఖగోళవేత్త మరియు వాతావరణ శాస్త్రవేత్త ఎబ్రహిం అల్ జర్వాన్ ఈ వీడియోను ట్వీట్ చేస్తూ.. ‘‘ఆకాశానికి రంథ్రంలా కనిపిస్తున్న ఆ ఆకారాన్ని ఫాల్‌స్ట్రీక్ హోల్ (వడగట్టు రంధ్రం) అంటారు’’ అని తెలిపారు. అమెరికా నేషనల్ వెదర్ సర్వీస్ (ఎన్‌డబ్ల్యుఎస్) దీనిపై స్పందిస్తూ.. ఆకాశంలో ఏర్పడే అటువంటి ఆకారాలను ‘హోల్ పంచ్ క్లౌడ్’ అని కూడా అంటారన్నారు. ఇది అరుదైన, అద్భుతమైన క్లౌడ్ ఫార్మేషన్ (మేఘాల అమరిక) అని పేర్కొంది. ఇవి యూఎఫ్‌వో రూపంలో, ఆకాశానికి రంథ్రం పడినట్లుగా ఏర్పడతాయని తెలిపారు.
ఆకాశంలో బాగా ఎత్తులో ఉండే మేఘాలకు కాస్త దిగువున ఉండే మధ్యస్థాయి మేఘాల్లో గడ్డకట్టే స్థాయి కంటే చల్లగా ఉండే చిన్న నీటి బిందువులు ఉంటాయని, అవి పూర్తిగా ఏర్పడినప్పుడు మేఘాల మధ్యలో ఈ ఖాళీ ఏర్పడుతుందని ఎన్‌డబ్ల్యూఎస్ పేర్కొంది. ఇప్పుడు అర్థమైందిగా.. అది కేవలం మేఘాల్లో ఏర్పడిన అరుదైన రూపమని, భవిష్యత్తులో ఇటువంటివి మీ కంట పడితే కంగారు పడొద్దు. సెల్ఫీ తీసుకుని దాచిపెట్టుకోండి.