తనపై తుమ్మాడని.. స్నేహితుడిపై కాల్పులు, కొంప ముంచిన కరోనా!

రోజులు మారాయ్.. మీరు దేనిపై అయినా జోకులు వేసుకోండి. కానీ, కరోనాపై మాత్రం జోకులు వేయొద్దు. లేకపోతే.. ఈ వ్యక్తికి ఏర్పడిన పరిస్థితే మీకూ ఎదురు కావచ్చు. ఢిల్లీ శాటిలైట్ సిటీ గ్రేటర్ నోయిడాలో కొంతమంది స్నేహితులు లుడో అడుకుంటున్నారు. వారిలో ఒకరు.. తుమ్మాడు. దీంతో అతడి స్నేహితుడు కరోనా వస్తుందని భయపడి.. దూరంగా తుమ్మాలని చెప్పాడు. అయితే, అతడి మాట లెక్క చేయని ఆ వ్యక్తి మరోసారి స్నేహితుడిపై తుమ్మి.. ‘‘ఇదిగో కరోనా తీస్కో’’ అని కామెంట్ చేశాడు.
ఆ మాట వినగానే అతడి స్నేహితుడికి చిర్రెత్తుకొచ్చింది. తన దగ్గర ఉన్న దేశీ పిస్తోల్ తీసి తుమ్మిన వ్యక్తిపై కాల్పులు జరిపాడు. దీంతో బాధితుడు అక్కడికక్కడే కుప్పకూలాడు. దీంతో కాల్పులు జరిపిన నిందితుడు అక్కడి నుంచి పారిపోయాడు. ఘటన స్థలికి చేరిన పోలీసులు బాధితుడిని హాస్పిటల్‌కు తరలించారు. ప్రస్తుతం అతడి పరిస్థితి నిలకడగానే ఉందని వైద్యులు తెలిపారు. నిందితుడు పరారిలో ఉన్నట్లు తెలిసింది. ఇప్పటికైనా అర్థమవుతుందా.. జనాలు కరోనా వైరస్ పట్ల ఎంత భయంతో ఉన్నారో. కాబట్టి.. మీరు సరదాకైనా సరే కరోనా వైరస్ ఉందంటూ ఎవరి మీదా తుమ్మే ప్రయత్నం చేయొద్దు. అలా చేస్తే చిక్కుల్లో పడతారు.

Also Read: భార్యను చంపేసిన కరోనా బాధితుడు.. కారణం విని షాకైన పోలీసులు