సూపర్ ఉమెన్.. ఒక పూటలో ఏడాదికి సరిపడా కూరగాయలను కోసేసింది!

రోజూ కూరగాయలు కోసి కోసి విసుగెత్తిపోయిందో ఏమో.. ఆస్ట్రేలియాకు చెందిన మహిళ ఏకంగా ఒకే పూటలో ఏడాదికి సరిపడా కూరగాయలను కోసి ఫ్రిజ్‌లో పెట్టింది. సాధారణంగా చాలామంది త్వరగా వంట చేయడానికి ఒక రోజు ముందే కూరగాయలను కోసి సిద్ధం చేసుకుంటారు. కానీ, ఆమె ఏడాదికి సరిపడా కూరగాయలను కోసిందంటే నిజంగా చిత్రమే.

రోజూ కూరగాయలు కోయడానికి ఎక్కువ సమయం పడుతుందనే ఉద్దేశంతో ఆమె.. వంట గదిలో ఝాన్సీ రాణి అవతారం ఎత్తింది. కనిపించిన కూరగాయలను.. దొరికింది దొరికినట్లు తురిమేస్తూ ఒక్క పూటలోనే పని పూర్తి చేసింది. మొత్తం 65 కిలోల కూరగాయలను ఆమె చకచకా ముక్కలు చేసింది. వీటిలో 20 కిలోల బంగాళా దుంపలు, 15 కిలోల క్యారెట్లు, 15 కిలోల చిలకడ దుంపలు, 10 కిలోల టమోటాలు, ఉల్లిపాయలు తదితర కూరగాయలు ఉన్నాయి. కోసిన ముక్కలను అందంగా ప్యాక్ చేసి ఫ్రిజ్ మొత్తాన్ని నింపేసింది.
‘‘ప్రతి రోజు పిల్లలకు వంట చేయడానికి, రాత్రి డిన్నర్‌కు కూరగాయలు కోయడం పెద్ద పనిగా ఉంది. అందుకే, మొత్తం ఏడాదికి సరిపడా కూరగాయలను కొనుగోలు చేసి ఒక్కసారే కట్ చేసేసి.. ఫ్రిజ్‌లో పెట్టేశాను. ఇకపై ఏది కావాలన్న వెంటనే తీసుకుని వంట పూర్తి చేసేయగలను’’ అని ఆమె తెలిపింది.